បន្ទាប់ពីការដាក់ចេញនូវគម្រោង Phuket Sandbox ប្រទេសថៃបានស្វាគមន៍ភ្ញៀវទេសចរដែលបានចាក់វ៉ាក់សាំងរួច ឱ្យចូលកំសាន្តនៅកោះភូកេត ដោយមានការលើកលែងការធ្វើចត្តាឡីស័ក។ ក្រសួងទេសចរណ៍ និងកីឡាបាននិយាយថា រយៈពេល ១៤ថ្ងៃដំបូងនៃគម្រោង Phuket Sandbox នឹងក្លាយជាការសាកល្បងសំខាន់មួយក្នុងការទទួលភ្ញៀវទេសចរ និងដើម្បីត្រួសត្រាយផ្លូវទៅកាន់បើកតំបន់កម្សាន្ដផ្សេងទៀតនៅភាគខាងត្បូងប្រទេសថៃ។
កាលពីថ្ងៃទី០១ ខែកក្កដា លោក Phiphat Ratchakitprakarn រដ្ឋមន្រ្តីក្រសួងទេសចរណ៍ និងកីឡាបានមានប្រសាសន៍ថា ភ្ញៀវទេសចរ ៥០០នាក់បានកក់សំបុត្រធ្វើដំណើរទៅកោះភូកេត ប៉ុន្តែមានការពន្យារពេលនៃការធ្វើដំណើរខ្លះ។ លោកបានមានប្រសាសន៍បន្តទៀតថា ភ្ញៀវទេសចរមកដល់ត្រូវតែផ្ទៀងផ្ទាត់ឯកសារធ្វើដំណើរ និងធ្វើតេស្តកូវីដ-១៩ ដោយមិនលើសពី៣០នាទី ហើយពួកគេអាចរង់ចាំនៅសណ្ឋាគាររបស់ពួកគេដើម្បីទទួលបានលទ្ធផល។
អត្ថបទទាក់ទង!
ភូកេតជាគោលដៅកោះទេសចរណ៍ ដ៏ពេញនិយមបំផុតរបស់ប្រទេសថៃបានស្វាគមន៍ភ្ញៀវទេសចរអន្តរជាតិជាលើកដំបូងបន្ទាប់ពីការផ្អាកអស់រយៈពេល ១៥ខែ។
អភិបាលនៃអាជ្ញាធរទេសចរណ៍ថៃ លោកYuthasak Supasorn បានមានប្រសាសន៍ថា អ្នកដំណើរមកដល់ តាមរយៈជើងហោះហើរអន្តរជាតិចំនួន ៤ នៅថ្ងៃដំបូងមានចំនួនសរុប ៣៦៦ នាក់ ដោយមាន ២៥ នាក់ធ្វើដំណើរតាមអាកាសចរណ៍ Etihad Airways, ១៣៦នាក់ធ្វើដំណើរតាមអាកាសចរណ៍ Qatar Airways, ១៣៧ នាក់ធ្វើដំណើរតាមអាកាសចរណ៍ El Al Israel Airlines និង ៦៨ នាក់ទៀតធ្វើដំណើរតាមអាកាសចរណ៍សិង្ហបុរី។
តាមតារាងធ្វើដំណើរ នឹងមានអ្នកដំណើរមកដល់ ៤៣៧នាក់ទៀត នៅថ្ងៃសុក្រទី ០២ ខែកក្កដានេះ ខណៈអ្នកដំណើរ ២២០នាក់ទៀតគ្រោងនឹងមកដល់នៅថ្ងៃសៅរ៍ និង ៨៨ នាក់ទៀតមកដល់នៅថ្ងៃអាទិត្យ។
រដ្ឋមន្រ្តីក្រសួងទេសចរណ៍ និងកីឡាថៃបានលើកឡើងថា បើសិនជាគ្មានការផ្ទុះរាលដាលកូវីដ-១៩នៅលើកោះភូកេតក្នុងរយៈពេល ២សប្ដាហ៍ទេនោះ រដ្ឋាភិបាលនឹងបន្ដគម្រោងបើកកោះសាមុយមួយទៀត នៅថ្ងៃទី១៥ ខែកក្កដា បន្ទាប់មកនឹងបើកកោះក្រាប៊ី និងផាងង៉ា នៅខែសីហាខាងមុខ។
បើតាមលោក Phiphat Ratchakitprakarn បញ្ជាក់ថាគម្រោង Phuket Sandbox មិនអាចបរាជ័យបាននោះ លើសពីនេះទៅទៀតគម្រោងនេះផ្តល់ក្តីសង្ឃឹម និងបង្កើនទំនុកចិត្តដែលធ្វើឱ្យចរន្តសេដ្ឋកិច្ចនៃវិស័យទេសចរប្រទេសនេះត្រឡប់មកវិញ៕
អត្ថបទប្រែសម្រួលដោយ ស៊ើង និមន់ (អ្នកហាត់ការផ្នែកយកព័ត៌មានសេដ្ឋកិច្ច)
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
