បើតាមរដ្ឋមន្ត្រីហិរញ្ញវត្ថុថៃ ធនាគារកណ្ដាលថៃថ្មីៗនេះ ទើបតែបានណែនាំឲ្យមានការផ្អាកការសង់ប្រាក់ដើម និងការប្រាក់សម្រាប់បុគ្គលក៏ដូចជាអាជីវកម្មរងគ្រោះ សម្រាប់រយៈពេល២ខែ ប៉ុន្ដែ ក្នុងកាលៈទេសៈដ៏លំបាកនេះ ខាងធនាគារគួរតែបន្ដពន្យារពេលសងបំណុលនេះឲ្យវែងជាងនេះទៀត ដើម្បីជួយឲ្យអាជីវកម្មទាំងនោះ អាចបន្ដដង្ហើមរស់បានទៅមុខទៀត។
ត្រូវបានស្រង់សម្ដីដោយសារព័ត៌មានបាងកកប៉ុស្ដិ៍លោក អាឃុម ធើមភីតថាយ៉ា ផៃសិត (Arkhom Termpittayapaisith) រដ្ឋមន្ត្រីក្រសួងហិរញ្ញវត្ថុថៃ និយាយថា ដោយសារតែសេដ្ឋកិច្ចថៃ ត្រូវបានរំពឹងថា នឹងមិនអាចងើបឡើងវិញលឿននោះទេ ដូច្នេះ គ្រឹះស្ថានធនាគារ និងអ្នកផ្ដល់ប្រាក់កម្ចី ត្រូវបន្ដតាមដានស្ថានការណ៍នេះ ហើយពិចារណាពន្យារពេលសងបំណុលឲ្យបានវែងជាងមុន គឺវែងជាងរយៈពេល២ខែ ដែលទើបតែបានដាក់ចេញនាពេលថ្មីៗនេះ។
អត្ថបទទាក់ទង!
ធនាគារកណ្ដាលថៃ ដោយមានកិច្ចសហប្រតិបត្តិការណ៍ជាមួយនឹងសមាគមធនាគារថៃ និងសមាគមធនាគារអន្តរជាតិ នៅថ្ងៃព្រហស្បតិ៍សប្ដាហ៍មុន បានណែនាំនូវវិធានការពន្យារពេលសងប្រាក់ដើម និងការប្រាក់រយៈពេល២ខែ សម្រាប់បុគ្គល និងសហគ្រាសខ្នាតតូច និងមធ្យម ដែលរងផលប៉ះពាល់ ដោយសារតែវិធនាការបិទខ្ទប់ចុងក្រោយរបស់រដ្ឋាភិបាល ដែលបានអនុវត្តចំពោះខេត្តចំនួន១០ ដើម្បីប្រយុទ្ធប្រឆាំងនឹងមេរោគរាតត្បាត។
វិធានការពន្យារពេលសងបំណុលដែលធនាគារកណ្ដាលបានដាក់ចេញនេះ គឺមានគោលដៅជួយចំពោះនិយោជិត និងនិយោជកនៅទូទាំងប្រទេស ដែលមានការបិទអាជីវកម្មបណ្ដោះអាសន្ន ដោយសារតែវិធានការបិទខ្ទប់របស់អាជ្ញាធរ។ ការពន្យារពេលសងបំណុលនឹងចាប់ផ្ដើមពីខែកក្កដាតទៅ។
វិធានការតឹងរ៉ឹង រួមទាំងបម្រាមគោចរ ត្រូវបានដាក់នៅក្នុងទីក្រុងបាងកក និងខេត្តជាប់នោះចំនួន៥ រយៈពេល២សប្ដាហ៍ គិតចាប់តាំងពីថ្ងៃចន្ទសប្ដាហ៍មុនមកម្ល៉េះ ខណៈដែលរដ្ឋាភិបាលថៃកំពុងញាប់ដៃញាប់ជើងមែនទែនក្នុងការទប់ស្កាត់ការឆ្លងរីករាលដាលដែលបានហក់ឡើងខ្ពស់បំផុតដល់ទៅជាង១ម៉ឺននាក់នៅក្នុងមួយថ្ងៃ។
មន្ត្រីជាន់ខ្ពស់រដ្ឋាភិបាលថៃ អះអាងថា រដ្ឋាភិបាលថៃពេលនេះកំពុងផ្ដោតលើការលើកម្ពស់សេដ្ឋកិច្ចជីវសាស្ត្របែបវិលជុំ និងសេដ្ឋកិច្ចបៃតង (bio-circular and green economy) ដើម្បីធានាបាននូវការងើបឡើងប្រកបដោយចីរភាព។
អគ្គនាយកការិយាល័យគោលនយោបាយសារពើពន្ធរបស់ថៃ បាននិយាយថា រដ្ឋាភិបាលបានប៉ាន់ប្រមាណថា វិធានការសង្គ្រោះរបស់ខ្លួន ដែលបានដាក់ចេញកាលពីខែឧសភា អាចនឹងបង្កើតបានលំហូរសាច់ប្រាក់ប្រមាណជាង ១២ពាន់លានដុល្លារ នៅក្នុងឆមាសទី២ឆ្នាំនេះ។ ទោះយ៉ាងណាលំហូរសាច់ប្រាក់នេះ នឹងអាចមានប្រហែលតែពាក់កណ្ដាលនៃគោលដៅប៉ុណ្ណោះ ដោយសារតែមានវិធានការបិទខ្ទប់ចុងក្រោយនេះ។
យោងតាមច្បាប់ហិរញ្ញវត្ថុរបស់ថៃ រដ្ឋាភិបាលថៃមានកំណត់ប្រាក់កម្ចីសម្រាប់ប្រើប្រាស់បន្ទាន់ប្រមាណ៣០ពាន់លានដុល្លារ និងមានប្រាក់កម្ចីបន្ទាន់មួយផ្សេងទៀតប្រមាណជាង ១៥ពាន់លានដុល្លារ រួមជាមួយនឹងថវិកាចំណាយដែលមានស្រាប់របស់រាជរដ្ឋាភិបាលផងដែរ ដែលទឹកប្រាក់ទាំងអស់នេះ គឺអាចនឹងជួយឲ្យរដ្ឋាភិបាលថៃ បន្តផ្ដល់ជំនួយហិរញ្ញវត្ថុសង្គ្រោះប្រជាជនរបស់ខ្លួននៅអំឡុងពេលកូវីដ-១៩នេះ បានរហូតដល់ចុងឆ្នាំនេះ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
