សិង្ហបុរីចុះហត្ថលេខាលើកិច្ចព្រមព្រៀងពាណិជ្ជកម្មសេរី ជាមួយបណ្តាប្រទេសសម្ព័ន្ធប៉ាស៊ីហ្វិក

បើយោងតាមការចុះផ្សាយដោយសារព័ត៌មាន CNA រដ្ឋមន្ត្រីក្រសួងពាណិជ្ជកម្ម និងឧស្សាហកម្មសិង្ហបុរី លោក Gan Kim Yong និងសមភាគីរបស់លោកមកពីរដ្ឋចំនួន៤ជាសមាជិកនៃប្រទេសម្ព័ន្ធប៉ាស៊ីហ្វិករួមមាន ប្រទេសឈីលី កូឡុំប៊ី ម៉ិកស៊ិក និងប៉េរូបានចុះហត្ថលេខាលើកិច្ចព្រមព្រៀងពាណិជ្ជកម្មសេរី ក៏ដូចជាមានចេញសេចក្តីប្រកាសរួមគ្នានៅឯកិច្ចប្រជុំកំពូលសម្ព័ន្ធប៉ាស៊ីហ្វិកលើកទី ១៦ នៅប្រទេសកូឡុំប៊ីផងដែរ។

កិច្ចព្រមព្រៀងនេះ ត្រូវបានសិង្ហបុរីចាត់ទុកថា គឺជាកិច្ចព្រមព្រៀង "ទំនើប និងទូលំទូលាយ" ដែលបំពេញបន្ថែមលើបណ្តាញកិច្ចព្រមព្រៀងពាណិជ្ជកម្មសេរីរបស់ប្រទេសសិង្ហបុរី និងជំរុញបន្ថែមលើកិច្ចព្រមព្រៀងដែលមានស្រាប់រវាងប្រទេសសិង្ហបុរីមានជាមួយបណ្តាប្រទេសសម្ព័ន្ធប៉ាស៊ីហ្វិក។

កិច្ចព្រមព្រៀងពាណិជ្ជកម្មសេរីប្រទេសសម្ព័ន្ធប៉ាស៊ីហ្វិក និងសិង្ហបុរី នឹងអាចឱ្យក្រុមហ៊ុនសិង្ហបុរីទទួលបានទីផ្សារកាន់តែច្រើនទៅក្នុងប្រទេសសម្ព័ន្ធប៉ាស៊ីហ្វិក តាមរយៈការកាត់បន្ថយការចំណាយលើការនាំចេញរបស់ពួកគេ ដូច្នេះទំនិញ និងសេវាកម្មរបស់ពួកគេអាចមានតម្លៃប្រកួតប្រជែងជាងមុន។

ទន្ទឹមនេះ ក្រសួងពាណិជ្ជកម្ម និងឧស្សាហកម្មសិង្ហបុរី បាននិយាយថា កិច្ចព្រមព្រៀងនេះនឹងអនុញ្ញាតឱ្យសិង្ហបុរី និងសម្ព័ន្ធប៉ាស៊ីហ្វិកស្វែងរកកិច្ចសហប្រតិបត្តិការសេដ្ឋកិច្ចក្នុងវិស័យដែលមានផលប្រយោជន៍ទៅវិញទៅមក ដូចជាសេដ្ឋកិច្ចឌីជីថល ភស្តុភារ និងហេដ្ឋារចនាសម្ព័ន្ធ ក៏ដូចជាពាណិជ្ជកម្មម្ហូបអាហារផងដែរ។

បច្ចុប្បន្ននេះ ក្រុមហ៊ុនសិង្ហបុរីជាង ១០០ ក្នុងវិស័យចម្រុះ ដែលរួមមានពាណិជ្ជកម្ម បច្ចេកវិទ្យា ការច្នៃប្រឌិត ព្រមទាំងហេដ្ឋារចនាសម្ព័ន្ធ បាននិងកំពុងធ្វើអាជីវកម្មនៅក្នុងបណ្តាប្រទេសសម្ព័ន្ធប៉ាស៊ីហ្វិក។ សូមជម្រាបថា សម្ព័ន្ធប៉ាស៊ីហ្វិក ជាប្លុកសេដ្ឋកិច្ចធំជាងគេទី ៨ នៅទូទាំងពិភពលោក ដែលផលិតផលក្នុងស្រុកសរុបរបស់សម្ព័ន្ធប៉ាស៊ីហ្វិកទាំង ៤ ប្រទេសមានជាង ២ ទ្រីលានដុល្លារអាមេរិក។

យ៉ាងណាមិញ បន្ទាប់ពីចុះហត្ថលេខាហើយ បណ្តាប្រទេសទាំងនេះនឹងធ្វើការលើដំណើរការផ្តល់សច្ចាប័នរៀងៗខ្លួន ដើម្បីនាំយកកិច្ចព្រមព្រៀងនេះចូលជាធរមាន។ កិច្ចព្រមព្រៀងពាណិជ្ជកម្មសេរីនឹងចូលជាធរមានបន្ទាប់ពីប្រទេសសិង្ហបុរី និងប្រទេសសមាជិកសម្ព័ន្ធប៉ាស៊ីហ្វិកចំនួនពីរទៀត បានផ្តល់សច្ចាប័នលើកិច្ចព្រមព្រៀងនេះ៕

អត្ថបទ ស៊ើង និមល់