សិង្ហបុរី នាំមុខហុងកុង ក្នុងការក្លាយជាមជ្ឈមណ្ឌលគ្រប់គ្រងទ្រព្យសកម្មឌីជីថលនៅអាស៊ី

ទោះបីក្រុងហុងកុង មានការខិតខំ និងពង្រឹងយន្តការក្នុងការប្រកួតប្រជែងយ៉ាងណាក្តី តែសិង្ហបុរី ដែលជាប្រទេសដែនកោះដ៏តូចមួយនៅអាស៊ាន បាននាំមុខក្នុងប្រកួតប្រជែង ដើម្បីក្លាយជាមជ្ឈមណ្ឌលគ្រប់គ្រងទ្រព្យសកម្មឌីជីថលនៅក្នុងតំបន់។ ដើម្បីក្លាយជាមជ្ឈមណ្ឌលគ្រប់គ្រងទ្រព្យសកម្មឌីជីថលនៅក្នុងតំបន់ សិង្ហបុរី និងកោះហុងកុង បានដាក់ចេញយន្តការលើកទឹកចិត្តជាច្រើនរៀងៗខ្លួន ប៉ុន្តែអ្នកវិភាគកត់សម្គាល់ឃើញថា យន្តការរបស់ហុងកុង ដែលស្ថិតក្រោមការគ្រប់គ្រងនយោបាយការបរទេស និងយោធារបស់ទីក្រុងប៉េកាំង ហាក់តឹងរ៉ឹងជាងនៅសិង្ហបុរី។

លោកស្រី អេនជឺឡា អាង (Angela Ang ) ទីប្រឹក្សាគោលនយោបាយជាន់ខ្ពស់នៅក្រុមហ៊ុនប្រឹក្សា TRM Labs បានមានប្រសាសន៍ថា របបបទប្បញ្ញត្តិរបស់ហុងកុងមួយចំនួន ដូចជាការរក្សាទ្រព្យសម្បត្តិអតិថិជន ការចុះបញ្ជី និងគោលនយោបាយគ្រប់គ្រង គឺតឹងរ៉ឹងជាងសិង្ហបុរី។

ដោយឡែក លោក ដេវីដ រ៉ូជ័រ (David Rogers) នាយកប្រតិបត្តិប្រចាំតំបន់នៅក្រុមហ៊ុនគ្រប់គ្រងទីផ្សារ B2C2 ដែលបានដាក់ពាក្យសុំអាជ្ញាបណ្ណនៅប្រទេសសិង្ហបុរី បាននិយាយថា របបរបស់រដ្ឋបាលពិសេសហុងកុង មានទម្រង់គ្រប់គ្រងហានិភ័យខុសពីប្រទេសដទៃ ប៉ុន្តែការគ្រប់គ្រងទ្រព្យសកម្មឌីជីថលនៅក្នុងប្រទេសសិង្ហបុរី ជាជម្រើសប្រកបដោយសុវត្ថិភាពក្នុងរយៈពេលវែង។

មកទល់ពេលនេះចរន្តនៃការទូទាត់ និងធ្វើប្រតិបត្តិការកម្មវិធី blockchain និងការជួញដូររូបិយបណ្ណគ្រីបតូ នៅសិង្ហបុរី មានក្នុងរង្វង់ប្រមាណ៥០០លានដុល្លារ នៅក្នុងមួយឆ្នាំ ខណៈដែលលំហូរនៃការជួញដូរ និងការទូទាត់នៅអាម៉េរិក មានតម្លៃរហូតដល់ទៅ១២០ពាន់លានដុល្លារអាម៉េរិកឯណោះ៕

ដោយៈ សរ សុជាតិ