រដ្ឋមន្ត្រីក្រសួងហិរញ្ញវត្ថុថៃ លោក ពិឆៃ ឈុនហាវ៉ាជីរ៉ា (Pichai Chunhavajira) បានប៉ាន់ប្រមាណជាបឋមថា នៅក្នុងរយៈពេល៥ថ្ងៃនៃការបញ្ឆេះសង្គ្រាមឈ្លានពានមកលើកម្ពុជា ខ្លួនខាតបង់អស់ ប្រមាណជាង៣០០លានដុល្លារអាម៉េរិក។ ជាមួយគ្នានេះរដ្ឋាភិបាលថៃ កំពុងដាក់ចេញកញ្ចប់ថវិកាជំហានដំបូងចំនួន ៧៧១លានដុល្លារអាម៉េរិក ដើម្បីដោះស្រាយផលប៉ះពាល់ ប៉ុន្តែថវិកានេះទំនងជាមិនគ្រប់គ្រាន់នោះទេ ព្រោះការប៉ាន់ប្រមាណបឋមពីទំហំខូចខាតនេះ មិនទាន់រាប់បញ្ចូលការរអាក់រអួលដល់ពាណិជ្ជកម្មនៅឡើយទេ។
នៅក្នុងសេចក្តីថ្លែងការណ៍ដាច់ដោយឡែកមួយ លោក ពិឆៃ រដ្ឋមន្ត្រីក្រសួងហិរញ្ញវត្ថុថៃ បាននិយាយថា ក្រសួងហិរញ្ញវត្ថុថៃ បានប្រកាសដាក់ចេញវិធានការផ្សេងៗ ដើម្បីជួយដល់ប្រជាជន និងអាជីវកម្ម ដែលរងផលប៉ះពាល់ដោយសារជម្លោះព្រំដែនកម្ពុជា-ថៃ។ លោកបាននិយាយថា បណ្ដាធនាគារដែលគ្រប់គ្រងដោយរដ្ឋកំពុងដាក់ចេញវិធានការ រួមមាន ការពន្យាពេលសងប្រាក់កម្ចី ការផ្ដល់ប្រាក់កម្ចីដែលមានការប្រាក់ទាប ការផ្ដល់ជម្រើសនៃការរៀបចំឥណទានឡើងវិញ និងការលើកលែងថ្លៃសេវាផងដែរ។
រដ្ឋមន្ត្រីក្រសួងហិរញ្ញវត្ថុថៃ រូបនេះ បានលើកឡើងទៀតថា ទន្ទឹមនេះក៏មានការដាក់ចេញវិធានការពន្ធ រួមមានការពន្យារកាលបរិច្ឆេទបង់ពន្ធរហូតដល់ខែកញ្ញាឆ្នាំ២០២៥ និងការបញ្ចុះពន្ធសម្រាប់ថ្លៃជួសជុលលំនៅឋាន និង ថ្លៃជួសជុលរថយន្តផងដែរ៕
ដោយ: តែម សុខុម
