ភាគហ៊ុនរបស់ក្រុមហ៊ុនមហាសេដ្ឋីហុងកុង លី កាស៊ីង ដាំក្បាលចុះខ្លាំង ក្រោយរដ្ឋាភិបាលចិន រិះគន់រឿងលក់កំពង់ផែនៅព្រែកជីកប៉ាណាម៉ា

ភាគហ៊ុនដាំក្បាលចុះនេះ កើតមានឡើង ក្រោយរដ្ឋាភិបាលចិន បានរិះគន់ និងជំរុញឱ្យក្រុមហ៊ុនមេនៅហុងកុង CK Hutchison ពិចារណាឡើងវិញលើការលក់ក្រុមហ៊ុនបុត្រសម្ព័ន្ធ Panama Ports Company ដែលគ្រប់គ្រងកំពង់ផែយុទ្ធសាស្ត្រចំនួន២ នៅព្រែកជីកប៉ាណាម៉ា ឱ្យទៅក្រុមហ៊ុនយក្សអាម៉េរិក BlackRock ក្នុងតម្លៃជិត២៣ពាន់លានដុល្លារ។

ប្រទេសចិន បានរិះគន់ក្រុមហ៊ុន CK Hutchison របស់កំពូលមហាសេដ្ឋីហុងកុង លី កាស៊ីង ចំពោះការលក់ក្រុមហ៊ុនបុត្រសម្ព័ន្ធ Panama Ports Company ដែលគ្រប់គ្រងកំពង់ផែយុទ្ធសាស្ត្រចំនួន២ នៅព្រែកជីកប៉ាណាម៉ា ឱ្យទៅក្រុមហ៊ុនយក្សអាម៉េរិក BlackRock ដែលជាក្រុមហ៊ុនគ្រប់គ្រងទ្រព្យសកម្មធំបំផុតក្នុងពិភពលោកក្នុងតម្លៃ២២,៨ពាន់លានដុល្លារ ដោយចាត់ទុកកិច្ចព្រមព្រៀងទិញលក់នោះថា ជារឿងនយោបាយដែលមិនបម្រើផលប្រយោជន៍ជាតិ របស់ប្រទេសចិន ហើយបានជំរុញឱ្យក្រុមហ៊ុន CK Hutchison ពិចារណាឡើងវិញ។

ភាគហ៊ុនរបស់ក្រុមហ៊ុន CK Hutchison ដែលមានមូលដ្ឋាននៅទីក្រុងហុងកុង បានធ្លាក់ចុះ៦,៧% កាលពីថ្ងៃសុក្រ សប្ដាហ៍មុន បន្ទាប់ពីមានការចុះផ្សាយអត្ថបទបែបអត្ថាធិប្បាយរិះគន់នៅក្នុងកាសែតហុងកុងមួយ ដែលគាំទ្រដោយរដ្ឋាភិបាលក្រុងប៉េកាំង។

គួររំឭកថា កាលពីសប្តាហ៍មុន ក្រុមហ៊ុន CK Hutchison បានចុះកិច្ចព្រមព្រៀងលក់ភាគហ៊ុនភាគច្រើននៅក្នុងក្រុមហ៊ុនបត្រសម្ព័ន្ធ Panama Ports Company ដែលមានកុងត្រាកាន់កាប់កំពង់ផែយុទ្ធសាស្ត្រ​ចំនួន២ ក្នុងចំណោមកំពង់ផែសរុបទាំង៥ នៅព្រែកជីកប៉ាណាម៉ា រហូតដល់ឆ្នាំ២០៤៧ ឱ្យទៅក្រុមហ៊ុនយក្សអាម៉េរិក BlackRock។

សូមបញ្ជាក់ថា សហរដ្ឋអាម៉េរិក បានសាងសង់ព្រែកជីកប៉ាណាម៉ាពីឆ្នាំ១៩០៣ ដល់ឆ្នាំ១៩១៤ ពោលគឺរយៈពេល១១ឆ្នាំ ក្រោមរដ្ឋបាលប្រធានាធិបតីទី២៦ របស់សហរដ្ឋអាម៉េរិក លោក ធីអូ-ដ រ៉សេវែល (Theodore Roosevelt) ដើម្បីភ្ជាប់មហាសមុទ្រអាត្លង់ទិក និងមហាសមុទ្រប៉ាស៊ីហ្វិក ហើយបានបន្តកាន់កាប់ព្រែកនេះរហូតដល់ថ្ងៃទី៣១ ខែធ្នូ ឆ្នាំ១៩៩៩ មុននឹងប្រគល់ព្រែកជីកនេះទាំងអាឡោះអាល័យឱ្យទៅប្រទេសប៉ាណាប៉ា ជាអ្នកកាន់កាប់វិញក្រោមសន្ធិសញ្ញាចុះដោយប្រទេសទាំងពីរ៕

ដោយ: តែម សុខុម