ថ្នាក់ដឹកនាំកោះតៃវ៉ាន់ លោកស្រី សៃ អ៊ីងវិន បានឲ្យដឹងថា ប្រធានផ្នែកចរចាពាណិជ្ជកម្ម លោក ចន ដេង (John Deng) បានជួបជាមួយរដ្ឋមន្ត្រីពាណិជ្ជកម្មអន្តរជាតិរបស់កាណាដាតាមរយៈអនឡាញរួចហើយ ខណៈភាគីទាំងពីរបានយល់ព្រមចាប់ផ្តើម ការពិភាក្សាលើការរៀបចំការជំរុញ និងការការពារការវិនិយោគបរទេសហៅកាត់ថា FIPA រវាងភាគីទាំងពីរ។
សេចក្តីថ្លែងការណ៍ពីភាគីតៃវ៉ាន់បានគូសបញ្ជាក់ថា កិច្ចខិតខំប្រឹងប្រែងនេះ គឺជាសកម្មភាពដ៏សំខាន់មួយក្នុងការពង្រឹងទំនាក់ទំនងសេដ្ឋកិច្ច និងពាណិជ្ជកម្ម។
គួរជម្រាបថា ដើម្បីធ្វើឲ្យខ្លួនឯងរឹងមាំផ្នែកសេដ្ឋកិច្ច កោះតៃវ៉ាន់បាននិងកំពុងព្យាយាមស្វែងរកកិច្ចព្រមព្រៀងពាណិជ្ជកម្មជាមួយនឹងប្រទេសនានាតាមលទ្ធភាព ពិសេសជាមួយប្រទេសដែលខ្លួនតែងចាត់ទុកថាជាដៃគូដែលមានគំនិតដូចគ្នា ដូចជាសហរដ្ឋអាមេរិក និងសហភាពអឺរ៉ុបជាដើម។
ក្នុងនាមជាសមាជិកនៃអង្គការពាណិជ្ជកម្មពិភពលោក WTO មួយដែរ តៃវ៉ាន់មានកិច្ចព្រមព្រៀងពាណិជ្ជកម្មសេរីជាមួយតែប្រទេសមានសេដ្ឋកិច្ចរីកចម្រើនចំនួន២ប៉ុណ្ណោះ គឺសិង្ហបុរី និងប្រទេសញូហ្សេឡែន។
ដោយឡែក ប្រទេសចិនឯនោះវិញ ត្រូវបានកោះតៃវ៉ាន់តែងតែចាត់ទុកចិនថា ជាឆ្អឹងទទឹងក។ ជាឆ្អឹងទទឹងក ក៏ដោយសារតែ ចិនតែងតែព្យាយាម ហាមឃាត់ និងរារាំងប្រទេសផ្សេងៗ មិនឲ្យមានទំនាក់ទំនងពាណិជ្ជកម្ម ឬមានទំនាក់ទំនងការទូតដោយផ្ទាល់ជាមួយកោះតៃវ៉ាន់ទេ។អត្ថបទគួរអាន
សម្រាប់កាណាដា ដូចនឹងប្រទេសភាគច្រើននៅលើពិភពលោកដែរ កាណាដា គ្មានឡើយចំណងការទូតផ្លូវការ ជាមួយកោះតៃវ៉ាន់ ប៉ុន្តែថ្នាក់ដឹកនាំប្រទេសមួយនេះ បានកត់សម្គាល់ពីសារៈសំខាន់របស់កោះតៃវ៉ាន់ ក្នុងការដោះដូរពាណិជ្ជកម្ម និងការវិនិយោគ របស់ខ្លួននៅក្នុងតំបន់ឥណ្ឌូប៉ាស៊ីហ្វិក។
យ៉ាងណាក៏ដោយចុះ ការខិតជិតទៅរកគ្នារវាងភាគីទាំងពីរ អាចធ្វើឲ្យចិនខឹងសម្បារក្តៅស្លឹកត្រចៀកបន្ថែមទៀត។ ខឹងសម្បារដោយសារតែនេះ ជាអំពើផ្ទុយពីអ្វីដែលចិនចង់បាន។ ក្រុងប៉េកាំងរមែងព្យាយាមដាក់កោះតៃវ៉ាន់ឲ្យនៅឯកា ឯការហូតគ្មានទីពឹង នោះខ្លួននឹងមានភាពងាយស្រួលក្នុងការបង្រួបបង្រួមដែនដីកោះតៃវ៉ាន់ ។
សូមបញ្ជាក់ថា ចិនតែងចាត់ទុកតៃវ៉ាន់ជាផ្នែកមួយនៃទឹកដីរបស់ខ្លួន ដោយគ្មាននរណាម្នាក់មានសិទ្ធិភ្ជាប់ទំនាក់ទំនងផ្លូវរដ្ឋជាមួយឡើយ យ៉ាងណាមិញនេះជាទស្សនៈដែលកោះតៃវ៉ាន់ តែងច្រានចោលជារៀងរហូតមក៕None
