កងកម្លាំងសន្តិសុខថៃជឿថា ហេតុការណ៍ទាំងនេះ គឺជាស្នាដៃរបស់ក្រុមឧទ្ទាមផ្ដាច់ខ្លួនភាគខាងត្បូងដែលមានចេតនាបង្កភាពចលាចលនៅក្នុងតំបន់នោះ។ ហេតុការណ៍វាយប្រហារជាស៊េរីនេះបានកើតឡើងក្នុងទម្រង់ស្រដៀងៗគ្នា ដែលបណ្ដាលឱ្យស្ថានីយប្រេងទាំងនោះរងការខូចខាតយ៉ាងធ្ងន់ធ្ងរ។ តែមិនមានការរាយការណ៍ណាមួយបញ្ជាក់ពីអ្នករងរបួស ឬបាត់បង់ជីវិតនៅក្នុងព្រឹត្តិការណ៍ដ៏រន្ធត់នេះឡើយ។
បើតាមប្រភពពី Khaosod ក្រោយហេតុការណ៍វាយប្រហារលើទីតាំងស្ថានីយប្រេងឥន្ធនៈជាច្រើនកន្លែង អាជ្ញាធរខេត្តណារ៉ាធីវ៉ាតរបស់ថៃនៅថ្ងៃទី១១ ខែមករានេះ បានប្រកាសដាក់បម្រាមគោចរ ដែលហាមឃាត់សាធារណជនចាកចេញពីលំនៅដ្ឋានរបស់ពួកគេចាប់ពីម៉ោង ៩:០០ យប់ដល់ម៉ោង ៥:០០ ព្រឹកនៅគ្រប់ស្រុកទាំងអស់ ដែលមានប្រសិទ្ធភាពចាប់ពីថ្ងៃនេះ រហូតដល់មានការជូនដំណឹងជាថ្មី។
ការវាយប្រហារនេះបានកើតឡើងមុនការបោះឆ្នោតកម្រិតឃុំសង្កាត់ជិតចូលមកដល់ ដែលបង្កឱ្យមានការព្រួយបារម្ភអំពីសន្តិសុខយ៉ាងខ្លាំងក្នុងចំណោមអ្នកមានសិទ្ធិបោះឆ្នោត។
ភ្លាមៗបន្ទាប់ពីកើតហេតុ មន្ត្រីសន្តិសុខបានបិទផ្លូវចេញចូលតំបន់រងគ្រោះ ដើម្បីឱ្យក្រុមអ្នកជំនាញធ្វើកោសល្យវិច័យ ដើម្បីកំណត់មូលហេតុ និងប្រមូលភ័ស្តុតាង។ ទន្ទឹមនឹងនេះ វិធានការសន្តិសុខនៅតាមបណ្តោយព្រំដែនថៃ-ម៉ាឡេស៊ី ត្រូវបានរឹតបន្តឹងជាអតិបរមា ដើម្បីទប់ស្កាត់ការវាយប្រហារណាមួយដែលអាចកើតមានឡើងជាបន្តទៀត៕
អត្ថបទៈ សួន ឡង់ទី. រូបភាពៈ ឯកសារបរទេស
