អ្នកគាំទ្រមកពីក្រៅប្រទេសត្រូវបានហាមឃាត់មិនឱ្យចូលរួមក្នុងព្រឹត្តិការណ៍អូឡាំពិកនោះទេ ប៉ុន្តែពេលនេះគណកម្មការអូឡាំពិកបានគូសបញ្ជាក់ហើយថា អ្នកទស្សនានៅក្នុងប្រទេសជប៉ុននឹងត្រូវបានអនុញ្ញាតឲ្យចូលរួមគាំទ្រដោយផ្ទាល់ ក្នុងចំនួនអ្នកគាំទ្រច្រើនបំផុត១ម៉ឺននាក់ និង មិនឲ្យលើសពី ៥០%នៃទីតាំងផ្ទុកមនុស្ស នៅទីកន្លែងប្រកួតនីមួយៗនោះទេ។
ទោះបីជាបានអនុញ្ញាតឲ្យពលរដ្ឋជប៉ុន បានចូលទស្សនាដោយផ្ទាល់ក្តី ប៉ុន្តែក្តីបារម្ភពីការរាលដាលកូវីដ-១៩ បានជំរុញឲ្យនាយករដ្ឋមន្ត្រីជប៉ុន លោក យូស៊ីហ៊ីដេ ស៊ូហ្គា (Yoshihide Suga) លើកទឹកចិត្តពលរដ្ឋឲ្យទស្សនាការប្រកួតនានាតាមកញ្ចប់ទូរទស្សន៍វិញ ជាជាងការទស្សនាដោយផ្ទាល់នៅទីតាំងប្រកួត។
គួរជម្រាបថា ក្រោយពីបានដាក់ក្រុងតូក្យូ និងតំបន់ជាច្រើននៅជប៉ុនស្ថិតក្នុងភាពអាសន្នអស់ពេលជិត២ខែរួចមក រដ្ឋាភិបាលជប៉ុនបានយល់ព្រមដកស្ថានភាពប្រកាសអាសន្ន ចេញពីក្រុងតូក្យូ និងតំបន់មួយចំនួន ចាប់ពីថ្ងៃអាទិត្យទី ២០មិថុនាតទៅហើយ ពោលគឺនៅ១ខែ មុនបើកការប្រកួតកីឡាអូឡាំពិក នៅទីក្រុងតូក្យូ។
អត្ថបទទាក់ទង
ការសម្រេចដកស្ថានភាពអាសន្នវិញនេះ ទំនងជាធ្វើឡើងដោយសារការប្រកួតកីឡាអូឡាំពិកខិតជិតមកដល់ និងដោយសារតែស្ថានភាពកូវីដ១៩នៅជប៉ុន ទោះមិនបានធូរស្បើយខ្លាំង តែករណីឆ្លងថ្មីនៃជំងឺកូវីដ-១៩ បានធ្លាក់ចុះ និងហាក់នៅទ្រឹងក្នុងខេត្តមួយចំនួននៃប្រទេសជប៉ុន។
យ៉ាងណាក៏ដោយចុះ បើតាមការស្ទង់មតិពីការសែតក្នុងស្រុក មានពលរដ្ឋជប៉ុនប្រមាណ ៣២% នៅចិញ្ចឹមចិត្តចង់ឲ្យរដ្ឋាភិបាលលុបចោលព្រឹត្តិការណ៍កីឡាដ៏ធំនេះ ខណៈ៣០%ទៀត ចង់ឲ្យលើកពេលបន្តទៀត ប៉ុន្តែក៏មានដែរ ជិត៤០%ដែលនៅសេសសល់ បានបង្ហាញការគាំទ្រឲ្យបន្តការប្រារព្ធព្រឹត្តិការណ៍នេះឡើង។
សូមបញ្ជាក់ថា ព្រឹត្តិការណ៍កីឡាអូឡាំពិកដ៏ធំនៅជប៉ុនក្នុងឆ្នាំនេះ នឹងត្រូវធ្វើឡើងនៅថ្ងៃទី២៣ កក្កដា ដល់៨សីហា ឆ្នាំ២០២១៕
None
