ប៉ុន្តែ នៅឆ្នាំនេះ ស្វ៊ីសបានក្លាយជាប្រទេសដំបូងគេបង្អស់នៅអឺរ៉ុប ដែលអនុញ្ញាតឲ្យលក់ម្ហូបអាហារចម្អិតពីសត្វល្អិត បន្ទាប់ពីប្រទេសនេះបានកែច្បាប់ស្ដីពីសុវត្ថិភាពចំណីអាហារ កាលពីខែឧសភាកន្លងទៅ។
ទោះជាយ៉ាងនេះក្ដី នៅប្រទេសស្វ៊ីសសត្វល្អិតតែ ៣ប្រភេទប៉ុណ្ណោះ ដែលគេអនុញ្ញាតឲ្យធ្វើជាម្ហូបអាហារលក់បាន គឺ កណ្ដូប ចង្រិត និងដង្កូវស។
យោងតាមការចុះផ្សាយរបស់គេហទំព័រ វេទិកាសេដ្ឋកិច្ចពិភពលោក ផ្សារទំនើប Coop នៅប្រទេសស្វ៊ីសបានប្រកាសថា ខ្លួនបានបើកលក់ម្ហូបអាហារថ្មីៗ ដែលចម្អិនពីសត្វល្អិត។
តើអ្នកបានអានអត្ថបទនេះ ឬនៅ?
គេនៅចាំបានថា នៅពេលដែលតួកុនហូលីវូដដ៏ល្បី គឺលោកស្រី អ៊ែនជែលីណា ចូលី (Angelina Jolie) មកទស្សនកិច្ចកម្ពុជានាដើមឆ្នាំនេះ លោកស្រីបានចម្អិនសត្វល្អិតធ្វើជាអាហារឲ្យកូនៗបរិភោគ ហើយរូបភាពនេះត្រូវបានសារព័ត៌មានទូទាំងពិភពលោកផ្សព្វផ្សាយយ៉ាងគគ្រឹកគគ្រេង។
អ្នកជំនាញថា សត្វល្អិតមានជាតិប្រូតេអ៊ីនខ្ពស់ ស្រួលកកើតធំធាត់ ហើយបើមនុស្សនាំគ្នាបរិភោគសត្វល្អិត វានឹងជួយសម្រាលបញ្ហាសុវត្ថិភាពស្បៀងអាហាររបស់មនុស្សលោក។
នៅឆ្នាំ២០៥០ គេរំពឹងថា ចំនួនប្រជាជនសរុបរបស់សកលលោកនឹងកើនឡើងដល់ ៩ពាន់ ៧រយលាននាក់ ដែលនឹងត្រូវការស្បៀងអាហារ ៧០% ច្រើនជាងតម្រូវការបច្ចុប្បន្ន៕
