ថៃ កំពុងចរចាជាមួយមហាយក្សចិន និងឡាវ ដើម្បីបើកដំណើរការផ្លូវអាកាសថ្មីៗ

លោក ណូផាស៊ីត ចាក់ពីតាក់ (Nopasit Chakpitak) ប្រធានក្រុមហ៊ុនអាកាសចរណ៍ថៃ អ៊ែរ៉ូថៃ (Aerothai) បានទម្លាយឱ្យដឹងកាលពីថ្ងៃទី២៩ ខែមីនា ថា បន្ទាប់ពីឈានដល់ការព្រមព្រៀងគ្នាលើគម្រោងផ្លូវហោះហើរថ្មីៗរវាងប្រទេសថៃ និងប្រទេសចិន ដោយត្រូវឆ្លងកាត់ប្រទេសឡាវ ប្រទេសទាំង៣នឹងស្វះស្វែងសុំការអនុម័តពីអង្គការអាកាសចរណ៍ស៊ីវិលអន្តរជាតិ (ICAO)។

លោក ណូផាស៊ីត ចាក់ពីតាក់ (Nopasit Chakpitak) បានគូសបញ្ជាក់ថា ផ្លូវហោះហើរថ្មីៗទាំងនេះអាចនឹងត្រូវបើកដំណើរការនៅដើមឆ្នាំ២០២៦ បន្ទាប់ពីបំពេញគ្រប់លក្ខខណ្ឌតម្រូវផ្នែកសុវត្ថិភាពរបស់អង្គការអាកាសចរណ៍ស៊ីវិលអន្តរជាតិ (ICAO)។ លោកបានធ្វើការកត់សម្គាល់ថា ឧស្សាហកម្មអាកាសចរណ៍នៅតំបន់អាស៊ី បានបង្ហាញសញ្ញារីកចម្រើនយ៉ាងឆាប់រហ័ស ជាពិសេសនៅក្នុងប្រទេសចិន និងប្រទេសឥណ្ឌា បន្ទាប់ពីមានការបញ្ជាទិញយន្តហោះថ្មីៗរហូតដល់ទៅជាង១ពាន់គ្រឿង។

ក្រុមហ៊ុនអាកាសចរណ៍ អ៊ែរ៉ូថៃ (Aerothai) ដែលជាសហគ្រាសរដ្ឋក្រោមចំណុះរបស់ក្រសួងដឹកជញ្ជូនថៃ បានមើលឃើញពីភាពចាំបាច់ដែលត្រូវបង្កើនសមត្ថភាពដែនអាកាស ដើម្បីឆ្លើយតបទៅនឹងកំណើនតម្រូវការនេះ។

លោក ណូផាស៊ីត ចាក់ពីតាក់ (Nopasit Chakpitak) បានចែករំលែកថា គម្រោងផ្លូវអាកាសថ្មីៗទាំងនេះនឹងជួយសម្រួលដល់ការហោះហើររវាងភាគបណ្ដាខេត្តខាងជើង នៃប្រទេសថៃ រួមមានខេត្តឈៀងម៉ៃ និងខេត្តឈៀងរ៉ៃ និងទីក្រុងសំខាន់ៗរបស់ចិន ដូចជាក្រុងគុនមីង (Kunming) ក្រុងគួយយ៉ាង (Guiyang) ក្រុងឈឹងទូ (Chengdu) ក្រុងធានហ៊្វូ (Tianfu) ក្រុងឆុងឈីង (Chongqing) និងក្រុងស៊ីអាន (Xian)។

ក្រុមហ៊ុនអាកាសចរណ៍ អ៊ែរ៉ូថៃ (Aerothai) បានព្យាករថា ជើងហោះហើរនឹងកើនឡើងដល់ជាង៩០ម៉ឺនជើងក្នុងឆ្នាំ២០២៤ នេះ បើធៀបនឹង៨០ម៉ឺនជើងក្នុងឆ្នាំ២០២៣ កន្លងទៅ ហើយថា តួលេខនេះនឹងបន្តកើនឡើងដល់១លានជើងនៅឆ្នាំ២០២៥ ដែលស្មើនឹងកម្រិតមុនផ្ទុះវិបត្តិកូវីដ-១៩៕

ដោយ: តែម សុខុម