ថៃ កំពុងរៀបចំយុទ្ធសាស្ត្រដើម្បីទាក់ទាញការវិនិយោគក្នុងវិស័យបន្ទះឈីប ស្របពេលចិន និងអាម៉េរិកកំពុងផ្ទុះសង្គ្រាមពន្ធ

ក្រុមអ្នកជំនាញសេដ្ឋកិច្ច និងពាណិជ្ជកម្មរបស់ប្រទេសថៃ កំពុងរៀបចំសេចក្តីព្រាងផែនការយុទ្ធសាស្ត្រសម្រាប់អភិវឌ្ឍន៍វិស័យឧស្សាហកម្មបន្ទះឈីប។ ជាមហិច្ឆតា ថៃ ចង់រៀបចំសេចក្តីព្រាងផែនការយុទ្ធសាស្រ្តនេះឱ្យបានរួចរាល់ក្នុងរយៈពេល៩០ថ្ងៃខាងមុខនេះ ដើម្បីទាក់ទាញការវិនិយោគថ្មីៗចំពេលមានសង្រ្គាមពាណិជ្ជកម្មជុំថ្មីរវាងមហាយក្សចិន និងអាម៉េរិក កំពុងត្រូវបានបង្កាត់ភ្លើងឡើង។

បើតាមការគូសបញ្ចាក់របស់លោក ណារិទ្ធ ថេតតេរ៉ាស៊ូឌី ( Narit Therdsteerasukdi) អគ្គលេខាធិការនៃក្រុមប្រឹក្សាវិនិយោគថៃ ក្រុមប្រឹក្សាភិបាលផ្នែកឧស្សាហកម្មបន្ទះឈីបរបស់ថៃ នឹងជួលអ្នកប្រឹក្សាយោបល់ជំនាញៗមកពីប្រទេសផ្សេងឱ្យចូលរួមជួយរៀបចំផែនការយុទ្ធសាស្ត្រដ៏មានសារសំខាន់នេះ។

តាមផែនការដែលគ្រោង ថៃចង់ទាក់ទាញគម្រោងវិនិយោគថ្មីៗពាក់ព័ន្ធនឹងឧស្សាហកម្មបន្ទះឈីបមានតម្លៃឱ្យបានរហូតដល់ជិត១៥ពាន់លានដុល្លារ នៅមុនឆ្នាំ២០២៩ ខាងមុខនេះ។ វិស័យឧស្សាហកម្មបន្ទះឈីបសកលមានការកើនឡើងយ៉ាងខ្លាំងនៅប៉ុន្មានឆ្នាំចុងក្រោយនេះ នៅពេលដែលសហរដ្ឋអាម៉េរិក និងចិន ប្រកួតប្រជែងគ្នា ដើម្បីបង្ហាញភាពលេចធ្លោផ្នែកបច្ចេកវិទ្យា។ ភាពតានតឹងផ្នែកពាណិជ្ជកម្មរវាងចិន និងអាម៉េរិក បានជំរុញឱ្យក្រុមហ៊ុនឧស្សាហកម្មមួយចំនួនបានផ្លាស់ប្តូរទីតាំងមកកាន់តំបន់អាស៊ីអាគ្នេយ៍ ស្របពេលដែលភាពចលាចលពាណិជ្ជកម្មរវាងចិន និងអាម៉េរិកថ្មីៗអាចនឹងផ្ទុះឡើងបន្ថែមទៀត ក្រោយលោក ដូណាល់ ត្រាំ បានប្រកាសដំឡើងពន្ធ១០% លើទំនិញនាំចូលពីចិន ដែលជាផ្នែកមួយ​នៃផែនការដើម្បីបង្កើនសមតុល្យពាណិជ្ជកម្មរបស់សហរដ្ឋអាម៉េរិក។

ក្រុមអ្នកវិភាគបានចាត់ទុកការរៀបចំផែនការយុទ្ធសាស្ត្រសម្រាប់អភិវឌ្ឍន៍វិស័យឧស្សាហកម្មបន្ទះឈីបខាងលើ គឺជាមហិច្ឆតាថ្មីមួយទៀតរបស់ថៃ បន្ទាប់ពីប្រទេសក្បែរខាងកម្ពុជា មួយនេះ ទាក់ទាញទុនវិនិយោគបានប្រមាណជាង៣៣ពាន់លានដុល្លារ កាលពីឆ្នាំ២០២៤ ដែលជាកម្រិតមួយខ្ពស់បំផុត៕

ដោយៈ សរ សុជាតិ