រៀងរាល់ពិធីបុណ្យចូលឆ្នាំថ្មីប្រពៃណីខ្មែរម្តងៗ យើងសង្កេតឃើញប្រជាជនខ្មែរតែងតែនិយមនាំគ្នាយកគោមផ្កាយមកដាក់តាំងតុបតែងលម្អនៅតាមផ្ទះសម្បែង ហាង បុរី ក្រសួង-ស្ថាប័នរដ្ឋ ក៏ដូចនៅតាមវត្តអារាមនានា ដើម្បីបង្កើនសោភ័ណ្ឌភាពឱ្យកាន់តែស្រស់ស្អាតសម្រាប់ត្រៀមទទួលទេវតាឆ្នាំថ្មី។ កត្តានេះ បានជំរុញឱ្យទីផ្សារគោមផ្កាយ ទទួលបានការគាំទ្រ និងបញ្ជាទិញច្រើនពីប្រជាពលរដ្ឋខ្មែរនៅឆ្នាំនេះ។
លោក ជុំ ប៊ុនលី ម្ចាស់ហាងលក់ និងធ្វើគោមផ្កាយនៅមុខវត្តនិរោធរង្សី ខណ្ឌច្បារអំពៅ រាជធានីភ្នំពេញបានអះអាងថា គោមផ្កាយនៅឆ្នាំនេះហាក់ទទួលបានការគាំទ្រ និងពេញនិយមច្រើនពីប្រជាពលរដ្ឋខ្មែរ បន្ទាប់ពីពួកគេមានការយល់ដឹងកាន់តែច្រើនអំពីវប្បធម៌ ប្រពៃណីខ្មែរ គួបផ្សំស្ថានភាពសេដ្ឋកិច្ចមានភាពល្អប្រសើរឡើងវិញ។ កត្តានេះបានជំរុញឱ្យការលក់គោមរបស់លោកនៅឆ្នាំនេះហាក់ដាច់ច្រើនជាងឆ្នាំមុនៗ ទាំងការលក់បោះដុំ និងលក់រាយ។
ក្រោយសម្ទុះគាំទ្រពីសំណាក់អតិថិជនទាំងបោះដុំ និងលក់រាយមានការកើនឡើងពីមួយឆ្នាំទៅមួយឆ្នាំ បានជំរុញឱ្យលោក ជុំ ប៊ុនលី ត្រូវធ្វើគោមផ្កាយត្រៀមទុកសម្រាប់លក់ជាបណ្តើរៗតាំងពី៤ខែមុនថ្ងៃចូលឆ្នាំខ្មែរមកដល់។ តួយ៉ាងនៅឆ្នាំនេះ លោក បានត្រៀមគោមផ្កាយប្រមាណ២ពាន់ ខណៈមកទល់ពេលនេះលោកលក់បានជាង១ពាន់គោមហើយ។
អត្ថបទគួរអាន
បើតាមអាជីវកររូបនេះ គោមផ្កាយមានច្រើនទំហំ និងច្រើនប្រភេទរួមមានគោមផ្កាយធ្វើពីក្រមា ហូល ក្រណាត់ចម្រុះពណ៌ និងថង់កញ្ចក់ជាដើម។ យ៉ាងណាមិញ គោម គោលផ្កាយដែលទទួលបានការគាំទ្រច្រើនជាងគេ គឺប្រភេទគោមផ្កាយធ្វើពីក្រមា ឬក្រណាត់ចម្រុះព៌ណ និងជាពិសេសគោមមានរូបទង់ជាតិខ្មែរ ដែលជាផលិតផលថ្មីមួយដែលលោកទើបតែធ្វើលក់សម្រាប់ឆ្នាំនេះ។ រីឯតម្លៃគោមវិញមានចាប់ពី៧ពាន់រៀលដល់៨ម៉ឺនរៀលក្នុងមួយគោមទៅតាមទំហំ និងប្រភេទនីមួយៗ។
បើតាមលោក ជុំ ប៊ុនលី ការនិយមប្រើប្រាស់គោមផ្កាយសម្រាប់តាំងលម្អនាពិធីបុណ្យចូលឆ្នាំថ្មីប្រពៃណីខ្មែរ គឺមានតាំងពីយូរណាស់មកហើយ ព្រោះការតាំងគោមផ្កាយមិនត្រឹមតែផ្តល់នូវភាពស្រស់ស្អាត និងមានសិរីសួស្តីប៉ុណ្ណោះទេ ថែមទាំងបានបង្ហាញពីវប្បធម៌ ប្រពៃណី និងអត្តសញ្ញាតជាតិខ្មែរផងដែរ។ ទន្ទឹមនេះ លោកប្តេជ្ញាថា លោកនឹងបន្តថែរក្សានូវស្នាដៃដែលជាអត្តសញ្ញាតជាតិខ្មែរនេះតកូនតចៅបន្តទៀត ខណៈរបរធ្វើគោមនេះមិនត្រឹមតែជួយរក្សានូវអត្តសញ្ញាតជាតិប៉ុណ្ណោះទេ វាក៏បានចូលរួមចំណែកជួយគាំទ្រដល់ការប្រើប្រាស់ផលិតផលនៅក្នុងស្រុក និងជួយបង្កើនចំណូលក្នុងគ្រួសារផងដែរ។ គួរបញ្ជាក់ថា ពិធិបុណ្យចូលឆ្នាំថ្មីប្រពៃណីខ្មែរឆ្នាំនេះនឹងប្រព្រឹត្តទៅចាប់ថ្ងៃទី១៣-១៦ ខែមេសា ឆ្នាំ២០២៤។
None
