តម្លៃភាគហ៊ុនរបស់ក្រុមហ៊ុនគ្រប់គ្រងដោយក្រុមគ្រួសារត្រកូលមហាសេដ្ឋី ស៊ីណាវ៉ាត្រា ហើមស្រកទៅតាមស្ថានភាពនយោបាយ

នៅមុនពេលតុលាការធម្មនុញ្ញថៃ បានចេញសាលក្រមបណ្ដេញលោក សេដ្ឋា ពីតំណែង នាយករដ្ឋមន្ត្រី តម្លៃភាគហ៊ុននៅក្នុងក្រុមហ៊ុនអចលនទ្រព្យ Sansiri របស់លោក សេដ្ឋា ដែលបានចុះបញ្ជីនៅផ្សារហ៊ុនក្រុងបាងកក បានចាប់ផ្តើមធ្លាក់ចុះរហូតដល់ ៣% នៅពេលនោះ ខណៈដែលក្រុមហ៊ុនអភិវឌ្ឍន៍អចលនទ្រព្យ SC Asset មួយទៀតបានឡើងរហូតដល់ ៧,៨% នៅពេលនោះ។

ក្រុមហ៊ុន SC Asset ត្រូវបានគ្រប់គ្រងដោយក្រុមគ្រួសារត្រកូល ស៊ីណាវ៉ាត្រា ដែលបានចុះបញ្ជីនៅក្នុងផ្សារហ៊ុនបាងកក ជាមួយនឹងមូលធនទីផ្សារសរុបប្រហែលជិត ៤០០ លានដុល្លារ។

ទ្រព្យសម្បត្តិរបស់ត្រកូល ស៊ីណាវ៉ាត្រា ត្រូវបានគេប៉ាន់ប្រមាណថា មានចំនួន ២ពាន់២រយ​ពាន់លានដុល្លារ ជាហេតុធ្វើឱ្យពួកគេជាប់ចំណាត់ថ្នាក់ទី១១ នៅក្នុងបញ្ជីទស្សនាវដ្ដីហ្វប (Forbes) ជាគ្រួសារដែលមានទ្រព្យសម្បត្តិច្រើនបំផុតនៅប្រទេសថៃ។

នៅក្នុងប្រទេស ដែលគណបក្សនយោបាយជាច្រើនត្រូវបានគ្រប់គ្រងដោយគ្រួសារអ្នកមានទ្រព្យធននោះ ទំនាក់ទំនងអាជីវកម្មរបស់ត្រកូល ស៊ីណាវ៉ាត្រា គឺត្រូវបានគេមើលឃើញថា ជាតំណាងឱ្យទំនាក់ទំនងដ៏អាក្រក់រវាងអំណាច និងលុយកាក់។

ជាក់ស្ដែង គណបក្សឆ្ពោះទៅមុខបានឈ្នះការបោះឆ្នោតនាំមុខគេកាលពីឆ្នាំមុន ដើម្បីដឹកនាំប្រទេសថៃ ប៉ុន្តែ ពេលខ្លះកង្វះខាតទ្រព្យធន់ ឬខ្វះទំនាក់ទំនងនឹងអ្នកមានលុយកាក់មហាសាល ក៏ជាការបង្ហាញឲ្យឃើញពីភាពទន់ខ្សោយផ្នែកសមត្ថភាពធ្វើការដែរ។ នេះបើតាមការគូបញ្ជាក់ដោយសារព័ត៌មាន Nikkei Asia។

ការបិទបាំងពីអំពើពុករលួយពីអតីតកាលមកលើក្រុមគ្រួសាររបស់លោកស្រី ផេថងថាន នឹងបង្ហាញពីបញ្ហាប្រឈមសម្រាប់នាយករដ្ឋមន្ត្រីក្មេងបំផុតរបស់ថៃ រូបនេះ ហើយភាពស្មុគស្មាញមួយទៀត គឺថា ឪពុករបស់លោកស្រី គឺលោក ថាក់ស៊ីន ជាអតីតនាយករដ្ឋមន្ត្រីថៃ កំពុងមានឥទ្ធិពលកាន់តែខ្លាំងឡើងទៅលើរដ្ឋាភិបាលរបស់លោកស្រីថែមទៀត។

ទោះយ៉ាងណា ញត្តិដែលបានលើកឡើងពីទំនាស់ផលប្រយោជន៍ ត្រូវបានគេដាក់ប្ដឹងប្រឆាំងនឹងលោកស្រី ផេថងថាន រួចហើយតាំងពីពេលដែលលោកស្រីឈ្នះការបោះឆ្នោតសភាមក ហើយញ្ញតិនេះ ស្រដៀងនឹងបណ្ដឹងដែលគេធ្លាប់ប្ដឹងប្រឆាំងលោកថាក់ស៊ីន កាលពីពេលនៅជានាយករដ្ឋមន្ត្រីចន្លោះពីឆ្នាំ២០០០ ដល់២០០៦ដែរ។

សកម្មជន នយោបាយ លោក សុនឌី លីមថុងគល់ បានបញ្ជាក់ថា លោកកំពុងស្វែងរកការប្រព្រឹត្តកំហុសក្រមសីលធម៌នៅក្នុងការដឹកនាំរាជរដ្ឋាភិបាលរបស់ត្រកូលគ្រួសារថាក់ស៊ីននេះ ខណៈដែលលោកក៏ជាអ្នកធ្លាប់ដឹកនាំការតវ៉ាដកលោកថាក់ស៊ីនចេញពីតំណែងកាលពីឆ្នាំ២០០៦ដែរ៕

អត្ថបទ៖ សុខ មង្គល