ប្រទេសសិង្ហបុរី ជាប្រទេសតំបន់អាស៊ីគ្នេយ៍ដំបូងគេ រកឃើញករណីជំងឺអ៊ុតស្វា

ក្រសួងសុខាភិបាលសិង្ហបុរី ​បាននិយាយនៅក្នុងសេចក្តីថ្លែងការណ៍មួយថា អ្នកជំងឺដែល​បានធ្វើតេស្តវិជ្ជមាន​ជំងឺអុតស្វា គឺជាបុរសជនជាតិអង់គ្លេសអាយុ ៤២ ឆ្នាំ ដែលធ្វើការជាអ្នកបម្រើការលើយន្តហោះ ហើយបានហោះហើរចេញចូលក្នុងទឹកដី​សិង្ហបុរីកាលពីពាក់កណ្តាលខែមិថុនា ហើយបុរសនោះ ត្រូវបានគេធ្វើតេស្ដរកឃើញមេរោគនេះ នៅថ្ងៃទី២០ ខែមិថុនា។ ទន្ទឹមនឹងនោះ ក្រសួងសុខាភិបាលសិង្ហបុរី​បាននិយាយថា បច្ចុប្បន្ន បុរស ដែលឆ្លងជំងឺអុតស្វានោះ ស្ថិតក្នុងស្ថានភាពធម្មតា​ដែលកំពុងសម្រាកព្យាបាលនៅមជ្ឈមណ្ឌលជាតិ​សម្រាប់ជំងឺឆ្លង​ក្នុងប្រទេសសិង្ហបុរី។

សេចក្តីថ្លែងការណ៍បានបន្ថែមថា មានមនុស្សប្រមាណ ១៣ នាក់ដែលមានទំនាក់ទំនងជិតស្និទ្ធជាមួយបុរសនោះដែលត្រូវបានកំណត់អត្តសញ្ញាណ​គិតត្រឹមថ្ងៃអង្គារសប្តាហ៍នេះ ហើយអ្នកទាំងអស់នោះនឹងត្រូវដាក់ឱ្យនៅដាច់ដោយឡែក​រយៈពេល ២១ ថ្ងៃ គិតចាប់តាំងពី​ពួកគេមានទំនាក់ទំនងចុងក្រោយ ជាមួយអ្នកជំងឺអ៊ុតស្វានោះ។ ក្នុងនោះ ការតាមដានពីអ្នកមានទំនាក់ទំនងជិតស្និទជាមួយបុរស​មានផ្ទុកជំងឺ​អ៊ុតស្វាម្នាក់នេះ កំពុងបន្តរកបន្ថែម​សម្រាប់​ជើងហោះហើរ ដែលគាត់បានបម្រើការងារ និង រូបគាត់អំឡុងពេល​ស្នាក់នៅ​ក្នុងប្រទេសសិង្ហបុរី។

គួរកត់សម្គាល់ថា ប្រទេសអូស្ត្រាលីកាលពីថ្ងៃទី ២០ ខែ ឧសភា ក៏បានរាយការណ៍ពីករណីឆ្លងជំងឺអុតស្វាដំបូងរបស់ខ្លួនផងដែរ ខណៈមកទល់ពេលនេះប្រទេសនេះបានបញ្ជាក់អ្នកជំងឺអ៊ុតស្វាសរុបប្រមាណ១០នាក់ហើយ។

គួរបញ្ចាក់ថា មកទល់ពេលនេះមានប្រទេសជាង ៣៥ ដែលបាន​រាយការណ៍ពីការរកឃើញឆ្លងជំងឺអ៊ុតស្វា ខណៈករណីដែលបានបញ្ជាក់ឥឡូវនេះមានលើសពី ២ ពាន់ ៥ រយ នាក់ហើយ​នៅទូទាំងពិភពលោក៕