ធនាគារកណ្ដាលថៃ បានកាត់បន្ថយការព្យាករកំណើនសេដ្ឋកិច្ចថៃអស់ ០,៥% សម្រាប់ឆ្នាំ២០២២ ធៀបនឹងអ្វីដែលបានព្យាករកាលពីមុនលើកមុន ពោលគឺ ការព្យាករថ្មីចុងក្រោយនេះ ធនាគារកណ្ដាលរបស់ថៃ រំពឹងថា សេដ្ឋកិច្ចថៃ នឹងអាចកើនឡើងត្រឹមតែ ៣,៤%នៅឆ្នាំ២០២២ ខណៈកាលពីខែកញ្ញាធនាគារនេះ ធ្លាប់ព្យាករថាមានកំណើន៣,៩%។ ការបន្ទាបកំណើនព្យាករសេដ្ឋកិច្ចថៃនេះ គឺធ្វើឡើងស្របទៅតាមការរំពឹងទុកនៃតម្រូវការទីផ្សារ។
ធនាគារកណ្ដាលថៃ អះអាងនៅក្នុងសេចក្ដីថ្លែងការណ៍ថា ការរីករាលដាលនៃមេរោគបំប្លែងថ្មី អូមីក្រុង អាចជាហានិភ័យខ្ពស់ចំពោះទស្សនវិស័យសេដ្ឋកិច្ច ដូច្នេះហើយ ត្រូវមានការតាមដានយ៉ាងយកចិត្តទុកដាក់បំផុត។
តាមការវាយតម្លៃចុងក្រោយមួយរបស់គណៈកម្មាធិការគោលនយោបាយរូបិយវត្ថុរបស់ថៃ បានគូសបញ្ជាក់ថា ការរាតត្បាតនៃមេរោគ អូមីក្រុង នឹងប៉ះពាល់ទៅដល់សេដ្ឋកិច្ចថៃនៅដើមឆ្នាំ២០២២ខាងមុខនេះ។ ផលប៉ះពាល់ អាចនឹងមានធ្ងន់ធ្ងរ និងអូសបន្លាយយូរ ជាងអ្វីដែលបានរំពឹងទុកទៅទៀត ដោយសារតែមានហានិភ័យនៃការធ្លាក់ចុះ ដូចជាទាក់ទងនឹងភាពធ្ងន់ធ្ងរនៃការផ្ទុះរាលដាលនៃមេរោគ និងវិធានការតឹងរ៉ឹងដើម្បីទប់ស្កាត់ការឆ្លងរាតត្បាតជាដើម។អត្ថបទគួរអាន
គិតចាប់តាំងពីថ្ងៃពុធសប្ដាហ៍នេះមក ប្រទេសថៃ លែងអនុញ្ញាតឲ្យអ្នកដំណើរអន្តរជាតិចូលមកក្នុងប្រទេសថៃដោយមិនធ្វើចត្តាឡីស័កតទៅទៀតហើយ ពោលគឺ អ្នកដំណើរអន្តរជាតិទាំងអស់ត្រូវតែធ្វើចត្តាឡីស័កឡើងវិញ ទៅតាមគោលការណ៍កំណត់ នៅពេលចូលមកដល់ទឹកដីថៃ។
ធនាគារកណ្ដាលថៃ រំពឹងថា នៅឆ្នាំ២០២២ ប្រទេសថៃនឹងទទួលបានអ្នកដំណើរបរទេសសរុប៥លាន៦សែននាក់ តិចជាងរំពឹងទុកពីមុនប្រមាណ ៤០ម៉ឺននាក់។
គួររំឭកបន្ដិចថា កាលពីពេលមិនទាន់មានកូវីដ១៩ចូលរាតត្បាត វិស័យទេសចរណ៍ និងអាជីវកម្មទាក់ទងនឹងវិស័យនេះ គឺបានចូលរួមចំណែកក្នុងផលិតផលក្នុងស្រុកសរុបរបស់ថៃ ដល់ទៅ ២០%ឯណោះ ហើយថៃ ធ្លាប់រំពឹងថា សេដ្ឋកិច្ចរបស់ខ្លួនអាចនឹងវិលទៅរកកំណើនដូចមុនពេលមានកូវីដ១៩ឡើងវិញបាន គឺត្រូវរង់ចាំដល់ឆ្នាំ២០២៣ខាងមុខ ក៏ប៉ុន្ដែ ក្រោយមានវត្តមានអូមីក្រុង ចូលមកលុកលុយ វាកំពុងធ្វើឲ្យទស្សនវិស័យនេះ ហាក់មានភាពស្រពេចស្រពិលនៅឡើយ៕© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
