មន្ត្រីអាមេរិកម្នាក់ដែលបាននិយាយក្នុងលក្ខខណ្ឌអនាមិកបានអះអាងថា ការពិតដែលថាប្រទេសរុស្ស៊ីកំពុងងាកទៅរករដ្ឋឯកោគឺកូរ៉េខាងជើងនេះ គឺវាបានបង្ហាញថា យោធារុស្ស៊ីកំពុងបន្តជួបការខ្វះខាតការផ្គត់ផ្គង់អាវុធយ៉ាងខ្លាំង សម្រាប់ការធ្វើសង្គ្រាមនៅប្រទេសអ៊ុយក្រែន ដែលមួយផ្នែកដោយសារតែការរឹតបន្តឹងលើការនាំចេញ និងទណ្ឌកម្ម។
មន្ត្រីចារកម្មអាមេរិកជឿជាក់ថា ជនជាតិរុស្ស៊ីអាចស្វែងរកទិញឧបករណ៍យោធាពីកូរ៉េខាងជើងបន្ថែមនាពេលអនាគត ហើយការរកឃើញដោយសម្ងាត់នេះ ត្រូវបានរាយការណ៍ដំបូងដោយកាសែត The New York Times របស់សហរដ្ឋអាមេរិក។ ទោះយ៉ាងណាក៏ដោយមន្ត្រីសហរដ្ឋអាមេរិករូបនេះ មិនបានលម្អិតថាតើសម្ភារៈយោធាដែលរុស្ស៊ីមានបំណងទិញពីកូរ៉េខាងជើងនេះមានចំនួនប៉ុន្មាននោះទេ។
លទ្ធផលដែលគេបានរកឃើញនេះបានកើតឡើងបន្ទាប់ពីរដ្ឋបាលលោក ចូ បៃដិន កាលពីពេលថ្មីៗនេះបានបញ្ជាក់ថា យោធារុស្ស៊ីកាលពីខែសីហាបាននាំយកយន្តហោះគ្មានមនុស្សបើកដែលផលិតដោយអ៊ីរ៉ង់សម្រាប់ប្រើប្រាស់នៅលើសមរភូមិនៅក្នុងប្រទេសអ៊ុយក្រែន។
សេតវិមានបាននិយាយកាលពីសប្តាហ៍កន្លងទៅនេះថា ប្រទេសរុស្ស៊ីបានប្រឈមមុខនឹងបញ្ហាបច្ចេកទេស ដោយមិនចេះប្រើយន្តហោះគ្មានមនុស្សបើកផលិតដោយអ៊ីរ៉ង់ដែលបានទិញពីរដ្ឋាភិបាលក្រុងតេអេរ៉ង់កាលពីខែសីហា សម្រាប់ប្រើនៅក្នុងសង្គ្រាមរបស់ខ្លួនជាមួយអ៊ុយក្រែន។
រុស្សីបានរៀនប្រើយន្តហោះគ្មានមនុស្សបើកស៊េរី Mohajer-6 និង Shahed អស់រយៈពេលជាច្រើនថ្ងៃកាលពីខែមុននេះ ដែលរដ្ឋបាលរបស់លោក បៃដិន និយាយថា វាទំនងជាជាផ្នែកមួយនៃផែនការរបស់រុស្ស៊ីក្នុងការទិញយន្តហោះគ្មានមនុស្សបើកពីអ៊ីរ៉ង់រាប់រយគ្រឿងសម្រាប់ប្រើក្នុងសង្គ្រាមនៅប្រទេសអ៊ុយក្រែន។
អត្ថបទគួរអាន
យ៉ាងណាមិញ ខាងកូរ៉េខាងជើងមួយរយៈចុងក្រោយនេះ ក៏បានព្យាយាមរឹតចំណងទំនាក់ទំនងជាមួយរុស្ស៊ីកាន់តែខ្លាំងឡើងដែរ ក្នុងពេលដែលអឺរ៉ុប និងប្រទេសបស្ចិមលោកជាច្រើនបានដកខ្លួនចេញពីរុស្ស៊ីជាបណ្ដើរៗ ហើយកូរ៉េខាងជើងបានបន្ទោសសហរដ្ឋអាមេរិកចំពោះវិបត្តិនៅអ៊ុយក្រែន និងបានថ្កោលទោស “គោលនយោបាយអនុត្តរភាព” របស់បស្ចិមលោក ហើយបានបង្ហាញពីភាពត្រឹមត្រូវនៃសកម្មភាពយោធារបស់រុស្ស៊ីនៅអ៊ុយក្រែន ដើម្បីការពារខ្លួនផងដែរ។
ប្រទេសកូរ៉េខាងជើងបានបង្ហាញពីចំណាប់អារម្មណ៍ក្នុងការបញ្ជូនកម្មករសំណង់របស់ខ្លួនឱ្យទៅជួយកសាងហេដ្ឋារចនាសម្ព័ន្ធនៅលើទឹកដីដែលកាន់កាប់ដោយរុស្ស៊ីស្ថិតនៅភាគខាងកើតរបស់ប្រទេសនេះឡើងវិញ។
ឯកអគ្គរដ្ឋទូតកូរ៉េខាងជើងប្រចាំនៅទីក្រុងមូស្គូនាពេលថ្មីៗនេះ បានជួបជាមួយបេសកជនមកពីតំបន់បំបែកខ្លួន ដែលគាំទ្រដោយរុស្ស៊ីចំនួនពីរនៅក្នុងតំបន់ Donbas នៅប្រទេសអ៊ុយក្រែន និងបានសម្តែងសុទិដ្ឋិនិយមពីកិច្ចសហប្រតិបត្តិការនៅក្នុង«វិស័យការងារចំណាកស្រុក»ដោយលើកឡើងពីការបន្ធូរបន្ថយការត្រួតពិនិត្យព្រំដែនរបស់ប្រទេសកូរ៉េខាងជើងផងដែរ។
យ៉ាងណាក៏ដោយចុះ ការនាំចេញអាវុធរបស់កូរ៉េខាងជើងទៅប្រទេសរុស្ស៊ីនឹងបំពានលើសេចក្ដីសម្រេចចិត្តអង្គការសហប្រជាជាតិ ដែលហាមឃាត់ប្រទេសនេះមិនឱ្យនាំចេញ ឬក៏នាំចូលអាវុធពីប្រទេសដទៃទៀត។ ហើយលទ្ធភាពនៃការបញ្ជូនពលករទៅកាន់ទឹកដីដែលគ្រប់គ្រងដោយរុស្ស៊ីនៅអ៊ុយក្រែននេះ ក៏នឹងបំពានលើសេចក្ដីសម្រេចចិត្តរបស់អង្គការសហប្រជាជាតិដែលតម្រូវឱ្យរដ្ឋសមាជិកទាំងអស់ត្រូវធ្វើមាតុភូមិនិវត្តន៍ពលករកូរ៉េខាងជើងទាំងអស់នោះចេញពីទឹកដីរបស់ពួកគេដូចបានកំណត់នៅឆ្នាំ២០១៩ផងដែរ៕
អត្ថបទ៖ សុខ ជា
