ថៃ សម្រេចលើកលែងការបង់ការប្រាក់ និងកាត់បន្ថយការបង់ប្រាក់ដើម ដើម្បីសម្រាលបន្ទុកបំណុលរបស់ពលរដ្ឋ

នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រា (Paetongtarn Shinawatra) បានប្រាប់ក្រុមអ្នកកាសែត កាលពីថ្ងៃពុធ សប្តាហ៍នេះថា គណៈរដ្ឋមន្ត្រីរបស់លោកស្រីបានអនុម័តវិធានការមួយចំនួនរួមទាំងការព្យួរអត្រាការប្រាក់ និងការកាត់បន្ថយការបង់ប្រាក់ដើមផង ដើម្បីជួយដោះស្រាយបញ្ហាបំណុលរបស់ប្រជពលរដ្ឋ ដែលបានហក់ឡើងខ្ពស់គួរឱ្យបារម្ភ។ លោកស្រីបានសង្កត់ធ្ងន់ថា វិធានការនេះមិនត្រឹមតែជួយដល់អ្នកខ្ចីរាយរងប៉ុណ្ណោះទេ តែក៏ជួយអាជីវកម្មខ្នាតតូចផងដែរ។

រដ្ឋមន្ត្រីក្រសួងហិរញ្ញវត្ថុថៃ លោក ពិឆៃ ឈុនហាវ៉ាជីរ៉ា (Pichai Chunhavajira) បានប្រាប់អ្នកសារព័ត៌មានថា គណៈរដ្ឋមន្ត្រីថៃ ក៏បានយល់ព្រមអនុញ្ញាតឱ្យធនាគារបង់វិភាគទានប្រចាំឆ្នាំមកនៅត្រឹមតែ០,២៣% នៃប្រាក់បញ្ញើរបស់ពួកគេទៅក្នុងមូលនិធិអភិវឌ្ឍន៍គ្រឹះស្ថានហិរញ្ញវត្ថុ (FIDF) សម្រាប់រយៈពេល៣ឆ្នាំ ដើម្បីជួយធនាគារក្នុងការគាំទ្រដល់អ្នកខ្ចីប្រាក់ផងដែរ។

រដ្ឋាភិបាលថៃ បាននិយាយថា វិធានការនេះនឹងជួយអ្នកខ្ចីដែលខកខានសងបំណុលរយៈពេលមួយឆ្នាំ ហើយវិធានការនេះនឹងផ្តោតលើការដោះស្រាយលើកម្ចីទិញផ្ទះ ដែលមានទំហំរហូតដល់ជិត១៥ម៉ឺនដុល្លារ ប្រាក់កម្ចីទិញរថយន្តជាង២ម៉ឺនដុល្លារ និងប្រាក់កម្ចីរបស់ក្រុមហ៊ុនខ្នាតតូចរហូតដល់ជិត១៥ម៉ឺនដុល្លារ។

រដ្ឋាភិបាលថៃ បាននិងកំពុងព្យាយាមបន្ធូរបន្ថយបន្ទុកបំណុលគ្រួសាររបស់ពលរដ្ឋថៃ ដែលត្រូវបានរដ្ឋាភិបាល បានចាត់ទុកថា បញ្ហានេះជាឧបសគ្គក្នុងការជំរុញការប្រើប្រាស់ និងកំណើនសេដ្ឋកិច្ច។ គិតត្រឹមខែមិថុនា ឆ្នាំ២០២៤ បំណុលពលរដ្ឋថៃ មានទំហំជិត៩០%នៃផលិតផលក្នុងស្រុកសរុបរបស់ថៃ ដោយមានទំហំសរុបរហូតដល់ជាង៤៨២ពាន់លានដុល្លារ ដែលជាកម្រិតបំណុលគ្រួសារខ្ពស់បំផុតមួយនៅតំបន់អាស៊ី៕

អត្ថបទ៖ សុខ មង្គល