សន្ទស្សន៍របស់អ្នកគ្រប់គ្រងការទិញសេវាកម្ម កៃស៊ីន/អេសអែនភី គ្លូបបល (Caixin/S&P Global) របស់ចិន បានកើនឡើងពីកម្រិត ៥៦,៤ នៅក្នុងខែមេសា ដល់កម្រិត ៥៧,១ នៅក្នុងខែឧសភា។ សន្ទស្សន៍នេះមានលើសពីកម្រិត ៥០ ដែលបែងចែករវាងការធ្លាក់ចុះ និងការកើនឡើងនៃសកម្មភាពសេដ្ឋកិច្ចណាមួយ។
លទ្ធផលចុងក្រោយនេះគឺផ្ទុយទៅនឹងសន្ទស្សន៍របស់អ្នកគ្រប់គ្រងការទិញ PMI ផ្លូវការរបស់ចិនដែលបានចេញផ្សាយកាលពីសប្តាហ៍មុន ដោយបានបង្ហាញពីល្បឿនយឺតនៃការកើនឡើងនៅក្នុងវិស័យសេវាកម្ម។
អ្នកសេដ្ឋកិច្ចមួយចំនួនបានព្រមានថា តម្រូវការដ៏ច្រើនសម្រាប់សេវាកម្មផ្ទាល់ខ្លួនអាចថយចុះដោយសារកំណើនប្រាក់ចំណូលយឺតនិងសម្ពាធគ្មានការងារធ្វើ ដែលអាចធ្វើឱ្យអ្នកបង្កើតគោលនយោបាយឈឺក្បាលកាន់តែខ្លាំង ខណៈដែលពួកគេកំពុងដោះស្រាយរឿងតម្រូវការពីបរទេសចុះខ្សោយ និងរឿងសេដ្ឋកិច្ចងើបឡើងវិញមិនស្មើគ្នាបន្ទាប់ពីជំងឺកូវីដ។
ការស្ទង់មតិ Caixin បានបង្ហាញថា ក្រុមហ៊ុនសេវាកម្មបានរាយការណ៍អំពីការកើនឡើងនូវអាជីវកម្មថ្មីជាលើកដំបូងកាលពីខែមុននៅថ្ងៃឈប់សម្រាកខែឧសភា បន្ទាប់ពីការបើកប្រទេសចិនឡើងវិញបានជំរុញឱ្យមានការបញ្ជាទិញជាច្រើននៅតាមសណ្ឋាគារ ភោជនីយដ្ឋាន និងទីភ្នាក់ងារសេវាទេសចរណ៍។
អត្ថបទគួរអាន
ទន្ទឹមនេះដែរ សកម្មភាពសេវាកម្មនៅប្រទេសជប៉ុនក៏បានកើនឡើងក្នុងល្បឿនមួយគួរឱ្យកត់សម្គាល់កាលពីខែឧសភា ដោយសារការស្ទុះងើបឡើងវិញនៃតម្រូវការពីក្រៅប្រទេស និងការកើនឡើងនៃភ្ញៀវទេសចរបរទេស ក្រោយពីជប៉ុនបានបន្ធូរបន្ថយវិធានការជំងឺកូវីដថែមទៀត។
សន្ទស្សន៍អ្នកគ្រប់គ្រងការទិញសេវាកម្មជប៉ុនចុងក្រោយរបស់ធនាគារ ជីប៊ុន (Jibun Bank) បានឡើងដល់កម្រិត ៥៥,៩ កាលពីខែឧសភា ដោយបន្តកើនឡើងពីកម្រិតខ្ពស់បំផុត ៥៥,៤ នៅក្នុងខែមេសា។ នេះគឺជាការបង្ហាញពីការកើនឡើងលើសពីកម្រិត ៥០ សម្រាប់រយៈពេល៩ខែជាប់ៗគ្នា។
លោក អ៊ុស្សាម៉ា បាត់ទី (Usamah Bhatti) សេដ្ឋកិច្ចវិទូនៅក្រុមហ៊ុនស្រាវជ្រាវទីផ្សារ អេសអែនភី គ្លូបបល (S&P Global) បាននិយាយថា ក្រុមហ៊ុនមួយចំនួនរីករាយនឹងការបន្ធូរបន្ថយវិធានការប្រឆាំងជំងឺកូវីដ ហើយបានកត់សម្គាល់ពីការកើនឡើងយ៉ាងខ្លាំងនៃតម្រូវការ ជាពិសេសពីទេសចរនៅក្រៅប្រទេស និងនៅក្នុងប្រទេសតែម្ដង។
រដ្ឋាភិបាលជប៉ុនបានលុបចោលការត្រួតពិនិត្យព្រំដែនដ៏តឹងរ៉ឹងទាក់ទងនឹងជំងឺកូវីដ និងបានចាត់ទុកជំងឺកូវីដ១៩ថាគ្រាន់តែជាជំងឺផ្តាសាយតាមរដូវកាលមួយតែប៉ុណ្ណោះ។ ចំនួនភ្ញៀវបរទេសទៅប្រទេសជប៉ុនបានកើនឡើងដល់កម្រិតខ្ពស់នៅក្រោយជំងឺកូវីដ គឺឡើងជិតដល់ ២ លាននាក់នៅក្នុងខែមេសា៕
អត្ថបទ៖ សុខ ជា
