លោកបណ្ឌិត ប៉ា ចាន់រឿន អ្នកជំនាញផ្នែកទស្សនវិជ្ជា អប់រំ និងជាប្រធានវិទ្យាស្ថានប្រជាធិបតេយ្យកម្ពុជា យល់ឃើញថា ការរៀបចំកម្មវិធីសង្ក្រាន្តភាគច្រើននៅតាមគ្រឹះស្ថានសិក្សា អប់រំ ជាកម្មវិធីមួយល្អ ដើម្បីចូលរួមចំណែកអបអរពិធីបុណ្យចូលឆ្នាំថ្មីប្រពៃណីខ្មែរ ក៏ដូចជាជួយបណ្ដុះស្មារតីយុវជនឱ្យចេះថែរក្សាវប្បធម៌ប្រពៃណី តែការរៀបចំតម្រូវឱ្យមានការយកចិត្តទុកដាក់ខ្ពស់ ដោយគិតគូរពីសណ្ដាប់ធ្នាប់សារធារណៈ ពោលគឺមិនត្រូវឱ្យលេចឡើងនៅរូបភាពច្របូកច្របល់នាំឱ្យកកស្ទះចរាចរណ៍ ការសេពគ្រឿងស្រវឹង ពិសេសការកេងប្រវ័ញ្ចបៀតបៀនក្មេងស្រីជាសារធារណៈ ដែលនាំឱ្យកម្មវិធីសប្បាយក្លាយជាទុក្ខបាន។
បើតាមអ្នកជំនាញរូបនេះ ក្រសួងអប់រំ យុវជន និងកីឡា គួរតែចេញសារាចរណែនាំដល់គ្រឹះស្ថានសិក្សាទាំងអស់ឱ្យប្រុងប្រយ័ត្នឱ្យបានខ្ពស់ពីសន្តិសុខសណ្ដាប់ធ្នាប់ សេចក្ដីថ្លៃថ្នូរ នៅពេលមានគម្រោងរៀបចំកម្មវិធីសង្ក្រាន្តម្តងៗ។
ជាមួយគ្នានេះ លោកបណ្ឌិត ឈត ប៊ុនថង អ្នកស្រាវជ្រាវ និងជាអ្នកជំនាញទស្សនវិជ្ជានៃរាជបណ្ឌិត្យសភាកម្ពុជា បានលើកឡើងថា សម្រាប់ការរៀបចំឱ្យមានកម្មវិធីសង្ក្រាន្តនៅតាមវិទ្យាស្ថានអប់រំ ក៏ដូចជាវិទ្យាល័យទាំងរដ្ឋ និងឯកជន គឺជារឿងល្អ ពីព្រោះវាបានបង្ហាញពីកម្ពុជា ជាម្ចាស់ដើមនៃប្រពៃណីទំនៀមទម្លាប់មួយនេះ ហើយក៏បានបង្ហាញពីការចូលរួមរបស់ប្រជាពលរដ្ឋ ដើម្បីថែរក្សាកេរដំណែល ដែលដូនតាបានបន្សល់ទុកឱ្យផងដែរ។
អត្ថបទគួរអាន
តែយ៉ាងណាអ្នកជំនាញរូបនេះ យល់ឃើញថា មុនពេលការរៀបចំកម្មវិធីនេះឡើងត្រូវថ្លឹងថ្លែងធ្វើយ៉ាងណាកុំឱ្យប្រាសចាកពីវប្បធម៌ ហើយត្រូវជៀសវាងការរៀបចំចម្លងតាមប្រទេសដទៃ។ ហើយការរៀបចំកម្មវិធីនេះទៀតសោត គួរតែមានគណៈកម្មការត្រួតពិនិត្យ ដើម្បីឃ្លាំមើលការពារសុវត្ថិភាពទ្រព្យសម្បត្តិរបស់អ្នកចូលរួម ការពារការបៀនប្រៀនលើក្មេងស្រីជាដើម។
ដោយឡែក លោកជំទាវ ឃួន វិច្ឆិកា អ្នកនាំពាក្យក្រសួងអប់រំ យុវជន និងកីឡា បានប្រាប់សារព័ត៌មានខេមបូណូមីស ថា កន្លងមកក្រសួងអប់រំ យុវជន និងកីឡា ធ្លាប់បានចេញសេចក្ដីណែនាំដល់គ្រឹះស្ថានសិក្សាឱ្យរៀបចំកម្មវិធីសង្ក្រាន្តទៅតាមលទ្ធភាពដែលខ្លួនមាន ដើម្បីជាចំណែកចូលរួមអភិរក្ស ថែរក្សា នូវសម្បត្តិវប្បធម៌ជាតិ។ បើតាមអ្នកនាំពាក្យរូបនេះ បញ្ហាអសណ្ដាប់ធ្នាប់ ដែលបានកើតមានឡើងកាលពីពេលថ្មីៗនេះ ក្រសួងអប់រំ យុវជន និងកីឡា នឹងចេញសេចក្ដីណែនាំបន្ថែមទៀត ដើម្បីពង្រីងការរៀបចំសង្ក្រាន្តតាមសាលាឱ្យមានសុវត្ថិភាព។ បើតាមការគូសបញ្ជាក់របស់លោកជំទាវ ឃួន វិច្ឆិកា បច្ចុប្បន្នក្រសួងអប់រំ យុវជន និងកីឡា កំពុងចាត់វិធានការលើបញ្ហា ដែលបានកើតឡើងក្នុងកម្មវិធីសង្ក្រាន្តកាលពីប៉ុន្មានថ្ងៃមុននេះ។
គួរបញ្ជាក់ថា រាជរដ្ឋាភិបាលកម្ពុជា បានជំរុញឱ្យក្រសួងស្ថាប័នពាក់ព័ន្ធរៀបចំឯកសារ ដើម្បីដាក់បញ្ចូលក្នុងកម្មវិធីសង្រ្កាន្តជាសម្បត្តិបេតិកភណ្ឌអរូបីនៃមនុស្សជាតិ របស់អង្គការយូណេស្កូ។ ជាមួយគ្នានេះ ដើម្បីឱ្យស័ក្ដិសមនឹងភាពជាម្ចាស់ ក្រសួងពាក់ព័ន្ធទាំងអស់គួរតែផលិតជាវីដេអូគំរូ ដែលបង្ហាញពីការរៀបចំសង្ក្រាន្តឱ្យមានរបៀបរៀបរយ និងមានសណ្ដាប់ធ្នាប់ល្អ ដើម្បីជៀសវាងការខូចទ្រង់ទ្រាយដើមនូវឯកសារត្រៀមបញ្ចូលសង្ក្រាន្តជាសម្បត្តិបេតិកភណ្ឌអរូបីនៃមនុស្សជាតិ របស់អង្គការយូណេស្កូ៕
អត្ថបទដោយ៖ ជា ម៉ារ៉ា
