ប្រទេសថៃ អាចនឹងបាត់បង់ប្រាក់ចំណូលប្រមាណ ១,៣ ទ្រីលានបាត ឬស្មើនឹងប្រមាណជាង ៤០ពាន់លានដុល្លារអាមេរិក និងបាត់បង់ការងារប្រមាណ ១០លាននាក់ ដោយសារតែមេរោគកូវីដ-១៩នេះ។ នេះបើតាមការប៉ាន់ប្រមាណពីក្រុមធុរកិច្ចជន។
លោកប្រាយុទ្ធ បានអះអាងនៅក្នុងសន្និសីទសារព័ត៌មានយ៉ាងដូច្នេះថា «យើងរំពឹងថា ផលប៉ះពាល់មកលើសេដ្ឋកិច្ចនឹងមានមួយរយៈពេល មិនត្រឹមតែ៣ខែទេ ប៉ុន្ដែអាចដល់ ៦ខែ ទៅ៩ខែឯណោះ»។ លោកបន្ថែមថា «យើងត្រូវការរៀបចំវិធានការ ដើម្បីដោះស្រាយបញ្ហានោះ»។
អត្ថបទទាក់ទង!
លោកនាយករដ្ឋមន្ត្រីថៃ បាននិយាយទៀតថា លោកអាចនឹងស្នើទៅកាន់ក្រុមអ្នកមានទ្រព្យសម្បត្តិនៅប្រទេសថៃ សម្រាប់កិច្ចសហប្រតិបត្តិការ នៅក្នុងការដោះស្រាយបញ្ហាសេដ្ឋកិច្ចដាំក្បាលចុះ ដែលបណ្ដាលមកពីបញ្ហាមេរោគរីករាលដាលនេះ ហើយលោកបញ្ជាក់ថា លោកក៏បានធ្វើរួចហើយដែរ ជាមួយនឹងក្រុមហ៊ុនអ្នកមាននៅក្នុងប្រទេសថៃចំនួន ២០រូប កាលពីខែមុននេះ។
រាជរដ្ឋាភិបាលថៃ បានដាក់ណែនាំនូវវិធានការសេដ្ឋកិច្ច មានតម្លៃរាប់ពាន់លានដុល្លារអាមេរិក ដើម្បីកាត់បន្ថយផលប៉ះពាល់បណ្ដាលមកពីមេរោគ រួមមាន ការដាក់ចេញនូវកញ្ចប់ថវិកាតម្លៃ១,៩ទ្រីលានបាត ឬស្មើនឹងជាង ៥៨ ពាន់លានដុល្លារអាមេរិក ដែលត្រូវបានអនុម័តកាលពីដើមខែមេសាកន្លងទៅនេះ។
ធនាគារថៃ បានព្យាករពីសេដ្ឋកិច្ចថៃនៅឆ្នាំនេះថា អាចនឹងធ្លាក់ចុះ ៥,៣% ដែលរងផលប៉ះពាល់អាក្រក់ជាង កាលពីមានវិបត្តិហិរញ្ញវត្ថុ និងបំណុលនៅអាស៊ីក្នុងឆ្នាំ ១៩៩៨ ទៅទៀត។
ប្រទេសថៃ បានរាយការណ៍ថា មានអ្នកឆ្លងកូវីដ-១៩សរុបចំនួន ២.៩៨៨ ករណី និងមានអ្នកស្លាប់ចំនួន ៥៤នាក់ហើយ។ រាជរដ្ឋាភិបាលថៃថ្មីៗនេះ ក៏ទើបតែអនុញ្ញាតឲ្យអាជីវកម្មមួយចំនួនបើកដំណើរការឡើងវិញផងដែរ ពោលគឺបានបើកតាំងពីថ្ងៃអាទិត្យកន្លងទៅនេះ៕
None
