នាយករដ្ឋមន្ត្រីសិង្ហបុរី ព្រួយបារម្ភពីការកើនឡើងជម្លោះពាណិជ្ជកម្ម ក្រោយលោក ត្រាំ វិលមកកាន់សេតវិមានជាថ្មី

ស្របពេលពិភពលោកកំពុងរង់ចាំការចូលកាន់តំណែងជាប្រធានាធិបតីអាម៉េរិករបស់លោក ដូណាល់ ត្រាំ នៅខែមករា ឆ្នាំ២០២៥ ខាងមុខ នាយករដ្ឋមន្ត្រីសិង្ហបុរី លោក ឡរ៉េន វង្ស បានសម្ដែងការព្រួយបារម្ភអំពីការកើនឡើងនៃជម្លោះពាណិជ្ជកម្ម បន្ទាប់ពីលោក ត្រាំ បានគំរាមកំហែងយកបញ្ហាពន្ធបន្តលើកកម្ពស់គោលនយោបាយអាម៉េរិក តាមរយៈការព្រមានយកពន្ធសព្វសារពើលើទំនិញ ដែលនាំចូលទៅកាន់ទីផ្សារសហរដ្ឋអាម៉េរិក។ នាយករដ្ឋមន្ត្រីរូបនេះជឿជាក់ថា សេដ្ឋកិច្ច និងការធ្វើពាណិជ្ជកម្មរបស់សិង្ហបុរី ចង់ ឬមិនចង់ នឹងរងឥទ្ធិពលអវិជ្ជមានណាមួយពីការសម្រេចរបស់លោក ត្រាំ។ ការបង្ហាញក្តីព្រួយបារម្ភបែបនេះ ក៏ដោយសារសេដ្ឋកិច្ចរបស់សិង្ហបុរី ពឹងផ្អែកខ្លាំងលើការនាំចូល ដោយការនាំចូលមានទំហំរហូតដល់៣ដង នៃ GDP របស់សិង្ហបុរី។

លោក ដូណាល់ ត្រាំ ដែលទើបទទួលបានជ័យជម្នះក្នុងការបោះឆ្នោតជ្រើសរើសប្រធានាធិបតី កាលពីដើមសប្តាហ៍មុនបានព្រមាននឹងបញ្ចេញការកំណត់ពន្ធថ្មីប្រមាណ២០% លើទំនិញបរទេសទាំងអស់ ហើយចិន ត្រូវបានគេរំពឹងថា នឹងទទួលរងសម្ពាធពន្ធធ្ងន់ធ្ងរជាងគេរហូតដល់៦០%។

ឆ្លើយតបនឹងបញ្ហាកំណត់ពន្ធនេះ លោក ឡរ៉េន វង្ស បាននិយាយថា ការផ្លាស់ប្តូរណាមួយដែលអាចបង្កើនថ្លៃដើម ឬកំណើនយឺតនៅបរទេសនឹងក្លាយជាបញ្ហាសម្រាប់សិង្ហបុរី ដោយសារបច្ចុប្បន្នរដ្ឋាភិបាល កំពុងព្យាយាមទប់ទល់នឹងការកើនឡើងថ្លៃចំណាយលើជីវភាពរបស់ពលរដ្ឋ។ លោក វង្ស ដែលបានចូលកាន់តំណែងកាលពីខែឧសភា កំពុងតែព្យាយាមបញ្ចុះបញ្ចូលអ្នកបោះឆ្នោតថា គណបក្សសកម្មភាពប្រជាជនដែលកំពុងកាន់អំណាចមានរឿងក្នុងដៃជាច្រើនដែលត្រូវដោះស្រាយ ខណៈសិង្ហបុរីត្រៀមរៀបចំការបោះឆ្នោតនៅខែវិច្ឆិកា ឆ្នាំ២០២៥ ខាងមុខ។

នាយករដ្ឋមន្ត្រីសិង្ហបុរី រូបនេះ បានលើកឡើងថា ប្រសិនបើជម្លោះពាណិជ្ជកម្មរវាងប្រទេសមហាអំណាចនៅតែបន្តកើតឡើង គួរត្រូវបានដោះស្រាយតាមរយៈស្ថាប័នពហុភាគី ដូចជាអង្គការពាណិជ្ជកម្មពិភពលោក ជាដើម។ អង្គការពាណិជ្ជកម្មពិភពលោក បានអះអាងថា ទំហំពាណិជ្ជកម្មពេញមួយពិភពលោកកាលពីឆ្នាំ២០២៣ មានតម្លៃប្រមាណជា៣០,៥ទ្រីលានដុល្លារ៕

ដោយ៖ សរ សុជាតិ