![កាបូបលុយឌីជីថល](https://cdn.cambonomist.com/media/images/thkrngnvttkbbl123131.2e16d0ba.fill-960x540.jpg)
រដ្ឋាភិបាលថៃបានប្រកាសកាលពីខែមេសា អំពីផែនការដ៏មហិច្ឆិតាមួយ ដែលគេហៅថាផែនការកាបូបឌីជីថល (Digital Wallet)។ ផែនការនេះបានរងការរិះគន់យ៉ាងទូលំទូលាយដោយសារវាត្រូវផ្ដល់ប្រាក់ឌីជីថលដល់ពលរដ្ឋចំនួន៥០លាននាក់ដោយម្នាក់ៗនឹងទទួលបានចំនួន១ម៉ឺនបាតប្រហែល២៧៥ដុល្លារ ដើម្បីចំណាយនៅក្នុងអាជីវកម្មក្នុងស្រុក។
នាយករដ្ឋមន្ត្រីថៃលោក ស៊្រីថា ថាវីស៊ីន បាននិយាយតាមប្រព័ន្ធផ្សព្វផ្សាយសង្គម X ថា ការចុះឈ្មោះដើម្បីទទួលបានថវិកានេះ នឹងចាប់ផ្តើមពីថ្ងៃទី១ ខែសីហា ហើយលោកបានផ្តល់ការណែនាំ ដើម្បីធានាឱ្យការអនុវត្តកម្មវិធីនេះប្រព្រឹត្តទៅដោយរលូន។ រដ្ឋាភិបាលថៃបាននិយាយថា កាបូបឌីជីថលនេះ នឹងបង្កព្យុះភ្លៀងដល់សេដ្ឋកិច្ច ហើយការជំរុញការប្រើប្រាស់គម្រោងការនេះជាបន្តបន្ទាប់ ត្រូវបានគេរំពឹងថា នឹងជួយជំរុញកំណើនផលិតផលក្នុងស្រុកសរុបចន្លោះពី១,២%ទៅ១,៦%។
គួរបញ្ជាក់ថា គម្រោងកាបូបលុយឌីជីថល ដែលបានបង្កើតឡើងដោយលោក ស្រ៊ីថា ថាវីស៊ីន នេះបានជួបប្រឈមនឹងឧបសគ្គដ៏ចម្រូងចម្រាសជាច្រើន ដែលជាហេតុធ្វើឱ្យមានការពន្យារពេលក្នុងការអនុវត្តផែនការនេះ។ ដំបូងឡើយ រដ្ឋាភិបាលបាននិយាយថា ធនាគាររដ្ឋសម្រាប់កសិកម្ម និងសហករណ៍កសិកម្មនឹងរ៉ាប់រងថវិកាមួយចំនួន ប៉ុន្តែបន្ទាប់ពីការព្រមានពីក្រុមអ្នកជំនាញហិរញ្ញវត្ថុហើយ គេបានប្រកាសថា មូលនិធិរបស់គម្រោងនេះនឹងចេញពីថវិកាសារពើពន្ធឆ្នាំ២០២៤ និង២០២៥ទៅវិញ។
យ៉ាងណាក៏ដោយ អនុរដ្ឋមន្ត្រីក្រសួងហិរញ្ញវត្ថុលោក ជូឡាផាន អាម៉នវីវ៉ាត (Julapan Amornvivat) បានអះអាងកាលពីពេលថ្មីៗថា ការផ្តល់ថវិកាតាមគម្រោងនេះកាន់តែអាចធ្វើទៅបាន បន្ទាប់ពីការចំណាយសម្រាប់ផែនការនេះបានធ្លាក់ចុះពី១៣,៨ពាន់លានដុល្លារមកនៅត្រឹមតែ១២,៤ពាន់លានដុល្លារ។ ការធ្លាក់ចុះទំហំចំណាយនេះ គឺដោយសារចំនួនប្រជាជនសរុបប្រមាណ៥០លាននាក់ នឹងត្រូវកាត់ចេញឱ្យនៅសល់៩០% ដោយសារពួកគេមានប្រវត្តិធ្លាប់ប្រព្រឹត្តការឆបោកនាពេលកន្លងមក៕
អត្ថបទ៖ សុខ មង្គល