រដ្ឋមន្ត្រីក្រសួងការងាររបស់ថៃ លោក ស៊ូឆាត ជុមឃ្លីន (Suchart Chomklin) បាននិយាយថា រាជរដ្ឋាភិបាលថៃបានចុះហត្ថលេខាលើ អនុស្សរណៈយោគយល់គ្នា ជាមួយប្រទេសកម្ពុជា ឡាវ និងមីយ៉ាន់ម៉ាកាលពីខែធ្នូឆ្នាំមុន ដើម្បីធានាឱ្យបាននូវការទប់ស្កាត់ការរីករាលដាលនៃជំងឺកូវីដ១៩ និងឆ្លើយតបទៅនឹងតម្រូវការកើនឡើងសម្រាប់ពលករចំណាកស្រុកនៅក្នុងប្រទេសថៃ។
រដ្ឋមន្ត្រីក្រសួងការងាររបស់ថៃ លោកស៊ូឆាត បានបន្តអះអាងថា ពលករខ្មែរចំនួន២២៦នាក់នោះ នឹងត្រូវបញ្ជូនមកប្រទេសថៃតាមសំណើរបស់និយោជកនៅខេត្ត ឈុនបុរី និង អយុធ្យា។ ក្នុងនោះកម្មករសរុបចំនួន ២២០ នាក់នឹងត្រូវបញ្ជូនទៅខេត្ត ចាន់បុរី ហើយកម្មករ ៦ នាក់ទៀត នឹងត្រូវបញ្ជូនទៅខេត្ត អយុធ្យា។
តើពេលទៅដល់ប្រទេសថៃពលករត្រូវបំពេញតាមលក្ខខណ្ឌអ្វីខ្លះ? នៅពេលពលករមកដល់ប្រទេសថៃតាមរយៈច្រកត្រួតពិនិត្យអន្តោប្រវេសន៍ក្នុងខេត្តស្រះកែវហើយ ពលករខ្មែរទាំងអស់នឹងត្រូវចំណាយពេល ៧ ថ្ងៃនៅក្នុងមជ្ឈមណ្ឌលចត្តាឡីស័ក ក្រោមការត្រួតពិនិត្យស្តង់ដារកូវីដ-១៩ ។
អត្ថបទគួរអាន
យ៉ាងណាមិញ បើតាមអគ្គនាយក នៃនាយកដ្ឋានការងារថៃ បានដឹងថា សម្រាប់ការចំណាយលើការធ្វើចត្តាឡីស័កនេះមានតម្លៃជាង ២៥០ដុល្លារក្នុងមនុស្សម្នាក់ ដោយបូករួមទាំងអាហារបីពេលក្នុងមួយថ្ងៃ និងសេវាផ្ទេរប្រាក់ពីប៉ុស្តិ៍ត្រួតពិនិត្យទៅកាន់មជ្ឈមណ្ឌលផងដែរ។
ទន្ទឹមនេះ ពលករខ្មែរទាំងអស់គួរតែត្រូវបានចាក់វ៉ាក់សាំងចំនួន ២ដង មុនពេលពួកគេចូលទៅកាន់ប្រទេសថៃ។ ប៉ុន្តែប្រសិនបើក្នុងករណីពួកគេមិនទាន់បានចាក់វ៉ាក់សាំងទេ ពួកគេអាចចាក់បានក្នុងអំឡុងពេលស្នាក់នៅមណ្ឌលចត្តាឡីស័ក។
សូមជម្រាបថា ពលករចំណាកស្រុកថ្មីទាំងនេះ រួមជាមួយនឹងពលករចាស់ៗ ដែលបានចូលមកប្រទេសថៃដោយខុសច្បាប់ ហើយក្រោយមកត្រូវបានអនុញ្ញាតឱ្យចុះឈ្មោះធ្វើការដោយស្របច្បាប់វិញនោះ នឹងចាប់ផ្តើមចូលធ្វើការក្នុងប្រទេសថៃចាប់ពីថ្ងៃទី ១៣ ខែកុម្ភៈខាងមុខនេះតទៅ៕
អត្ថបទ ស៊ើង និមល់
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
