តែយ៉ាងណាការសម្រេចនេះនៅមិនទាន់ច្បាស់នៅឡើយទេ ខណៈបញ្ហាកំពុងកើតមានរវាងនាយករដ្ឋមន្រ្តី និងធនាគារកណ្តាលថៃ។ នេះបើយោងតាមការចុះផ្សាយរបស់កាសែតបាងកកប៉ុស្តិ៍។
អត្រាការប្រាក់នៅប្រទេសថៃ ត្រូវបានគេព្យាករថា នឹងឡើងដល់១១% នៅឆ្នាំ២០២៥ ខាងមុខ មានការកើនឡើង៣% បើធៀបនឹងអត្រាការប្រាក់នៅឆ្នាំនេះ ដែលមានត្រឹមតែ៨% ប៉ុណ្ណោះ។ ការដំឡើងអត្រាការប្រាក់នេះអាចនឹងត្រូវធ្វើឡើងប្រសិនបើរដ្ឋាភិបាលថៃ នៅតែបន្តអនុវត្តកម្មវិធីចែកប្រាក់ក្រោមយន្តការដែលមានឈ្មោះថា កាបូបឌីជីថល ដែលគណបក្សកាន់អំណាចបានសន្យាកាលពីមុនការបោះឆ្នោត។
យោងតាមប្រភពពីក្រសួងហិរញ្ញវត្ថុដែលបានស្នើសុំមិនបញ្ចេញឈ្មោះបានឲ្យដឹងថា អត្រាការប្រាក់៨%នៅពេលនេះ គឺស្ថិតនៅក្នុងចំណាត់ថ្នាក់ A ដោយផ្អែកលើស្តង់ដារបស់ទីភ្នាក់ងារវាយតម្លៃឥណទានអន្តរជាតិ ប៉ុន្តែប្រសិនអត្រាការប្រាក់ត្រូវបានដំឡើងដល់១១% ដូចការរំពឹងទុកមែននោះ វានឹងទាញទម្លាក់ចំណាត់ថ្នាក់ឥណទាននៅក្នុងប្រទេសថៃ។
ប្រភពដដែលបាននិយាយថា កាលពីនៅឆ្នាំ២០១៩ សមាមាត្រនៃអត្រាការប្រាក់ធៀបទៅនឹងប្រាក់ចំណូលរបស់រដ្ឋាភិបាលមានកម្រិតទាបត្រឹមតែ៦% ដែលត្រូវបានគេសន្មតថា ជាការគ្រប់គ្រងប្រកបដោយប្រសិទ្ធភាពនៃការចំណាយលើការខ្ចីប្រាក់ដោយការិយាល័យគ្រប់គ្រងបំណុលសាធារណៈ។
អត្តបទគួរអាន
ការហើមឡើងនៃអត្រាការប្រាក់នេះ គឺចាប់់ផ្តើមមានសម្ពាធនៅឆ្នាំ២០២០ ដល់ឆ្នាំ២០២១ នៅពេលដែលរដ្ឋាភិបាល បានប្រកាសនូវកញ្ចប់ឥណទាន ដែលមានតម្លៃជិត៤១ពាន់លានដុល្លា ដើម្បីកាត់បន្ថយផលប៉ះពាល់នៃការផ្ទុះឡើងនៃជំងឺ Covid-19 ហើយប្រសិនបើនៅឆ្នាំ២០២៤ និង២០២៥ រដ្ឋាភិបាលនៅតែបន្តចាយប្រាក់បន្ថែមទៀត ពោលគឺតាមការសន្យារបស់គណបក្សកាន់អំណាចទៅពលរដ្ឋតាមកម្មវិធីកាបូបឌីជីថលនៅមុនបោះឆ្នោតដែលមានតម្លៃជាង១៣ ពាន់លានដុល្លារបន្ថែមទៀត នោះឱនភាពថវិការនឹងបន្តកើតមាន ហើយអត្រាការប្រាក់នឹងឡើងដល់១១%។
រហូតមកដល់ពេលនេះរវាងនាយករដ្ឋមន្រ្តី និងធនាគារកណ្តាលថៃ កំពុងតែមានបញ្ហាចម្រូងចម្រាស់នឹងគ្នា ពាក់ព័ន្ធនឹងការសម្រេចលើគោលនយោបាយអត្រាការប្រាក់។ ពាក់ព័ន្ធបញ្ហានេះ លោកស្រី ផៃថងថាន ស៊ីណាវ៉ាត្រា កូនស្រីពៅរបស់លោក ថាក់ស៊ីន ស៊ីណាវ៉ាត្រា ប្រធានគណបក្សភឿថៃ បានឡើងថា ឯករាជ្យភាពរបស់ធនាគារកណ្តាលថៃ កំពុងរារាំងដល់កិច្ចខិតខំប្រឹងប្រែងដើម្បីជំរុញសេដ្ឋកិច្ចនៅក្នុងប្រទេស។ សម្រាប់លោកស្រី ច្បាប់ដែលបានផ្តល់សិទ្ធិឲ្យធនាគារកណ្តាលឯករាជ្យពីរដ្ឋាភិបាល គឺជាបញ្ហា និងជាឧបសគ្គនៅក្នុងការដោះស្រាយបញ្ហាសេដ្ឋកិច្ច។ នៅពេលនេះរដ្ឋាភិបាលកំពុងតែជំរុញឲ្យធនាគារកណ្តាលបញ្ចុះអត្រាការប្រាក់ ប៉ុន្តែធនាគារកណ្តាលហាក់ជំទាស់។
ដោយៈ សរ សុជាតិ
None
