ប្រទេសស្វីសរឹបអូសយកទ្រព្យសម្បត្តិរបស់ប្រទេសរុស្ស៊ីចំនួនជិត៩ពាន់លានដុល្លារ

លេខាធិការដ្ឋានកិច្ចការសេដ្ឋកិច្ចរបស់ប្រទេសស្វីស (SECO) ដែលជាទីភ្នាក់ងារត្រួតពិនិត្យទណ្ឌកម្មបាននិយាយថា ចំនួនទឹកប្រាក់ប្រហែល៨ពាន់ ៨រយលានដុល្លារនេះ គឺគ្រាន់តែជាការប៉ាន់ប្រមាណចុងក្រោយរបស់ខ្លួនប៉ុណ្ណោះប៉ុន្តែតួលេខនេះអាចប្រែប្រួលក្នុងពេលខាងមុខ ហើយតួលេខនេះបានកើនឡើងបន្តិចពីចំនួនជាង៨ពាន់ ៦រយលានដុល្លារ ដែលរដ្ឋាភិបាលស្វីស បាននិយាយថា ខ្លួនបានផ្អឹបទុកកាលពីឆ្នាំមុន បន្ទាប់ពីប្រទេសអព្យាក្រឹតមួយនេះបានអនុម័តទណ្ឌកម្មរបស់សហភាពអឺរ៉ុប។

វាពិបាកក្នុងការផ្តល់តួលេខច្បាស់លាស់ដោយសារតែគេអាចដាក់បន្ថែមមនុស្សថ្មី ឬក៏អាចដកចេញពីបញ្ជីទណ្ឌកម្មក៏ដូចជាករណីផ្លូវច្បាប់ដើម្បីបង្កក ឬលែងទ្រព្យសម្បត្តិបន្ថែមទៀត ក៏ថាបានដែរ។ តួលេខដែលអាចច្បាស់លាស់ជាងនេះត្រូវបានគេរំពឹងថា នឹងមាននៅចុងត្រីមាសទី២ ឆ្នាំ២០២៤ ខណៈដែលធនាគារស្វីសបានរាយការណ៍ទៅរដ្ឋាភិបាលប្រទេសនេះ។

ការកើនឡើងនូវទ្រព្យសម្បត្តិ ដែលបានបង្កកនេះ គឺដោយសារតែការកើនឡើងនូវចំនួនមនុស្សចំនួន៣០០នាក់ និងក្រុមហ៊ុន និងអង្គការចំនួន១០០អង្គភាព ដែលត្រូវបានបញ្ចូលទៅក្នុងបញ្ជីទណ្ឌកម្មក្នុង រយៈពេល១២ខែកន្លងមកនេះ។ ហើយវាក៏បានរួមបញ្ចូលទាំងប្រាក់ចំណេញ ដែលបានប៉ាន់ប្រមាណពីប្រាក់បញ្ញើជាសាច់ប្រាក់ មូលបត្របំណុល ភាគហ៊ុន ក៏ដូចជាអចលនទ្រព្យ និងរថយន្តប្រណីតផងដែរ​។ រដ្ឋាភិបាលទីក្រុងប៊ឺន (Bern) ប្រទេសស្វីសក៏បានរារាំងរំហូររូបិយបណ្ណបរទេសចំនួនជាង៨ពាន់លានដុល្លារ ដែលជាកម្មសិទ្ធិរបស់ធនាគារកណ្តាលរុស្ស៊ីផងដែរ៕

អត្ថបទ៖ សុខ ជា