សិង្ហបុរី កំពុងជួបបញ្ហាកំណើនមនុស្សវ័យចំណាស់ខ្ពស់ជាងគេនៅតំបន់អាស៊ាន

សិង្ហបុរី ដែលជាមជ្ឈមណ្ឌលហិរញ្ញវត្ថុដ៏ល្បីល្បាញមួយនៅក្នុងតំបន់ និងលើពិភពលោកកំពុងជួបបញ្ហាការកើនឡើងចំនួនមនុស្សវ័យចំណាស់។ បើយោងតាមរបាយការណ៍ស្ដីពីចំនួនប្រជាជនក្នុងឆ្នាំ២០២៥ របស់រដ្ឋាភិបាលសិង្ហបុរី ប្រជាពលរដ្ឋសិង្ហបុរី ដែលមានអាយុចាប់ពី៦៥ឆ្នាំឡើងទៅបានកើនឡើងជិតដល់២១%នៃចំនួនប្រជាជនសរុបរបស់ប្រទេសដែនកោះមួយនេះ ខណៈកាលពីឆ្នាំមុនមានប្រមាណ២០% ប៉ុណ្ណោះ។ តួលេខនេះមានការកើនឡើងយ៉ាងខ្លាំងក្នុងអត្រាជាង១៣% នៅមួយទសវត្សរ៍ចុងក្រោយនេះ ដែលជំរុញឱ្យគេព្យាករថា ចំនួនមនុស្សចាស់នៅសិង្ហបុរីនឹងឈានដល់ជិត២៤% នៅត្រឹមឆ្នាំ២០៣០។

របាយការណ៍ដដែលនេះបានបង្ហាញទៀតថា ប្រជាជនសិង្ហបុរី ដែលមានអាយុចាប់ពី៨០ឆ្នាំឡើងទៅបានកើនឡើងប្រមាណ៦០% ដោយកើនពីចំនួនជាង៩ម៉ឺននាក់ក្នុងឆ្នាំ២០១៥ ដល់ជាង១៤ម៉ឺននាក់នៅឆ្នាំ២០២៥។ ដោយឡែកចំនួនប្រជាជនដែលមានអាយុចន្លោះពី២០-៦៤ឆ្នាំមានប្រមាណជិត៦០%នៃប្រជាជនសរុប ដោយទាបជាងកាលពីឆ្នាំ២០២៤ ដែលមានជាង៦០%។

ការផ្លាស់ប្តូរប្រជាសាស្រ្តនេះ ត្រូវបានជំរុញដោយសារអត្រាកំណើតទាប។ អត្រានៃការមានកូនសរុបរបស់ប្រជាជនសិង្ហបុរី មានប្រមាណជិត១% ប៉ុណ្ណោះ កាលពីឆ្នាំមុន។ ជាមួយគ្នានេះថៃ បានក្លាយជាប្រទេសទីពីរនៅអាស៊ាន ដែលមានមនុស្សចាស់អាយុចាប់ពី៦៥ឆ្នាំឡើងទៅមានការកើនឡើងខ្លាំង ដោយមានអត្រាប្រមាណ១៥%នៃចំនួនប្រជាជនសរុបក្នុងឆ្នាំ២០២៤ រីឯវៀតណាមជាប់លេខរៀងទី៣ ជាមួយអត្រាកំណើន៩%។

ចំណែកប្រទេសកម្ពុជា ស្ថិតឈរនៅលេខរៀងទី៩ ជាមួយអត្រាកំណើនមនុស្សចាស់ក្នុងរង្វង់៦% ប៉ុន្តែតួលេខនេះត្រូវបានគេរំពឹងថា នឹងកើនឡើងដល់ជាង១៤% នៅត្រឹមឆ្នាំ២០៣២ និងបន្តកើនឡើងដល់២៧% នៅត្រឹមឆ្នាំ២០៥០៕

ដោយ៖ សុខ មង្គល