![មេដឹកនាំបង់ក្លាដែស](https://cdn.cambonomist.com/media/images/kbbkmmn222hhhh_RjBnYYt.2e16d0ba.fill-960x540.jpg)
រដ្ឋាភិបាលបង់ក្លាដែស បាននិយាយកាលពីថ្ងៃអង្គារថា ខ្លួននឹងធ្វើតាមសេចក្តីសម្រេចរបស់តុលាការកំពូលដែលកំណត់ថា ៩៣% នៃការងាររដ្ឋត្រូវបានបើកចំហសម្រាប់ការប្រកួតប្រជែង ទៅតាមតម្រូវការទាមទារដោយក្រុមនិស្សិត បន្ទាប់ពីផ្ទុះកុប្បកម្មដ៏សាហាវបំផុតនៅក្នុងប្រជាជាតិនេះ។ បាតុកម្មនេះបានផ្ទុះនៅទីក្រុងដាកា រដ្ឋធានីរបស់ប្រទេសបង់ក្លាដែស និងទីក្រុងធំៗនានា ហើយនៅក្នុងអំឡុងពេលដែលផ្ទុះបាតុកម្មនោះ អាជ្ញាធរបានដាក់បម្រាមគោចរ ផ្តាច់ប្រព័ន្ធអ៊ីនធឺណិត និងដាក់ចេញនូវចំណាត់ការសន្តិសុខដ៏តឹងរ៉ឹងបំផុត។
នៅព្រឹកថ្ងៃអង្គារស្ថានភាពហាក់ស្ងប់ស្ងាត់បន្តិច ហើយក្រុមនិស្សិតបានទាមទារឲ្យលុបចោលបម្រាមគោចរ និងការស្ដារឡើងវិញនូវសេវាអ៊ីនធឺណិត ប៉ុន្តែទោះបីជាយ៉ាងណាក៏ដោយ មេទ័ពបាននិយាយថា សន្តិសុខនៅតែមិនទាន់ត្រូវបានស្ដារឡើងវិញទាំងស្រុងនៅឡើយទេ បន្ទាប់កងទ័ពបានបញ្ជាឲ្យឃ្លាំមើល និងត្រួតពិនិត្យសន្តិសុខតាមឧទ្ធម្ភាគចក្រ។
ក្រោយការទាមទារ រដ្ឋាភិបាលបានប្រកាសបន្ធូរបន្ថយបម្រាមគោចរដែលបានដាក់ចេញដើម្បីជួយទប់ស្កាត់ភាពចលាចលចន្លោះពីម៉ោង១០ព្រឹក ដល់ម៉ោង៥ល្ងាច ដើម្បីអនុញ្ញាតឱ្យមនុស្សទិញទំនិញសំខាន់ៗ។ ការប៉ះទង្គិចគ្នារវាងកងកម្លាំង និងក្រុមបាតុករនេះបានបណ្តាលឱ្យមនុស្សជិត១៥០នាក់ស្លាប់ និងមនុស្សជាង១,៦០០នាក់ ត្រូវបានចាប់ខ្លួន។
កុបកម្មនេះបានផ្ទុះឡើងក្រោយមានការសើរើឡើងវិញនូវអ្វីដែលរដ្ឋាភិបាលបានលុបចោលកាលពីឆ្នាំ២០១៨ ដែលកំណត់កូតាការងាររដ្ឋទុកឲ្យកូនចៅក្រុមអ្នកមានឥស្សរភាព និងគុណបំណាច់ជាតិ ច្រើនពេក ស្របពេលប្រទេសនេះកំពុងជួបវិបត្តិខ្វះការងារ៕
ដោយៈ សរ សុជាតិ