សន្ទស្សន៍តម្លៃលុយដុល្លារអាម៉េរិក នៅថ្ងៃចន្ទ ដើមសប្តាហ៍នេះ បានកើនឡើង០,១% បើធៀបនឹងប្រាក់យ៉េនរបស់ជប៉ុន ដោយឡើងដល់មួយដុល្លារអាម៉េរិក អាចប្ដូរបាន១៥៣,៩១យ៉េន ដែលជាការកើនឡើងជិតដល់កម្រិតកំពូលលើកដំបូង បើគិតចាប់តាំងពីថ្ងៃទី២៦ ខែវិច្ឆិកា ដែលពេលនោះមួយដុល្លារអាចប្ដូរបាន១៥៣,៨៧យ៉េន។
ការហក់ឡើងថ្លៃរបស់លុយដុល្លារអាម៉េរិកនេះ កើតឡើងក្រោយក្រុមឈ្មួញមានការរំពឹងទុកខ្ពស់ថា ធនាគារកណ្ដាលរបស់អាម៉េរិកនឹងកាត់បន្ថយអត្រាការប្រាក់គោលប្រហែល០,២៥% ថែមទៀត នៅក្នុងកិច្ចប្រជុំគោលនយោបាយរូបិយវត្ថុនៅថ្ងៃពុធ សប្ដាហ៍នេះ ខណៈអតិផរណាកំពុងធ្វើដំណើរការឆ្ពោះទៅរកគោលដៅប្រចាំឆ្នាំ២% តាមការកំណត់របស់ធនាគារកណ្តាលមួយនេះ។
ប៉ុន្តែក្រុមអ្នកវិភាគបាននិយាយថា ពួកគេនៅមិនទាន់អាចដឹងច្បាស់ពីកម្រិតអតិផរណា ដែលអាចនឹងកើនឡើងជាថ្មីនៅពេលលោក ដូណាល់ ត្រាំ ចូលកាន់តំណែងនៅខែមករា ខាងមុខនេះនៅឡើយទេ ដោយសារលោកគ្រោងនឹងដំឡើងពន្ធបន្ថែមទៀត។
ទោះជាយ៉ាងណា ការឡើងកាន់តំណែងជាផ្លូវការរបស់លោក ត្រាំ ក្នុងពេលខាងនេះ ក៏ក្លាយជាចលករដ៏ខ្លាំងមួយដល់រូបិយប័ណ្ណឌីជីថល ឬគ្រីបតូផងដែរ។ ជាក់ស្ដែងនៅថ្ងៃចន្ទ ដើមសប្តាហ៍នេះ តម្លៃរូបិយប័ណ្ណ Bitcoin បានហក់ឡើងដល់ជាង១០ម៉ឺន៥ពាន់ដុល្លារក្នុងមួយកាក់ជាលើកដំបូង។
ការហក់ឡើងថ្លៃខ្ពស់របស់ Bitcoin នេះ បានកើតឡើងបន្ទាប់ពីមានការផ្ដល់សញ្ញាពីលោក ត្រាំ នៅក្នុងបទសម្ភាសជាមួយនឹងទស្សន៍ CNBC កាលពីថ្ងៃសុក្រ ថា លោកនឹងបន្តជំរុញទុនបម្រុងជា Bitcoin ដ៏មានសក្តានុពលមួយនេះ ហើយលោក ត្រាំ ក៏ធ្លាប់បានសន្យាក្នុងយុទ្ធនាការបោះឆ្នោតថា លោកនឹងធ្វើឱ្យសហរដ្ឋអាម៉េរិកក្លាយជារដ្ឋធានីនៃពិភពគ្រីបតូផងដែរ៕
អត្ថបទ៖ សុខ មង្គល
