ដូចការគ្រោងទុក ការពង្រឹងកិច្ចសហប្រតិបត្តិការដើម្បីធានាសន្តិសុខថាមពលរវាងកម្ពុជា និងថៃ បានក្លាយជាប្រធានបទមួយនៃជំនួបពិភាក្សាទ្វេភាគីរវាងនាយករដ្ឋមន្ត្រី សេដ្ឋា ថាវីស៊ីន ជាមួយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលបានបំពេញទស្សនកិច្ចផ្លូវការនៅប្រទេសថៃ កាលពីថ្ងៃទី៧ កុម្ភៈ។
តំបន់ត្រួតស៊ីគ្នានៅឈូងសមុទ្ររវាងប្រទេសទាំងពីរ ដែលគ្របដណ្តប់លើផ្ទៃដី២ម៉ឺន៦ពាន់គីឡូម៉ែត្រការ៉េ ហើយឯកសារខ្លះថា ២ម៉ឺន៧ពាន់គីឡូម៉ែត្រការ៉េ ត្រូវបានគេជឿថា ជាតំបន់ដែលសំបូរទៅដោយប្រភពឥន្ធនៈហ្វូស៊ីល ខណៈដែលកិច្ចចរចាទ្វេភាគីស្តីពីការអភិវឌ្ឍន៍រួមគ្នានៅតំបន់នោះត្រូវបានធ្វើឡើងជាច្រើនលើកច្រើនសា តែមិនទទួលបានលទ្ធផលផ្លែផ្កាជាដុំកំភួននោះទេ។
នៅក្នុងសន្និសីទសារព័ត៌មានបន្ទាប់ពីកិច្ចពិភាក្សាជាមួយមេដឹកនាំកម្ពុជា លោក សេដ្ឋា ថាវីស៊ីន បាននិយាយថា ភាគីទាំងពីរបានយល់ព្រមពង្រឹងកិច្ចសហប្រតិបត្តិការលើវិស័យសន្តិសុខថាមពល និងពិភាក្សាលើការទាញយកប្រយោជន៍រួមគ្នានៃធនធានអ៊ីដ្រូកាបូននៅក្នុងតំបន់ត្រួតស៊ីគ្នានៅឈូងសមុទ្រ។
អត្ថបទគួរអាន
បន្ថែមលើនេះ ភាគីទាំងពីរ ក៏បានយកចិត្តទុកដាក់ចំពោះការកំណត់ព្រំដែនសមុទ្រ ហើយបានយល់ព្រមពិភាក្សាអំពីបញ្ហានេះក្នុងពេលដំណាលគ្នាជាមួយនឹងការធ្វើអាជីវកម្មធនធានថាមពល។ លើសពីនេះ នាយករដ្ឋមន្ត្រីថៃ បានបញ្ជាឱ្យក្រសួងការបរទេសថៃ ពិគ្រោះជាមួយអាជ្ញាធរ រួមទាំងក្រសួងថាមពល និងកងទ័ពជើងទឹកថៃលើបញ្ហានេះ ដើម្បីពិភាក្សាបន្ថែមជាមួយភាគីកម្ពុជាផងដែរ។
ពាក់ព័ន្ធនឹងគម្រោងការនេះកន្លងមកលោក សេដ្ឋា ថាវីស៊ីន ធ្លាប់បានប្រាប់សភាក្នុងអំឡុងកិច្ចពិភាក្សាលើច្បាប់ថវិកាកាលពីដើមខែមករា ថា ថៃកំពុងចរចាជាមួយកម្ពុជាលើចំណុចនេះ មុននឹងដាក់ត្រូវបញ្ចូលក្នុងរបៀបវារៈពេលលោកជួបជាមួយសម្តេចធិបតី។ នៅពេលនោះ លោកនាយករដ្ឋមន្រ្តីថៃ បាននិយាយថា ធនធាននៅតំបន់នោះ មានតម្លៃរាប់សិបពាន់លានដុល្លារ ដូច្នេះលោករំពឹងថា ថៃអាចពិភាក្សា និងឈានដល់កិច្ចព្រមព្រៀងមួយ។
ថ្នាក់ដឹកនាំរដ្ឋាភិបាលថៃរូបនេះអះអាងថា កិច្ចពិភាក្សាជាមួយនឹងសម្តេចធិបតីមានលក្ខណៈទូលំទូលាយ ហើយប្រជាជាតិទាំងពីរចែករំលែកការប្តេជ្ញាចិត្តក្នុងការជំរុញកិច្ចសហប្រតិបត្តិការឱ្យកាន់តែជិតស្និទ្ធ ដោយផ្អែកលើការជឿទុកចិត្តគ្នា ការគោរពគ្នាទៅវិញទៅមកដោយឈរនៅលើប្រយោជន៍រួមគ្នា។
ក្រៅពីមានបំណងជំរុញការអភិវឌ្ឍរួមគ្នានៅតំបន់សម្បូរធនធានឥន្ធនៈហ្វូស៊ីល ពាណិជ្ជកម្មទ្វេភាគី ការអភិវឌ្ឍន៍ផ្សេងៗ ទេសចរណ៍ និងការបំពុលអាកាសធាតុ ក៏ត្រូវបានលើកយកមកពិភាក្សាផងដែរ៕
ដោយៈ សរ សុជាតិ
None
