អ្នកជំនាញសេដ្ឋកិច្ចអាម៉េរិកថា កុំទាន់សប្បាយនឹងជោគជ័យនៃការគ្រប់គ្រងអត្រាអតិផរណា

លោក ណែល កាស្ការី (Neel Kashkari) ប្រធានធនាគារកណ្តាលអាម៉េរិក ប្រចាំនៅរដ្ឋមីនីសូតា បាននិយាយថា វាជាការឆាប់ពេកហើយក្នុងការប្រកាសជ័យជម្នះលើអតិផរណា បើទោះបីជាមានសញ្ញាវិជ្ជមាន ក្រោយសម្ពាធតម្លៃមានភាពធូរស្រាលក៏ដោយចុះ។

នៅក្នុងបទសម្ភាស​ជាមួយទូរទស្សន៍ Fox News អ្នកជំនាញរូបនេះ បានលើកឡើងថា មុនអាចប្រកាសថា អាម៉េរិកបានបញ្ចប់ទាំងស្រុងលើការអនុវត្តគោលនយោបាយគ្រប់គ្រងអតិផរណា និងបានដោះស្រាយបញ្ហានេះដោយជោគជ័យ លុះត្រាទទួលបានទិន្នន័យបន្ថែមទៀតសិន។ សម្រាប់អ្នកជំនាញរូបនេះ អាម៉េរិកពិតជាត្រូវការមូលដ្ឋាននៃសេដ្ឋកិច្ចបន្ថែមទៀត មុនអាចបង្ហាញពី ការវិវត្តន៍ទៅមុខ នៃការគ្រប់គ្រងសេដ្ឋកិច្ច។

លោកបាននិយាយថា ខណៈពេលនេះអាម៉េរិកមានទិន្នន័យប្រមាណជាបីខែប៉ុណ្ណោះស្តីពីអតិផរណា ដូច្នេះវាមិនគ្រប់គ្រាន់ទេនៅក្នុងការចេញសេចក្តីសន្និដ្ឋានណាមួយ។ លោកបានបន្ថែមថា «យើងពិតជាត្រូវការនូវទិន្នន័យបន្ថែម ហើយនៅពេលនេះយើងកំពុងតែបន្តស្វែងរក ដើម្បីមើលថា តើយើងពិតជាបានយកឈ្នះនិងអាចគ្រប់គ្រងអតិផរណាមែនឫក៏អត់សិន»។

លោក ណែល កាស្ការី បានគូសបញ្ជាក់ថា ហានិភ័យនៃការរឹតបន្តឹងគោលនយោបាយរូបិយវត្ថុ គឺមានភាពល្អប្រសើរ ប៉ុន្តែទោះបីជាយ៉ាងណាក៏ដោយលោកបារម្ភថា អតិផរណាអាចនឹងផ្ទុះឡើងម្តងទៀត។ លោក ណែល កាស្ការី បាននិយាយនៅក្នុងបទសម្ភាស​មួយទៀតជាមួយ Wall Street Journal ថា ការរឹតបន្តឹងនឹងមិនអាចធ្វើឱ្យអាម៉េរិកត្រលប់ទៅរកកម្រិតអតិផរណាដល់២%វិញបានទេនៅពេលនេះ។

ពាក់ព័ន្ធនឹងបញ្ហាអតិផរណានេះ លោក ជេរ៉ូម ផូវែល (Jerome Powell) ប្រធានក្រុមប្រឹក្សាភិបាលធនាគារកណ្តាលអាម៉េរិក បាននិយាយថា អត្រាអតិផរណានេះ គឺមានទំនាក់ទំនងជាពិសេសនៅក្នុងការសម្រេចិត្តបញ្ចុះអត្រាការប្រាក់ ដែលនៅពេលនេះធនាគារកណ្តាលនៅតែ​បន្តកម្រិតមធ្យមភាគពី៥,២៥%​ ទៅ៥,៥% ដែលជាកម្រិតខ្ពស់បំផុតនៅក្នុងរយៈពេល២២ឆ្នាំ។

ដោយឡែកពាក់ព័ន្ធនឹងបញ្ហាអត្រាការប្រាក់លោក ណែល កាស្ការី បានសង្កត់ធ្ងន់ថា វាហាក់ដូចជាឆាប់ពេកហើយក្នុងការនិយាយថា តើត្រូវការការដំឡើងអត្រាការប្រាក់បន្ថែមទៀត ឬអត់នោះនៅពេលនេះ៕

ដោយៈ សរ សុជាតិ