តាមសេចក្តីជូនដំណឹងរបស់ក្រសួងសាធារណការ និងដឹកជញ្ជូន នាថ្ងៃទី២១ ខែកក្កដា ឆ្នាំ២០២៣ បានឱ្យដឹងថា យោងតាមលិខិតរបស់ក្រសួងសេដ្ឋកិច្ច និងហិរញ្ញវត្ថុ ស្តីពីការអនុញ្ញាត ឱ្យក្រសួងសាធារណការ និងដឹកជញ្ជូន យកកម្រៃសេវាសាធារណៈលើការបញ្ជូលថាមពលយានយន្តអគ្គិសនីជាបណ្តោះអាសន្ន ដើម្បីធ្វើជាមូលដ្ឋានក្នុងការកំណត់តម្លៃជាក់លាក់លើការធ្វើអាជីវកម្មស្ថានីយបញ្ចូលថាមពលអគ្គិសនីរវាងប្រតិបត្តិករ និងអ្នកប្រើប្រាស់ទាំងអស់ឱ្យមានគណនេយ្យភាព ប្រសិទ្ធភាព ប្រកបដោយនិរន្តភាព។ ដោយក្រសួងសាធារណការ និងដឹកជញ្ជូន បញ្ជាក់ថា ចាប់ពីថ្ងៃទី០១ ខែសីហា ឆ្នាំ២០២៣ តទៅ រាល់ការប្រើប្រាស់ស្ថានីយបញ្ចូលថាមពលយានយន្តអគ្គិសនី ស្ថិតក្រោមការគ្រប់គ្រង និងផ្តល់សេវារបស់ក្រសួងសាធារណការ និងដឹកជញ្ជូន នឹងត្រូវគិតតម្លៃ ១.៦០០រៀលក្នុង១គីឡូវ៉ាត់ម៉ោង។
ក្រោយពីទទួលបានឃើញការផុសផ្សព្វផ្សាយអំពីការជូនដំណឹងនេះ នៅលើបណ្ដាញសង្គម មានពលរដ្ឋមួយចំនួន បានលើកឡើងថា តម្លៃ ១.៦០០រៀលក្នុង១គីឡូវ៉ាត់ម៉ោងលើសេវាបញ្ចូលថាមពលយានយន្តអគ្គិសនីនេះ គឺហាក់មានតម្លៃខ្ពស់ខ្លាំងសម្រាប់ពួកគាត់ក្នុងការប្រើប្រាស់ ដោយពួកគាត់សង្ឃឹមថា រាជរដ្ឋាភិបាលតាមរយៈក្រសួងជំនាញ នឹងពិចារណាត្រង់ចំណុចនេះ ដោយយកចិត្តទុកដាក់ ក៏ដូចជាកំណត់តម្លៃនេះឡើងវិញឱ្យបានសមរម្យផងដែរ ដើ្បម្បីលើកទឹកចិត្តដល់អ្នកប្រើប្រាស់យានយន្តអគ្គីសនី និងចូលរួមក្នុងការថែរក្សាបរិស្ថានផងដែរ។
អត្ថបទគួរអាន
ជុំវិញបញ្ហានេះ បើតាមការឱ្យដឹងពីមន្ត្រីក្រសួងសាធារណការ និងដឹកជញ្ជូន ក្រសួងពាក់ព័ន្ធនឹងពិនិត្យលទ្ធភាព ក៏ដូចជាធ្វើការបូកសរុបនូវមតិយោបល់របស់ប្រជាពលរដ្ឋ និងថ្លឹងថ្លែងជាមួយថ្លៃដើមចំណាយផ្សេងៗទៀត ដើម្បីឈានដល់ការកំណត់តម្លៃសេវាផ្តល់ជូនមួយ ដែលមានលក្ខណៈសមស្របជូនដល់ប្រជាពលរដ្ឋក្នុងការប្រើប្រាស់ការបញ្ចូលថាមពលយានយន្តអគ្គិសនីនេះផងដែរ។
បើតាម ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន កាលពីពេលថ្មីនេះ បានឱ្យដឹងថា ការចុះបញ្ជីយានយន្តអគ្គិសនីនៅកម្ពុជាមានកើនឡើងយ៉ាងគំហុកពីមួយឆ្នាំទៅមួយ។ ជាក់ស្តែង គិតមកទល់ពេលនេះ មានយានយន្តអគ្គិសនីចំនួន ៩៨៩ គ្រឿងត្រូវបានចុះបញ្ជីនៅក្រសួងសាធារណការ និងដឹកជញ្ជូន ដែលជាតួលេខមួយខ្ពស់បើធៀបនឹងឆ្នាំ២០២២ ដែលមានចុះបញ្ជីតែជាង ៦០០គ្រឿង និងឆ្នាំ២០២១ មានតែ៦៣គ្រឿងប៉ុណ្ណោះ។ ដើម្បីជំរុញកំណើនអ្នកប្រើប្រាស់យានយន្តអគ្គសនីនៅកម្ពុជាឲ្យកាន់តែច្រើនបន្ថែមទៀត ក្រសួងសាធារណការ និងដឹកជញ្ជូនបាននិងកំពុងស្វះស្វែងរកដៃគូសហការ ដើម្បីសាងសង់ស្ថានីយសាកអាគុយរថយន្តអគ្គិសនីនៅតាមបណ្តាខេត្តនានាផងដែរ ហើយមកទល់បច្ចុប្បន្នមានស្ថានីយសាកអាគុយរថយន្តអគ្គិសនីចំនួន១៨កន្លែងហើយ នៅទូទាំងប្រទេសកម្ពុជា៕
