សិង្ហបុរី វ៉ាឈ្នះចិន ក្លាយជាប្រភពវិនិយោគផ្ទាល់ពីបរទេសធំបំផុតនៅប្រទេសថៃ ក្នុងឆ្នាំ២០២៤ កន្លងទៅ

វិស័យឌីជីថល និងវិស័យអេឡិចត្រូនិករបស់ប្រទេសថៃ ទាក់ទាញបានការវិនិយោគក្នុងទំហំទឹកប្រាក់សរុបជាង១៣ពាន់លានដុល្លារអាម៉េរិក ក្នុងឆ្នាំ២០២៤ កន្លងទៅ ដោយរួមបញ្ចូលទាំងការសន្យាបោះទុនវិនិយោគពីសំណាក់ក្រុមហ៊ុនបច្ចេកវិទ្យាខ្នាតយក្សលំដាប់ពិភពលោកដូចជាក្រុមហ៊ុន Google ដើម្បីបង្កើតមជ្ឈមណ្ឌលរក្សាទុកទិន្នន័យនៅក្នុងប្រទេសក្បែរខាងកម្ពុជា មួយនេះផងដែរ។ នេះបើយោងក្រុមប្រឹក្សាវិនិយោគថៃ។

ទិន្នន័យផ្លូវការបានបង្ហាញថា នៅក្នុងឆ្នាំ២០២៤ កន្លងទៅ ប្រទេសថៃ ទាក់ទាញការសន្យាបោះទុនវិនិយោគក្នុងទំហំទឹកប្រាក់សរុបប្រមាណ៣៣ពាន់លានដុល្លារអាម៉េរិក ដោយកើនឡើង៣៥% ដែលជាកម្រិតខ្ពស់បំផុតមិនធ្លាប់មានចាប់តាំងពីឆ្នាំ២០១៤ មក។

លោក ណារីត ធើតស្ទីរ៉ាស៊ុកឌី (Narit Therdsteerasukdi) អគ្គលេខាធិការនៃក្រុមប្រឹក្សាវិនិយោគថៃ បានគូសបញ្ជាក់ថា ការវិនិយោគបានកើនឡើងខ្លាំងដោយសារការវិនិយោគផ្ទាល់ពីបរទេសក្នុងទំហំធំៗនៅក្នុងវិស័យសេវាកម្មឌីជីថល និងវិស័យគ្រឿងអេឡិចត្រូនិក។ ជាមួយគ្នានេះលោកបានព្យាករថា ការ​វិនិយោគនៅក្នុងប្រទេសថៃ នឹងមានសន្ទុះកើនឡើងខ្លាំងនៅឆ្នាំ២០២៥ នេះ។

បើតាមការគូសបញ្ជាក់របស់អគ្គលេខាធិការក្រុមប្រឹក្សាវិនិយោគថៃ រូបនេះ បណ្ដាក្រុមហ៊ុននៅសិង្ហបុរី បានសន្យាបោះទុនវិនិយោគនៅក្នុងប្រទេសថៃ ក្នុងទំហំទឹកប្រាក់សរុបប្រមាណជាង១០ពាន់លានដុល្លារអាម៉េរិក ដែលភាគច្រើនវិនិយោគលើការបង្កើតមជ្ឈមណ្ឌលទិន្នន័យ និងសេវាកម្ម Cloud ដែលមានចំណែកគ្របដណ្ដប់រហូតដល់ទៅ៤៣% នៃការវិយោគផ្ទាល់ពីបរទេសសរុប ដែលក្រុមប្រឹក្សាវិនិយោគថៃ ទទួលបានកាលពីឆ្នាំមុន។ ក្នុងនោះជាង៧ពាន់លានដុល្លារបានមកពីក្រុមហ៊ុនចិន និងជាង១,៣ពាន់លានដុល្លារអាម៉េរិក បានមកពីក្រុមហ៊ុនអាម៉េរិក ដែលប្រភេទវិយោគផ្ទាល់ពីបរទេស (FDI) ទាំងពីរនេះសុទ្ធតែហូរចូលតាមច្រកប្រទេសសិង្ហបុរី៕

ដោយ: តែម សុខុម