តើអ្វីខ្លះជាបញ្ហាប្រឈមបច្ចុប្បន្ន នៃប្រព័ន្ធហិរញ្ញវត្ថុ សហរដ្ឋអាម៉េរិក?

ការស្ទង់មតិរបស់ធនាគារកណ្តាល បានរកឃើញបញ្ហាប្រឈមកំពូលយ៉ាងហោចណាស់បី ដែលនឹងបង្កផលប៉ះពាល់ជាអវិជ្ជមានដល់ប្រព័ន្ធហិរញ្ញវត្ថុរបស់សហរដ្ឋអាម៉េរិកដោយផ្ទាល់ ។

ប្រភពដដែលបានបន្តថា ការស្ទង់មតិនេះ បានរកឃើញថា ការកើនឡើងនូវហានិភ័យជុំវិញពាណិជ្ជកម្មសកល ភាពមិនប្រាកដប្រជានៃគោលនយោបាយទូទៅ និងនិរន្តរភាពនៃបំណុលរបស់សហរដ្ឋអាម៉េរិក បានឈរនៅលើកំពូលតារាងនៃហានិភ័យដែលអាចកើតមានចំពោះប្រព័ន្ធហិរញ្ញវត្ថុរបស់សហរដ្ឋអាម៉េរិក។ ​

ការស្ទង់មតិថ្មី ដែលបានចេញផ្សាយកាលពីថ្ងៃ២៥ ខែមេសា បានអះអាងថា ៧៣% នៃអ្នកដែលត្រូវបានសាកសួរ បានអះអាងថា ហានិភ័យពាណិជ្ជកម្មសកល ជាកង្វល់កំពូលបំផុត ចាប់តាំងពីលោកប្រធានាធិបតី ដូណាល់ ត្រាំ បានវិលត្រលប់ចូលកាន់តំណែង ហើយបានប្រកាសចេញនូវ គោលនយោបាយពន្ធគយបដិការដ៏ក្តៅគគុកលើប្រទេសនានា ។

ការសិក្សាដដែលបានបន្តថា ក្រៅពីនោះពាក់កណ្តាលនៃអ្នកដែលបានសាកសួរបានលើកឡើងពីភាពមិនប្រាកដប្រជានៃគោលនយោបាយជាទូទៅ ហើយតាមពីក្រោយដោយបញ្ហា ពាក់ព័ន្ធនឹងបំណុលសាធារណៈរបស់មហាអំណាចនេះ ។

ប្រភពដដែលបានបន្តថា ការព្រួយបារម្ភលើការផ្លាស់ប្តូរគោលនយោបាយពាណិជ្ជកម្ម គឺជាហានិភ័យកំពូល ហើយក៏ជឿជាក់ដែរថា ផលនៃសង្គ្រាមពាណិជ្ជកម្ម ដែលកើនឡើងអាចមានផលវិបាកកាន់តែធ្ងន់ធ្ងរជាងពេលនេះ។

ការព្រួយបារម្ភនេះត្រូវបានបង្ហាញនៅអំឡុងពេលដែលអ្នកតាក់តែងគោលនយោបាយហិរញ្ញវត្ថុជាសាកល​ កំពុងប្រមូលផ្តុំគ្នានៅទីក្រុងវ៉ាស៊ីនតោន ដែលជាមូលដ្ឋានរបស់អង្គការហិរញ្ញវត្ថុកំពូលពីរ គឺ មូលនិធិរូបិយវត្ថុអន្តរជាតិ (IMF) និង ធនាគារពិភពលោកជួបប្រជុំគ្នាដើម្បីពិភាក្សាអំពីបញ្ហាសណ្តាប់ធ្នាប់សេដ្ឋកិច្ចដែលគ្រប់គ្រងឡើងដោយសហរដ្ឋអាម៉េរិក​នៅក្នុងរយៈពេលប្រមាណជា ៨០ ឆ្នាំកន្លងមក៕

ដោយៈ សរ សុជាតិ