តាមរយៈសារព័ត៌មាន Bangkok Post របស់ថៃ សមាគមអ្នកនាំចេញអង្ករថៃ បានគូសបញ្ជាក់ថា បន្ទាប់ពីមានកិច្ចប្រជុំជាមួយនឹង ក្រសួងពាណិជ្ជកម្មថៃ សមាគមបានស្នើទម្លាក់គោលដៅនាំចេញអង្ករ មកត្រឹម ៦លាន ៥សែនតោនក្នុងឆ្នាំនេះ ដោយលើកឡើងពី កត្តាអវិជ្ជមានជាច្រើន ដែលប៉ះពាល់ដល់ វិស័យស្រូវអង្ករ ដូចជាកត្តាគ្រោះរាំងស្ងួត កត្តាមេរោគកូវីដ-១៩ តម្លៃអង្ករឡើងថ្លៃ ពិបាកប្រកួតប្រជែង និងការចុះអន់ខ្សោយនៃតម្រូវការអាហារ នៅលើសកលលោកជាដើម។
បច្ចុប្បន្ន អង្ករបាក់របស់ថៃ មានតម្លៃខ្ពស់ប្រហែល ៥២០ដុល្លារអាមេរិកក្នុងមួយតោន ខណៈអង្ករ មកពីវៀតណាម ដាក់លក់ក្នុងតម្លៃ ៤៥០ដុល្លារអាមេរិក ក្នុងមួយតោន និងអង្ករឥណ្ឌា ដាក់លក់ក្នុងតម្លៃ ៣៦០ដុល្លារអាមេរិក ក្នុងមួយតោន។
អត្ថបទទាក់ទង!
ដោយសារតែ វិបត្តិមេរោគកូវីដ-១៩ បានធ្វើឲ្យទស្សនវិស័យនាំចេញអង្កររបស់ថៃ កាន់តែស្រពិចស្រពិល ដោយប្រធានសមាគមអ្នកនាំចេញអង្ករថៃ បង្ហាញក្តីរំពឹងថា នៅក្នុងឆមាសទី ២នេះ ថៃ នឹងអាចនាំចេញអង្ករបាន ៣លាន ៥សែនតោន។
យ៉ាងណាក៏ដោយ ការព្យាករនេះ នៅពុំទាន់ច្បាស់លាស់នៅឡើយនោះទេ ដោយសារតែក្រុមហ៊ុនជួញដូរអង្ករធំៗ នៅជុំវិញសកលលោក កំពុងតែជួបប្រទះនឹងបញ្ហាលំហូរសាច់ប្រាក់ និងទំនងជាអាចជួបនឹងបញ្ហាហិរញ្ញវត្ថុ នាពេលឆាប់ៗខាងមុខ ហើយក្រៅពីនោះ អ្នកទិញ និងប្រើប្រាស់អង្ករសំខាន់ៗ ក៏ផ្អាកការទិញអង្ករក្នុងពេលនេះដែរ។
គួរជម្រាបថា គិតត្រឹម៥ខែដើមឆ្នាំ២០២០នេះ ថៃ បាននាំចេញអង្ករជាង ២លាន ៥សែនតោន ក្នុងទំហំទឹកប្រាក់ប្រមាណ ១ពាន់ ៧រយលានដុល្លារអាមេរិក ដោយសហរដ្ឋអាមេរិក ជាអ្នកទិញធំជាងគេបង្អស់ ប្រមាណ៣សែនតោន និងប្រទេសអាហ្រ្វិកខាងត្បូង ឈរនៅលំដាប់ទី ២ ទិញអង្ករថៃជាង ២សែនតោន៕
None
