ការប្រកាសផ្ដល់ជំនួយរបស់ចិននេះ ធ្វើឡើងនៅក្នុងឱកាសដែលប្រធានាធិបតីចិន លោក ស៊ី ជីនពីង បានជួបជាមួយមេដឹកនាំរបស់ប្រទេសតំបន់អាស៊ីកណ្តាល ដើម្បីប្រារព្ធខួបលើកទី ៣០ នៃការបង្កើតទំនាក់ទំនងការទូតរវាងភាគីទាំងពីរ។ នេះបើយោងតាមការចុះផ្សាយដោយសារព័ត៌មាន Nikkei Asia។
នៅក្នុងឱកាសប្រារព្ធខួបលើកទី ៣០ នៃការបង្កើតទំនាក់ទំនងការទូតរវាងចិន និងអាស៊ីកណ្ដាល លោក ស៊ី ជិនពីង ប្រធានាធិបតីចិនបានប្រាប់មេដឹកនាំប្រទេសអាស៊ីកណ្តាលថា ប្រទេសចិននឹងគាំទ្រពួកគេយ៉ាងមុតមាំក្នុងការ ការពារអធិបតេយ្យភាព ឯករាជ្យភាព និងបូរណភាពទឹកដី។
ការលើកឡើងបែបនេះ ត្រូវបានគេមើលឃើញថា ទំនងជាលោក ស៊ី ជីនពីង ចងព្រមានទៅដល់គំនិតដែលចង់ឲ្យសហភាពសូវៀតរស់ឡើងវិញ ខណៈដែលបច្ចុប្បន្នរុស្ស៊ីក៏កំពុងមានឥទ្ធិពលខ្លាំងនៅតំបន់នេះផងដែរ។
សូមជម្រាបថា ក្នុងចំណោមប្រទេសអាស៊ីកណ្ដាលទាំង ៥ នេះ ប្រទេសអាទិភាពកំពូលដែលចិនកំពុងពង្រីកទំនាក់ទំនងកាន់តែខ្លាំងនោះ គឺកាហ្សាក់ស្ថាន ដែលជាប្រទេសសម្បូរទៅដោយធនធាន ហើយក៏ជាប្រទេសជិតខាងដ៏ធំបំផុតរបស់ខ្លួនផងដែរ។
អត្ថបទគួរអាន
គួររំឭកថា កាលពីពេលថ្មីៗនេះ ប្រទេសកាហ្សាក់ស្ថាន បានជួបនូវភាពចលាចល និងមានបាតុកម្មហឹង្សានៅក្នុងប្រទេស ទាក់ទិននឹងការកើនឡើងតម្លៃប្រេងឥន្ធនៈ។ ការវាយលុកហឹង្សាពីពលរដ្ឋក្នុងប្រទេសនេះ បានបង្ហាញពីការព្រួយបារម្ភរបស់ទីក្រុងប៉េកាំងអំពីការដើរក្រោយទីក្រុងម៉ូស្គូក្នុងការអន្តរាគមន៍នឹងភាពចលាចលនេះផងដែរ ខណៈរុស្ស៊ីហាក់មានមុខមុនគេក្នុងការអន្តរគមន៍លើភាពចលាចលទាំងនេះនាពេលកន្លងមក តាមរយៈការស្នើរសុំពីសំណាក់ប្រធានាធិបតីកាហ្សាក់ស្ថានឱ្យរុស្ស៊ីដាក់កងទ័ពនៅក្នុងប្រទេសរបស់ខ្លួន។
ទោះយ៉ាងណាក៏ដោយចុះ អ្នកនាំពាក្យក្រសួងការបរទេសចិនឯណោះវិញ លោក Zhao Lijian បាននិយាយកាលពីសប្តាហ៍មុនថា ទីក្រុងប៉េកាំងក៏នឹងផ្តល់ជំនួយអស់ពីសមត្ថភាពរបស់ខ្លួនទៅតាមឆន្ទៈរបស់កាហ្សាក់ស្ថានដូចគ្នាផងដែរ ។
ប្រទេសចិនបានធានាស្ថិរភាពក្នុងប្រទេសកាហ្សាក់ស្ថានជាអាទិភាពមួយ បូកទាំងរួមហេតុផលសេដ្ឋកិច្ច និងដើម្បីទប់ស្កាត់ពួកជ្រុលនិយមឥស្លាមដែលរស់នៅតំបន់តាមព្រំដែនមិនឱ្យឆ្លងកាត់ព្រំដែនចូលទៅក្នុងតំបន់ស៊ីនជាំងនោះឡើយ។ គួរជម្រាបថា ការវិនិយោគរបស់ចិននៅកាហ្សាក់ស្ថានមានចំនួនសរុបជិត ៣០ ពាន់លានដុល្លាររហូតដល់ដំណាច់ឆ្នាំ ២០១៩ ហើយក្រុមហ៊ុនចិនជាង ១ពាន់ កំពុងមានប្រតិបត្តិការនៅទីនោះ៕អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
