ស្របពេលមានការបារម្ភថា ការដួលរលំរបស់ធនាគារអាមេរិក SVB ថ្មីៗនេះអាចបង្កផលប៉ះពាល់អវិជ្ជមានរាលដាលពេញពិភពលោកនោះ លោក អាខុម បាននិយាយថា ប្រទេសថៃមិនមានប្រតិបត្តិការណាមួយ ជាមួយធនាគារ SVB ឬក៏ធនាគារ Signature Bank ដែលបានដួលរលំថ្មីៗនេះទេ ហើយថា មូលនិធិសោធននិវត្តន៍របស់រដ្ឋាភិបាលថៃ មិនបានធ្វើការវិនិយោគនៅក្នុងធនាគារទាំង២នេះឡើយ។ ដូច្នេះលោកជឿជាក់ថា បញ្ហានេះទំនងជានឹងមិនប៉ះពាល់ដល់ប្រទេសថៃនោះដែរ។
លោក អាខុម បាននិយាយថា ធនាគារកណ្តាលថៃបានធានាសាជាថ្មីដល់សាធារណជនថា ប្រព័ន្ធហិរញ្ញវត្ថុរបស់ប្រទេសនេះ នៅរឹងមាំនៅឡើយ និងរក្សាទំនុកចិត្តរបស់អ្នកវិនិយោគ។
អគ្គនាយកការិយាល័យគោលនយោបាយសារពើពន្ធលោក ផនឆៃ ធីរ៉ាវ៉េចា (Pornchai Thiraveja) បាននិយាយថា យោងតាមការវាយតម្លៃបឋមរបស់ក្រសួងហិរញ្ញវត្ថុថៃ ការដួលរលំធនាគារ SVB នៅសហរដ្ឋអាមេរិកនេះនឹងមិនមានផលប៉ះពាល់ដោយផ្ទាល់ដល់ប្រទេសថៃនោះទេ។ វានឹងមានផលប៉ះពាល់រយៈពេលខ្លីលើវិស័យបច្ចេកវិទ្យារបស់សហរដ្ឋអាមេរិក ប៉ុន្តែមិនមែនលើវិស័យផ្សេងៗទៀតនោះទេ។
អត្ថបទគួរអាន
លោកបានបន្ថែមថា ក្រសួងហិរញ្ញវត្ថុ និងស្ថាប័នពាក់ព័ន្ធនឹងបន្តតាមដានស្ថានការណ៍នេះ និងត្រៀមខ្លួនជាស្រេច ដើម្បីចាត់វិធានការ ដើម្បីការពារស្ថិរភាពហិរញ្ញវត្ថុរបស់ប្រទេសថៃ។
លោក ផនឆៃ បាននិយាយថា ប្រទេសថៃមានស្ថិរភាពហិរញ្ញវត្ថុ មានប្រព័ន្ធការពារប្រាក់បញ្ញើដ៏រឹងមាំ និងបានត្រៀមខ្លួនរួចជាស្រេច ដើម្បីដោះស្រាយបញ្ហាប្រែប្រួលណាមួយ។ លោកបានបន្ថែមថា ប្រជាជនមិនគួរភ័យស្លន់ស្លោ ឬព្រួយបារម្ភថា បញ្ហានៅអាមេរិកនេះ នឹងប៉ះពាល់ដល់ស្ថាប័នហិរញ្ញវត្ថុរបស់ថៃនោះឡើយ។
លោក សារុន ស៊ូទុនទីវ៉ូរ៉ាកួន (Sarun Sutuntivorakoon) ប្រធានសមាគមមូលធនរួមរបស់ថៃ (Thai Venture Capital Association) បាននិយាយថា ការដួលរលំធនាគារ Silicon Valley នឹងមិនប៉ះពាល់ដល់ការចាប់ផ្តើមអាជីវកម្ម និងគំនិតវិនិយោគរបស់ប្រទេសថៃឡើយដោយសារការចាប់ផ្ដើមអាជីវកម្មក្នុងស្រុកមិនពាក់ព័ន្ធនឹងការទទួលបានមូលនិធិពីធនាគារអាមេរិកដែលបានក្ស័យនោះនៅទីនោះទេ៕
អត្ថបទ ៖ សុខ ជា
