រដ្ឋមន្ត្រីក្រសួងពាណិជ្ជកម្មថៃលោក ជូរីន ឡាក់សាណាវីសិត (Jurin Laksanawisit) បាននិយាយថា ថ្មីៗនេះប្រទេសអារ៉ាប៊ីសាអ៊ូឌីតបានអនុញ្ញាតឱ្យក្រុមហ៊ុនផ្គត់ផ្គង់អារ៉ាប៊ីសាអូឌីតបន្ថែមចំនួន២ទៀតលក់ផលិតផលជីកសិកម្មទៅឱ្យប្រទេសថៃ ខណៈបច្ចុប្បន្នមានក្រុមហ៊ុនផ្គត់ផ្គង់ជីដល់ប្រទេសថៃ តែមួយប៉ុណ្ណោះ គឺក្រុមហ៊ុន Saudi Basic Industries Corporation ឬហៅថា SABIC។
ក្រុមហ៊ុនថ្មីទាំង២នេះគឺក្រុមហ៊ុន MA'ADEN ឬហៅថា ក្រុមហ៊ុន Saudi Arabian Mining Co និងក្រុមហ៊ុន ACO Group ដែលជាក្រុមហ៊ុនបុត្រសម្ព័ន្ធរបស់ក្រុមហ៊ុន Alim Investment Co.។
រដ្ឋមន្ត្រីក្រសួងពាណិជ្ជកម្មថៃ បាននិយាយថា នាយកដ្ឋានលើកកម្ពស់ពាណិជ្ជកម្មអន្តរជាតិថៃគ្រោងនឹងរៀបចំព្រឹត្តិការណ៍ផ្គូផ្គងអាជីវកម្មរវាងក្រុមហ៊ុនផ្គត់ផ្គង់ជីអារ៉ាប៊ីសាអូឌីតឈានមុខគេចំនួន៣ និងក្រុមហ៊ុននាំចូលជីរបស់ថៃនៅថ្ងៃទី២៩ ខែមិថុនាដោយអនុញ្ញាតឱ្យពាណិជ្ជករថៃអាចចរចាទិញជីពីក្រុមហ៊ុនទាំង៣នោះ។
លោកបានបន្តថា ការចរចានេះអាចជួយធានាបាននូវការផ្គត់ផ្គង់ជីគ្រប់គ្រាន់សម្រាប់ប្រទេសថៃក្នុងតម្លៃមួយសមរម្យជាងមុន។ លោកបានបន្ថែមថា តាមតួលេខរបស់សភាពាណិជ្ជកម្មថៃ និងសមាគមអ្នកផលិតនិងពាណិជ្ជកម្មជីរបស់ប្រទេសថៃបានបង្ហាញថា តម្រូវការជីសរុបរបស់ថៃពីប្រទេសអារ៉ាប៊ីសាអូឌីតមានប្រហែលជាង ៨០ម៉ឺនតោន រួមមានជីអ៊ុយរ៉េចំនួន ៥៩ ម៉ឺនតោន ជីផូហ្វាត ជាង ១៩ម៉ឺនតោន និងជីប៉ូតាត្យូម (potassium) ចំនួន ២ម៉ឺន៥ពាន់តោន។
អត្ថបទគួរអាន
ប្រទេសថៃ គឺជាអ្នកនាំចេញជីដ៏សំខាន់មួយ ប៉ុន្តែប្រទេសនេះត្រូវការជីប្រហែលជាង ៥ លានតោនក្នុងមួយឆ្នាំៗដោយនាំចូលមកពីប្រទេសនៅតំបន់មជ្ឈិមបូព៌ា ចិន កាណាដា និងរុស្ស៊ី ខណៈដែលផលិតកម្មជីរបស់ថៃអាចបំពេញតម្រូវការក្នុងស្រុកបានតែ ៨% តែប៉ុណ្ណោះ។
ដោយសារសង្គ្រាមរុស្ស៊ី និងអ៊ុយក្រែនបានផ្ទុះឡើងធ្វើឱ្យថ្លៃដើមផលិតកម្មកើនឡើងនោះ កាលពីថ្ងៃទី១៨ ខែមីនា នាយកដ្ឋានពាណិជ្ជកម្មផ្ទៃក្នុងថៃបានផ្តល់ការយល់ព្រមដល់ពាណិជ្ជករ និងអ្នកផ្គត់ផ្គង់ក្នុងស្រុកឱ្យដំឡើងតម្លៃជី ដោយផ្អែកតាមករណីសិក្សាជាក់ស្ដែង។
នាយកដ្ឋាននេះក៏បានស្នើសុំកិច្ចសហការពីសមាគមជីដើម្បីជួយត្រួតពិនិត្យសមាជិករបស់ខ្លួន ដើម្បីទប់ស្កាត់ការកេងចំណេញ ឬស្តុកទុក ហើយក៏បានគំរាមដកអាជ្ញាប័ណ្ណចែកចាយ និងចាត់វិធានការផ្លូវច្បាប់ ចំពោះអ្នកដែលកេងចំណេញឱកាសដោយធ្វើការដំឡើងតម្លៃផងដែរ។
មិនតែប៉ុណ្ណោះនាយកដ្ឋាននេះក៏បានស្នើសុំកិច្ចសហការពីមន្ត្រីក្រសួងពាណិជ្ជកម្មទូទាំងប្រទេសដើម្បីជួយពិនិត្យ តាមដាន និងត្រួតពិនិត្យការចែកចាយជីនៅតាមតំបន់រៀងៗខ្លួនផងដែរ។
សូមបញ្ជាក់ថា សម្រាប់រយៈពេល៤ខែដំបូងនៃឆ្នាំនេះ ពាណិជ្ជកម្មទ្វេភាគីរវាងប្រទេសថៃ និងអារ៉ាប៊ីសាអូឌីតមានជាង ២ពាន់ ៦រយលានដុល្លារ ពោលគឺបានកើនឡើងប្រមាណ៥៣% ធៀបនឹងឆ្នាំមុន។ ក្នុងចំណោមទឹកប្រាក់សរុបនេះគឺការនាំចេញពីប្រទេសថៃបានកើនឡើង ជាង១៩% ហើយការនាំចូលពីអារ៉ាប៊ីសាអូឌីតមានការកើនឡើងជាង ៦៥%៕
None
