ចិនផ្អាកការនាំចូលសាច់គោពីប្រទេសលីទុយអានី ខណៈជម្លោះជាមួយតៃវ៉ាន់កើនឡើង

អាជ្ញាធរនៃប្រទេសលីទុយអានី បាននិយាយនៅក្នុងសេចក្តីថ្លែងការណ៍មួយថា រដ្ឋបាលគយទូទៅរបស់ប្រទេសចិនបានជូនដំណឹងដល់ប្រទេសខ្លួនថា ប្រទេសចិនកំពុងបញ្ឈប់ការនាំចេញទំនិញពីលីទុយអានីទៅចិន ដោយសារតែផលិតផលមិនមានឯកសារត្រឹមត្រូវ ។ អាជ្ញាធរលីទុយអានី បានលើកឡើងថា នេះជាការជូនដំណឹងលើកដំបូង ដែលខ្លួនមិនធ្លាប់បានទទួលពីមុនមកនោះទេ ព្រោះរាល់ដងពេលនាំចូលទំនិញទៅចិន ចិនតែងតែសួររកព័ត៌មានខ្វះខាតនោះជាមុនសិន។

រដ្ឋបាលគយចិនបានបញ្ជាក់ថា ខ្លួនបានបញ្ឈប់ការនាំចូលសាច់គោលីទុយអានី ប៉ុន្តែមិនបានផ្តល់ហេតុផលជាក់លាក់ណាមួយឡើយ។

ទំនាក់ទំនងបានបែកបាក់រវាងប្រទេសចិន និង ប្រទេសលីទុយអានី បន្ទាប់ពីប្រទេសលីទុយអានីបានអនុញ្ញាតឱ្យកោះតៃវ៉ាន់បើកការិយាល័យតំណាងនៅក្នុងប្រទេសរបស់ខ្លួន ក្រោមឈ្មោះថា «តៃវ៉ាន់» ជំនួសឲ្យការប្រើឈ្មោះថា«កោះតៃវ៉ាន់នៃប្រទេសចិន»នៅក្នុងរដ្ឋធានី Vilnius របស់ខ្លួនកាលពីឆ្នាំមុន ដោយបានធ្វើឱ្យទីក្រុងប៉េកាំងខឹងសម្បារយ៉ាងខ្លាំង ដ្បិតថាចិនតែងចាត់ទុកកោះនេះ ស្ថិតក្រោមការគ្រប់គ្រងរបស់ខ្លួន។ ក្នុងនោះប្រទេសចិន បានព្រមានប្រទេសលីទុយអានី តាមរយៈ ការដាក់សម្ពាធសេដ្ឋកិច្ចពាណិជ្ជកម្មជាច្រើនលើកមកហើយដែរ ហើយក៏មានប្ដឹងជំទាស់គ្នានៅអង្គការពាណិជ្ជកម្មពិភពលោកផងដែរ។

ចក្រភពអង់គ្លេសបាននិយាយកាលពីថ្ងៃចន្ទថា ខ្លួននឹងចូលរួមជាមួយសហរដ្ឋអាមេរិក និងអូស្ត្រាលីក្នុងការគាំទ្រពាណិជ្ជកម្មរបស់សហភាពអឺរ៉ុបប្រឆាំងនឹងប្រទេសចិននៅក្នុងអង្គការពាណិជ្ជកម្មពិភពលោកជុំវិញការហាមឃាត់ពាណិជ្ជកម្មរបស់ទីក្រុងប៉េកាំងលើប្រទេសលីទុយអានី។

គណៈកម្មការអឺរ៉ុបនិយាយថា ការនាំចេញសរុបពីប្រទេសលីទុយអានី ដែលជាសមាជិកសហភាពអឺរ៉ុបទៅកាន់ប្រទេសចិនបានធ្លាក់ចុះ ៩១ ភាគរយ នៅក្នុងខែធ្នូឆ្នាំ២០២១ បើធៀបនឹងខែធ្នូឆ្នាំ ២០២០។

ប្រទេសលីទុយអានី បានអះអាងថា ខ្លួនមិនបាននាំចេញផលិតផលអាហារ រួមទាំងសាច់គោទៅប្រទេសចិនតាំងពីដើមខែធ្នូ ឆ្នាំ ២០២១ម្ល៉េះ។

ដោយឡែក អ្នកនាំពាក្យក្រសួងការបរទេសចិនលោក Zhao Lijian បានបដិសេធមិនបញ្ជាក់លម្អិតអំពីការផ្អាកសាច់គោអូស្ត្រាលីនោះទេ ប៉ុន្តែបាននិយាយថា ប្រទេសលីទុយអានីគួរតែកែតម្រូវ "កំហុស" របស់ខ្លួនឡើងវិញ។

គួរបញ្ចាក់ថា ប្រទេសចិនគឺជាប្រទេសនាំចូលសាច់គោលំដាប់កំពូលរបស់ពិភពលោក ប៉ុន្ដែ ការនាំចូលសាច់គោពីប្រទេសលីទុយអានីគឺមានតិចតួចប៉ុណ្ណោះ ពោលគឺមានប្រមាណជិត ៨០០ តោនកាលពីឆ្នាំ ២០២១ ខណៈដែលចិនបាននាំចូលសាច់គោសរុបជាង២លានតោន៕

អត្ថបទ វ៉ាន់ ស្រីរ័ត្ន