តៃវ៉ាន់ និងសហរដ្ឋអាមេរិក បានចាប់ផ្តើមកិច្ចចរចាអំពីកិច្ចព្រមព្រៀងមួយដែលគេហៅថាគំនិតផ្តួចផ្តើមអាមេរិក-តៃវ៉ាន់ស្តីពីពាណិជ្ជកម្មសតវត្សរ៍ទី២១ កាលពីខែសីហាឆ្នាំមុន បន្ទាប់ពីទីក្រុងវ៉ាស៊ីនតោនបានដកកោះតៃវ៉ាន់ចេញពីគំនិតផ្តួចផ្តើមពាណិជ្ជកម្មទូទាំងតំបន់អាស៊ី ពោលគឺក្របខ័ណ្ឌសេដ្ឋកិច្ចតំបន់ឥណ្ឌូប៉ាស៊ីហ្វិករបស់ខ្លួន។
ការិយាល័យចរចាពាណិជ្ជកម្មរបស់តៃវ៉ាន់បាននិយាយនៅក្នុងសេចក្តីថ្លែងការណ៍ខ្លីមួយថា កិច្ចព្រមព្រៀងលើកដំបូងនៅក្រោមក្របខ័ណ្ឌពាណិជ្ជកម្មនេះត្រូវចុះហត្ថលេខានៅទីក្រុងវ៉ាស៊ីនតោននាព្រឹកថ្ងៃព្រហស្បតិ៍តាមម៉ោងនៅសហរដ្ឋអាមេរិក ប៉ុន្តែមិនបានផ្តល់ព័ត៌មានលម្អិតផ្សេងទៀតទេ។
ការិយាល័យតំណាងពាណិជ្ជកម្មសហរដ្ឋអាមេរិកបាននិយាយថា អ្នកតំណាងពាណិជ្ជកម្មរងរបស់សហរដ្ឋអាមេរិក លោកស្រី សារ៉ា បៃអ៊ឹនឈី (Sarah Bianchi) ជាអ្នកចូលរួមក្នុងព្រឹត្តិការណ៍នេះ ប៉ុន្តែក៏មិនបានបញ្ជាក់លម្អិតអំពីកិច្ចព្រមព្រៀងនេះដែរ។
កាលពីខែមុន ភាគីតៃវ៉ាន់ និងភាគីសហរដ្ឋអាមេរិក បានឈានដល់កិច្ចព្រមព្រៀងលើផ្នែកដំបូងនៃគំនិតផ្តួចផ្តើមពាណិជ្ជកម្មរបស់ពួកគេដែលគ្របដណ្តប់លើនីតិវិធីគយនិងព្រំដែន ការអនុវត្តបទប្បញ្ញត្តិ និងអាជីវកម្មខ្នាតតូច។
អត្ថបទគួរអាន
អ្នកតំណាងពាណិជ្ជកម្មសហរដ្ឋអាមេរិកបាននិយាយកាលពីមុនថា បន្ទាប់ពីកិច្ចព្រមព្រៀងលើកដំបូងត្រូវបានចុះហត្ថលេខារួចហើយ ការចរចានឹងចាប់ផ្តើមលើផ្នែកពាណិជ្ជកម្មដ៏ស្មុគស្មាញផ្សេងទៀត ដែលរួមមានកសិកម្ម ពាណិជ្ជកម្មឌីជីថល ស្តង់ដារការងារនិងបរិស្ថាន សហគ្រាសរដ្ឋ ព្រមទាំងគោលនយោបាយនិងការអនុវត្តមិនមែនទីផ្សារ។
កតិកាសញ្ញានេះមិនត្រូវបានគេរំពឹងថានឹងកែប្រែអត្រាពន្ធគយលើទំនិញទេ ប៉ុន្តែក្រុមអ្នកគាំទ្រកិច្ចព្រមព្រៀងនេះបាននិយាយថា វានឹងពង្រឹងចំណងសេដ្ឋកិច្ចរវាងសហរដ្ឋអាមេរិកនិងកោះតៃវ៉ាន់។ ទន្ទឹមនឹងនេះ វានឹងបើកចំហរកោះនេះសម្រាប់ការនាំចេញរបស់សហរដ្ឋអាមេរិកកាន់តែច្រើន ហើយនឹងបង្កើនសមត្ថភាពរបស់តៃវ៉ាន់ក្នុងការទប់ទល់នឹងការបង្ខិតបង្ខំផ្នែកសេដ្ឋកិច្ចពីប្រទេសចិនទៀតផង។
រដ្ឋាភិបាលទីក្រុងប៉េកាំងបាននិយាយបរិហារចំពោះកិច្ចចរចាពាណិជ្ជកម្មនេះ ព្រោះក្រុងប៉េកាំងតែងតែថ្កោលទោសគ្រប់ទម្រង់ទាំងអស់នៃទំនាក់ទំនងកម្រិតខ្ពស់រវាងតៃវ៉ាន់និងសហរដ្ឋអាមេរិក ដោយសារតែក្រុងប៉េកាំងបានចាត់ទុកតៃវ៉ាន់ជាផ្នែកមួយនៃទឹកដីរបស់ខ្លួន។ ប៉ុន្តែកោះតៃវ៉ាន់តែងតែច្រានចោលយ៉ាងដាច់អហង្ការចំពោះការទាមទារអធិបតេយ្យភាពរបស់ចិនលើកោះនេះ។ ការទាមទាររបស់ចិនបាននិងកំពុងបង្កការគំរាមកំហែងដល់ទីក្រុងតៃប៉ិ តាមរយៈសកម្មភាពយោធាម្តងហើយម្តងទៀត រួមទាំងសមយុទ្ធនៅជុំវិញកោះនេះផងដែរ៕
អត្ថបទ៖ សុខ ជា
