លោក ជា សុភ័ក្ដ អគ្គនាយកធនាគារសហគ្រាសធុនតូច និងមធ្យម យល់ឃើញថា ការធ្វើពហិការរបស់ពលរដ្ឋខ្មែរលើទំនិញរបស់ថៃ នឹងបង្កើតបាននូវកាលានុវត្តភាពដល់វិស័យសហគ្រាសធុនតូច និងមធ្យម ដើម្បីជំនួសទំនិញរបស់ថៃ នៅលើទីផ្សារកម្ពុជា។ បន្ថែមលើនេះ វានឹងចូលរួមចំណែកបង្កើតការងារ បង្កើនប្រាក់ចំណូល និងធ្វើឱ្យចរន្តសេដ្ឋកិច្ចជាតិ មានស្ថិរភាពតាមរយៈការប្រមូលចំណូលរបស់ពន្ធដារ។ បើតាមអ្នកជំនាញរូបនេះនៅក្នុងស្ថានភាពបច្ចុប្បន្ននេះ គឺជាឱកាសដ៏កម្រសម្រាប់ការពង្រីកផលិតកម្មរបស់សហគ្រាសធុនតូច និងមធ្យមក្នុងការដណ្តើមចំណែកទីផ្សារ។ ហើយវាក៏ជាឱកាសមួយក្នុងការទាក់ទាញអ្នកវិនិយោគបរទេសឱ្យមកបោះទុននៅកម្ពុជា ផងដែរ។
បើតាមអគ្គនាយកធនាគារសហគ្រាសធុនតូច និងមធ្យម មកដល់ពេលនេះ ធនាគារ SME កំពុងជំរុញដល់សហគ្រាសធុនតូច និងមធ្យមក្នុងការបង្កើនលទ្ធភាព ដើម្បីទទួលបានឥណទានក្នុងអត្រាការប្រាក់សមរម្យសម្រាប់យកទៅប្រើប្រាស់ពង្រីកផលិតកម្ម និងការកែច្នៃ។ ទន្ទឹមនេះថ្នាក់ដឹកនាំរូបនេះអះអាងថា ធនាគារ SME កំពុងពិនិត្យលើលក្ខខណ្ឌបន្ធូរបន្ថយមួយចំនួន ដើម្បីបង្កើនប្រសិទ្ធភាពតាមគោលនយោបាយរបស់រាជរដ្ឋាភិបាលកម្ពុជា។
បើតាមការគូសបញ្ជាក់របស់លោក ជា សុភ័ក្ដ នៅឆ្នាំ២០២៥ នេះ ធនាគារសហគ្រាសធុនតូច និងមធ្យមគ្រោងបញ្ចេញឥណទានប្រមាណ៦០លានដុល្លារដល់វិស័យ SME ខណៈនៅក្នុងឆ្នាំ២០២៦ ត្រូវបានរំពឹងថា ការបញ្ចេញឥណទាននឹងអាចកើនឡើងបន្ថែមទៀត៕
អត្ថបទ៖ បូ ដូឡា
