និយតករអាកាសចរណ៍របស់ប្រទេសវៀតណាមបាននិយាយកាលពីថ្ងៃសុក្រថា ខ្លួនបានទទួលសំបុត្រពីសមភាគីចិន ដែលបានអនុញ្ញាតឱ្យក្រុមហ៊ុនអាកាសចរណ៍នៃប្រទេសវៀតណាមដំណើរការជើងហោះហើរដឹកអ្នកដំណើរចំនួនពីរដងក្នុងមួយសប្តាហ៍ទៅកាន់ទឹកដីប្រទេសចិន ខណៈកន្លងមកមានជើងហោះហើរទៅចិនត្រឹមមួយដងប៉ុណ្ណោះក្នុងមួយសប្ដាហ៍។
ទន្ទឹមនឹងនេះ ប្រព័ន្ធផ្សព្វផ្សាយរបស់ប្រទេសថៃបានរាយការណ៍ដែរថា ប្រទេសចិនបានយល់ព្រមបង្កើនជើងហោះហើរប្រចាំសប្តាហ៍រវាងប្រទេសនេះពី ១ ដង ទៅ ២ ដង ក្នុង ១ សប្តាហ៍ សម្រាប់ក្រុមហ៊ុនអាកាសចរណ៍ចំនួនប្រាំបី។
មន្ត្រីរដ្ឋបាលអាកាសចរណ៍ស៊ីវិលនៃប្រទេសចិន លោក Liang Nan បាននិយាយនៅក្នុងសន្និសីទសារព័ត៌មានមួយកាលពីថ្ងៃសុក្រថា និយតករចិនកំពុងចរចាជាមួយប្រទេសជាច្រើនទៀត ដើម្បីបង្កើនចំនួនជើងហោះហើរអន្តរជាតិបន្តិចម្តងៗបន្ថែមទៀតផងដែរ។
តាមរយៈចំណាត់ការទាំងនេះ ត្រូវបានគេរំពឹងទុកថា វាកំពុងឆ្ពោះទៅកាន់ភាពរីកចម្រើននៃឧស្សាហកម្មអាកាសចរណ៍ឡើងវិញ ដែលត្រូវបានរងគ្រោះដោយការរឹតបន្តឹងនៃវិធានការទប់ស្តាត់កូវីដ១៩។
គួររំឭកថា នៅក្រោមគោលនយោបាយរបស់ទីក្រុងប៉េកាំងក្នុងការទប់ស្តាត់ការរីករាលដាលនៃកូវីដ១៩ ក្នុងរយៈពេលពីរឆ្នាំកន្លងមកនេះ គឺតម្រូវឲ្យរាល់ក្រុមហ៊ុនអាកាសចរណ៍ក្នុងស្រុក និង ក្រៅប្រទេស ដែលត្រូវបានអនុញ្ញាតឱ្យហោះហើរត្រឡប់ពីប្រទេសចិនវិញ អាចធ្វើដំណើរទៅកាន់ប្រទេសមួយផ្សេងទៀតបានត្រឹមតែ ១ ជើងប៉ុណ្ណោះក្នុងមួយសប្តាហ៍។ ការរឹតត្បិតនេះបានរុញឧស្សាហកម្មអាកាសចរណ៍របស់ប្រទេសនេះធ្លាក់ចុះដល់កម្រិតទាបបំផុត។ ទិន្នន័យផ្លូវការបង្ហាញថា ក្រុមហ៊ុនអាកាសចរណ៍ចិនមួយចំនួនកំពុងប្រឈមមុខនឹងហានិភ័យនៃការក្ស័យធន ដោយក្រុមហ៊ុនអាកាសចរណ៍ដែលមានមូលដ្ឋាននៅចិនដីគោក បានរាយការណ៍ពីការខាតបង់សរុបចំនួន ១០ ពាន់លានដុល្លារកាលពីឆ្នាំមុន។
អត្ថបទគួរអាន
នៅចុងឆ្នាំ ២០២១ ក្រុមហ៊ុនអាកាសចរណ៍ចិនបានដំណើរការជើងហោះហើរអន្តរជាតិចំនួន ២៧៩ជើង ដែលតិចជាង ៧០% ធៀបនឹងឆ្នាំ ២០១៩ មុនពេលជំងឺរាតត្បាត ហើយពួកគេទទួលបានអ្នកធ្វើដំណើរចំនួនត្រឹមតែប្រមាណជិត១លាន៥សែននាក់ប៉ុណ្ណោះ ស្មើនឹង ២% បើធៀបនឹងចំនួនសរុបក្នុងឆ្នាំ ២០១៩។ នេះបើយោងតាម រដ្ឋបាលអាកាសចរណ៍ស៊ីវិលនៃប្រទេសចិន ។
ថ្វីបើទីក្រុងប៉េកាំងមានការបង្កើនការបើកជើងហោះហើរសម្រាប់ក្រុមហ៊ុនអាកាសចរណ៍ក្នុងប្រទេសមួយចំនួនក្តី ប៉ុន្តែរដ្ឋាភិបាលចិនបាននិយាយថា ខ្លួននឹងផ្អាកជើងហោះហើរអន្តរជាតិ ដែលហោះមកកាន់ប្រទេសចិនភ្លាម ប្រសិនបើជើងហោះហើរណាមួយត្រូវបានគេរកឃើញថា មានករណីវិជ្ជមានកូវីដ ១៩ ។ ក្នុងនោះ វិធានការទាំងនេះនៅតែបន្តធ្វើឱ្យឧស្សាហកម្មទេសចរណ៍ធ្លាក់ចុះ ខណៈកាលពីសប្តាហ៍មុន រដ្ឋបាលអាកាសចរណ៍ស៊ីវិលនៃប្រទេសចិន បានបញ្ជាឱ្យផ្អាកជើងហោះហើរអន្តរជាតិមួយចំនួន បន្ទាប់ពីពួកគេបានរកឃើញអ្នកដំណើរលើសពី ៥ នាក់មានផ្ទុកមេរោគកូវីត ១៩។
គួរជម្រាបថា ក្រុមហ៊ុនអន្តរជាតិជាច្រើនដែលកំពុងប្រតិបត្តិការនៅក្នុងប្រទេសចិនបាននឹងកំពុងតែត្អូញត្អែរអំពីការកើនឡើងតម្លៃសំបុត្រយន្តហោះ និង ការលំបាកក្នុងការធ្វើដំណើរឆ្លងដែន ដែលបានរំខានដល់ការហោះហើរផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
