សហភាពអឺរ៉ុបបានទះក្រុមហ៊ុន Meta មួយកំផ្លៀង ដោយការផាកពិន័យចំនួន ១,៣ ប៊ីលានដុល្លារកាលពីថ្ងៃចន្ទ ក្នុងបទល្មើសបំពានលើកិច្ចការពារឯកជនភាព ហើយបានបញ្ជាឱ្យក្រុមហ៊ុននេះបញ្ឈប់ការផ្ទេរព័ត៌មានផ្ទាល់ខ្លួនរបស់អ្នកប្រើប្រាស់ទៅឱ្យសហរដ្ឋអាមេរិកដែលនៅឯត្រើយម្ខាងនៃមហាសមុទ្រអាត្លង់ទិកត្រឹមខែតុលា។ នេះជាទណ្ឌកម្មចុងក្រោយបំផុតនៅក្នុងករណីដែលមានអាយុកាលមួយទសវត្សរ៍ ដែលបង្កឡើងដោយក្ដីបារម្ភចំពោះការលួចស្តាប់តាមអ៊ីនធឺណិតប្រព្រឹត្តដោយសហរដ្ឋអាមេរិកមកលើសម្ព័ន្ធមិត្តនៅអឺរ៉ុប។
ការពិន័យជាប្រាក់ចំនួន ១,២ ប៊ីលានអឺរ៉ូ គឺជាចំនួនដ៏ធំបំផុត គិតចាប់តាំងពីរបបឯកជនភាពនៃទិន្នន័យដ៏តឹងរ៉ឹងរបស់សហភាពអឺរ៉ុបបានចូលជាធរមានកាលពី ៥ ឆ្នាំមុន។ ប្រាក់ពិន័យបនេះគឺលើសពីប្រាក់ពិន័យចំនួន ៧៤៦ លានអឺរ៉ូ ចំពោះក្រុមហ៊ុន Amazon ក្នុងឆ្នាំ ២០២១ ក្នុងបទរំលោភលើការការពារទិន្នន័យអ្នកប្រើប្រាស់។
អត្ថបទគួរអាន
ក្រុមហ៊ុន Meta ដែលធ្លាប់បានព្រមានថា សេវាកម្មសម្រាប់អ្នកប្រើប្រាស់របស់ខ្លួននៅអឺរ៉ុបអាចត្រូវបានកាត់ផ្តាច់ បានអះអាងពីការប្តឹងឧទ្ធរណ៍ និងបានសុំឱ្យតុលាការព្យួរការសម្រេចជាបន្ទាន់។ ក្រុមហ៊ុននេះបាននិយាយថា "មិនមានការរំខានភ្លាមៗចំពោះ Facebook នៅអឺរ៉ុបទេ"។
យោងតាមការសម្រេចចិត្តដាក់ពិន័យលើក្រុមហ៊ុន Meta, សហភាពអឺរ៉ុបផ្ដោតលើទិន្នន័យអ្នកប្រើប្រាស់ដូចជា ឈ្មោះ, អ៊ីមែល និងអាសយដ្ឋានអ្នកផ្ដល់សេវាកម្មអ៊ិនធឺណិត, សារនានា, ប្រវត្តិនៃការប្រើ, ទិន្នន័យស្ដីពីទីតាំងភូមិសាស្ត្រ, និងព័ត៌មានផ្សេងៗទៀត ដែល ក្រុមហ៊ុន Meta និងក្រុមហ៊ុនបច្ចេកវិទ្យាធំៗផ្សេងៗទៀតដូចជា Google ជាដើម ប្រើប្រាស់សម្រាប់ការផ្សាយពាណិជ្ជកម្មតាមអ៊ីនធឺណិតគោលដៅ។
លោក Nick Clegg ប្រធានផ្នែកកិច្ចការសកលរបស់ក្រុមហ៊ុន Meta និងលោកស្រី Jennifer Newstead ប្រធានផ្នែកច្បាប់ បាននិយាយនៅក្នុងសេចក្តីថ្លែងការណ៍មួយថា "ការសម្រេចចិត្ត[របស់សហភាពអឺរ៉ុប]គឺខុស មិនសមហេតុផល និងបង្ហាញគំរូដ៏គ្រោះថ្នាក់សម្រាប់ក្រុមហ៊ុនផ្សេងៗទៀតរាប់មិនអស់ ដែលផ្ទេរទិន្នន័យរវាងសហភាពអឺរ៉ុប និងសហរដ្ឋអាមេរិក”៕
