រាជរដ្ឋាភិបាលថៃ បានបើកទ្វារទទួលភ្ញៀវទេសចរអន្តរជាតិមកពី ៥៦ប្រទេស ដែលរួមមានទាំងប្រទេសអូស្រ្តាលី បារាំង និងអាមេរិក ដែលអាចធ្វើដំណើរមកកម្សាន្តនៅក្នុងប្រទេសថៃ ដោយពុំត្រូវការវីសា នោះទេ តែតម្រូវឲ្យបង្ហាញលិខិតបញ្ជាក់ថា ពួកគេគ្មានជម្ងឺកូវីដ១៩នោះទេ ដែលត្រូវបញ្ជាក់ក្នុងរយៈពេល ៣ថ្ងៃ មុនមកដល់ប្រទេសថៃ។
លើសពីនេះទៅទៀត អ្នកដំណើរក៏ត្រូវធ្វើការកក់ និងស្នាក់នៅសណ្ឋាគាររយៈពេល ១៤ថ្ងៃជាមុនសិន ហើយចំពោះអ្នកប្រើប្រាស់វីសា ដែលមានសុពលភាព ៣០ថ្ងៃ នឹងត្រូវពន្យារពេលជូនដល់ ៤៥ថ្ងៃវិញ។
នៅក្នុងអំឡុងពេលធ្វើចត្តាឡីស័ក ភ្ញៀវទេសចរអន្តរជាតិ ត្រូវធ្វើតេស្តរកមេរោគកូវីដ១៩ ចំនួន ៣ដង ច្រើនជាងពេលមុន ដែលធ្វើតេស្តតែ ២ដង ហើយបើតាមការអះអាងរបស់អាជ្ញាធរថៃ ថា ការធ្វើតេស្តច្រើនដងនេះ នឹងធ្វើឲ្យមានភាពច្បាស់លាស់ ខណៈដែលពេលវេលាធ្វើចត្តាឡីស័ក ក៏អាចនឹងត្រូវកាត់បន្ថយនាពេលខាងមុខផងដែរ។
អត្ថបទទាក់ទង!
បើតាមមន្រ្តីសុខាភិបាលថៃបានបង្ហើបថា ការផ្លាស់ប្តូរលក្ខខណ្ឌធ្វើតេស្តនេះ នឹងបន្តរហូតដល់ដំណាច់ឆ្នាំ ២០២០នេះ ដែលក្រសួងសុខាភិបាលថៃ នឹងធ្វើការសិក្សាវាយតម្លៃថា រយៈពេលចត្តាឡីស័ក អាចកាត់បន្ថយមកត្រឹម ១០ថ្ងៃបានឬយ៉ាងណា។
រដ្ឋមន្រ្តីក្រសួងសុខាភិបាលថៃ បានគូសបញ្ជាក់បន្ថែមថា ការកាត់បន្ថយរយៈពេលចត្តាឡីស័ក គឺមានភាពទាក់ទាញសម្រាប់ភ្ញៀវទេសចរអន្តរជាតិ ហើយលក្ខខណ្ឌនេះ អាចនឹងដាក់ឲ្យប្រើប្រាស់សម្រាប់បណ្តាប្រទេស ដែលមានហានិភ័យឆ្លងទាបជាមុនសិន។
គួរជម្រាបដែរថា នាយករដ្ឋមន្រ្តីថៃ ប្រាយុទ្ធ ច័ន្ទអូចា បានសង្កត់ធ្ងន់ថា អាជ្ញាធរថៃ អាចនឹងធ្វើការលុបចោលនូវ កម្មវិធីអបអរសាទរឆ្នាំថ្មី ណាមួយ ដែលពុំបានគោរពទៅតាមវិធានការគ្រប់គ្រងមេរោគកូវីដ១៩៕
None
