![តម្លៃដឹកជញ្ជូន](https://cdn.cambonomist.com/media/images/tmldkchnhchntmphlvtk2222.2e16d0ba.fill-960x540.jpg)
ឧកញ៉ា ស៊ិន ចន្ធី អគ្គនាយកក្រុមហ៊ុន ឡាញហល អ៊ិចប្រេស កត់សម្គាល់ឃើញថា នៅក្នុងឆមាសទី១ឆ្នាំនេះសកម្មភាពដឹកជញ្ចូនទំនិញតាមផ្លូវទឹករបស់កម្ពុជា ហាក់មានការកើនឡើងគួរឱ្យកត់សម្គាល់ បើធៀបនឹងរយៈពេលដូចគ្នាឆ្នាំមុន។ តួយ៉ាងទាំងការដឹកជញ្ជូនទំនិញនៅកំពង់ផែស្វយ័តភ្នំពេញ និងកំពង់ផែស្វយ័តក្រុងព្រះសីហនុ គឺសុទ្ធតែមានសម្ទុះកំណើនល្អប្រសើរ។ បើតាមអ្នកជំនាញរូបនេះ សកម្មភាពដឹកជញ្ជូនដែលមានសម្ទុះខ្ពស់ជាងគេនោះ គឺការដឹកជញ្ជូនទៅកាន់តំបន់អាស៊ី ពិសេសប្រទេសចិន ដែលឆ្លុះបញ្ចាំឱ្យឃើញពីការរីកចម្រើននៃការនាំចេញកសិផលរបស់កម្ពុជាទៅកាន់ទីផ្សារទាំងនោះ។
ជាការកត់សម្គាល់របស់អ្នកជំនាញរូបនេះ ការដឹកជញ្ជូនទំនិញទៅកាន់តំបន់អឺរ៉ុប និងសហរដ្ឋអាមេរិក ក៏មានសកម្មភាពមមាញឹកដូចគ្នាដែរ ដែលជំរុញដោយការនាំចេញផលិតផលវាយនភណ្ឌ និងផលិតផលឧស្សហកម្មផ្សេងទៀត។ បើតាមការអះអាងរបស់លោកឧកញ៉ា ស៊ិន ចន្ធី ស្របពេលសកម្មភាពដឹកទំនិញមានការកើនឡើង តម្លៃដឹកជញ្ចូនទំនិញតាមផ្លូវទឹករបស់កម្ពុជានៅឆមាសទី១នេះ ក៏មានការកើនឡើងខ្ពស់ផងដែរ ពិសេសតម្លៃដឹកជញ្ជូនទៅកាន់តំបន់អឺរ៉ុប និងសហរដ្ឋអាមេរិក។
មិនសូវខុសគ្នាប៉ុន្មាននោះទេ លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជាបានគូសបញ្ជាក់ថា ស្របពេលតម្រូវការបញ្ជាទិញមានការកើនឡើងខ្ពស់ សកម្មភាពដឹកជញ្ជូនទំនិញក៏មានភាពមមាញឹកផងដែរ ដែលកត្តានេះធ្វើឱ្យជួបបញ្ហាខ្វះទូកុងតឺន័រ និងបានជំរុញឱ្យតម្លៃដឹកជញ្ជូនហក់ឡើងខ្ពស់គួរឱ្យកត់សម្គាល់។ ជាក់ស្តែងតម្លៃដឹកជញ្ជូនទំនិញពីកម្ពុជាទៅកាន់តំបន់អឺរ៉ុប និងសហរដ្ឋអាមេរិកបច្ចុប្បន្នបានកើនឡើងប្រមាណ៣ដង បើធៀបនឹងតម្លៃក្នុងរដូវកាលធម្មតា ដោយបច្ចុប្បន្នតម្លៃដឹកជញ្ជូនក្នុង១ទូកុងតឺន័របានកើនដល់ជិត១ម៉ឺនដុល្លារឯណោះ។ នេះបើតាមការអះអាងរបស់អ្នកជំនាញរូបនេះ។
សូមជម្រាបថា នៅក្នុងឆមាសទី១ ឆ្នាំ២០២៤នេះ កំពង់ផែស្វយ័តក្រុងព្រះសីហនុមានការចរាចរទូកុងតឺន័រចេញចូលបានចំនួនជាង៤៧ម៉ឺនទូ មានកំណើនជាង២៥% បើធៀបនឹងរយៈពេលដូចគ្នាកាលពីឆ្នាំ២០២៣។ បើយោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជានៅឆមាសទី១ ឆ្នាំ២០២៤ នេះ ការដោះដូរពាណិជ្ជកម្មរវាងកម្ពុជាជាមួយទីផ្សារអន្តរជាតិសម្រេចបានទំហំទឹកប្រាក់សរុបជាង២៦ពាន់លានដុល្លារមានការកើនឡើងជាង១២% បើធៀបនឹងរយៈពេលដូចគ្នាកាលពីឆ្នាំមុន។ ក្នុងនោះការនាំចេញទំនិញរបស់កម្ពុជាទៅកាន់ទីផ្សារអន្តរជាតិមានទំហំទឹកប្រាក់ជាង១២ពាន់លានដុល្លារ កើនឡើងជាង១២% និងការនាំចូលពីទីផ្សារអន្តរជាតិមកវិញមានចំនួនជិត១៤ពាន់លានដុល្លារ កើនឡើងជាង១២%៕