ដោយសារតែលក់បញ្ចុះតម្លៃយ៉ាងច្រើន ឬ លក់ទាំងខាតដើម ចំនួនដំបូងនៃអាផាតមិន ៩០៦យូនីត ក្នុងគម្រោងលំនៅឋាន ខាល់លីណាន ស្កាយ (Cullinan Sky) របស់ក្រុមហ៊ុន ស៊ុន ហុង ខៃ ប្រូភើធី (Sun Hung Kai Properties) នៅទីក្រុងហុងកុង លក់ដាច់អស់ភ្លាមៗនៅថ្ងៃប្រកាសលក់ ដែលបានបង្កការភ្ញាក់ផ្អើល និងត្រូវបានសារព័ត៌មានចុះផ្សាយព្រោងព្រាត។
អាផាតមិនមួយយូនីតមាន២បន្ទប់គេងទំហំ៦០ម៉ែត្រការ៉េ នៅជាន់ទី៣៥ លក់ក្នុងតម្លៃប្រមាណ២លានដុល្លារអាម៉េរិក។ ដ្បិតតម្លៃនេះប្រហាក់ប្រហែលនឹងតម្លៃអាផាតមិននៅទីក្រុងតូក្យូ ប្រទេសជប៉ុន ប៉ុន្តែតម្លៃនេះ គឺថោកណាស់នៅទីក្រុងហុងកុង ដែលជាទីផ្សារលំនៅឋានថ្លៃបំផុតមួយរបស់ពិភពលោក បន្ទាប់ពីប្រទេសម៉ូណាកូ។
ចំណុចផ្ទុះការចាប់អារម្មណ៍លើគម្រោងលំនៅឋាន ខាល់លីណាន ស្កាយ (Cullinan Sky) គឺដោយសារមានសេចក្ដីរាយការណ៍ព័ត៌មានថា ក្រុមហ៊ុន ស៊ុន ហុង ខៃ ប្រូភើធី (Sun Hung Kai Properties) កំពុងលក់អាផាតមិនរបស់ខ្លួនក្នុងតម្លៃខាតដើម។
សូមបញ្ជាក់ថា គម្រោងលំនៅឋាន ខាល់លីណាន ស្កាយ (Cullinan Sky) គឺជាផ្នែកមួយនៃគម្រោងអភិវឌ្ឍន៍ឡើងវិញដ៏ធំសម្បើមមួយនៅអតីតទីតាំងអាកាសយានដ្ឋាន ខៃ តាក់ (Kai Tak) ដែលគេរំពឹងថានឹងសាងសង់ផ្ទះបន្ថែមចំនួន៣ម៉ឺនយូនីតដល់ទីផ្សារហុងកុង។
មួយចំនួនធំនៃអាផាតមិនទាំងនេះកំពុងត្រូវបានប្រកាសលក់ក្នុងតម្លៃបញ្ចុះតម្លៃយ៉ាងច្រើន ដោយភ្នាក់ងារលក់អចលនទ្រព្យម្នាក់បានអះអាងថា អតិថិជនអាចទិញអាផាតមិនទាំងនេះក្នុងតម្លៃថោកជាង ៥ឆ្នាំមុនដល់ទៅជាង៤០%ឯណោះ៕
ដោយ: តែម សុខុម
