សិង្ហបុរី និងហុងកុង នាំមុខគេក្នុងការវិនិយោគនៅវៀតណាម នៅ៨ខែ ឆ្នាំនេះ

ទីភ្នាក់ងារវិនិយោគបរទេស (FIA) នៃក្រសួងផែនការ និងវិនិយោគវៀតណាម បានឱ្យដឹងថា នៅក្នុងរយៈពេល៨ខែកន្លងមកនេះ វៀតណាមទទួលបានការវិនិយោគផ្ទាល់ពីបរទេស (FDI) ក្នុងទំហំជិត២១ពាន់លានដុល្លារអាម៉េរិក ពោលគឺកើនឡើង៧% បើធៀបនឹងឆ្នាំមុន។ ក្នុងចំណោមដៃគូវិនិយោគទាំង៩៤ប្រទេស និងដែនដី ប្រទេសសិង្ហបុរី និងហុងកុង បាននាំមុខគេ ដែលបានបោះទុនវិនិយោគនៅវៀតណាម ច្រើនជាងគេ។

​ប្រទេសសិង្ហបុរី បានបោះទុនវិនិយោគជិត៧ពាន់លានដុល្លារ ដែលស្មើនឹងជាង៣៣%នៃការវិនិយោគសរុប ពោលគឺបានកើនឡើងជាង៧៥% បើធៀបនឹងរយៈពេលដូចគ្នាកាលពីឆ្នាំ២០២៣។ ចំណែកទីក្រុងហុងកុង បានបោះទុនវិនិយោគជាង២ពាន់លានដុល្លារ ដែលស្មើនឹងជិត១២%នៃការវិនិយោគសរុប ដោយបានកើនឡើងជិត៤៤%។

ដៃគូវិនិយោគដ៏ធំបំផុតក្នុងរយៈពេល៨ខែ ឆ្នាំនេះសុទ្ធតែមកពីតំបន់អាស៊ី និងជាដៃគូប្រពៃណីរបស់វៀតណាម ហើយប្រទេស និងដែនដីដែលបានបណ្ដាក់ទុនច្រើនជាងគេទាំង៥ រួមមានសិង្ហបុរី ហុងកុង ជប៉ុន ចិនដីគោក និងកូរ៉េខាងត្បូង ដែលមានចំនួនសរុប៧៤% នៃគម្រោង​​វិនិយោគថ្មី និងជាង៧៧% នៃដើមទុនចុះបញ្ជីសរុបរបស់ប្រទេសនេះ៕

អត្ថបទ៖ សុខ មង្គល