ឯកឧត្តម កែវ រតនៈ រដ្ឋមន្រ្តីក្រសួងរ៉ែ និងថាមពល បានគូសបញ្ជាក់ថា អគ្គិសនីកម្ពុជា គ្រោងចំណាយថវិកាជាតិ១០លានដុល្លារ ដើម្បីដំឡើងស្ថានីយសាកយានយន្តអគ្គីសនីនៅទូទាំងប្រទេស ក្នុងបំណងបង្កភាពងាយស្រួលដល់អ្នកប្រើប្រាស់យានយន្តអគ្គិសនី ក៏ដូចជាជំរុញការប្រើប្រាស់យានយន្តអគ្គិសនីនៅកម្ពុជា ដែលកំពុងមានការកើនឡើងខ្លាំង។
មិនត្រឹមតែរាជរដ្ឋាភិបាលនោះទេ សូម្បីតែវិស័យឯកជន ក៏បានមើលឃើញពីសក្តានុពលនេះដែរ។ អ្នកឧកញ៉ា សួរ វិរៈ អគ្គនាយកក្រុមហ៊ុន វិរៈ ប៊ុនថាំ បានបង្ហើបពីមហិច្ឆតាក្នុងការបង្កើនស្ថានីយសាករថយន្តអគ្គិសនីឱ្យបានដល់១០០ទីតាំងនៅក្នុងឆ្នាំ២០២៦ នេះ។ អ្នកឧកញ៉ា ជឿជាក់ថា ការមានស្ថានីយសាកថ្មគ្រប់គ្រាន់ គឺជាគន្លឹះសំខាន់ក្នុងការលើកទឹកចិត្តឱ្យប្រជាពលរដ្ឋងាកមកប្រើប្រាស់រថយន្តអគ្គិសនីកាន់តែច្រើន ដែលមិនត្រឹមតែជួយសន្សំសំចៃការចំណាយលើប្រេងឥន្ធនៈប៉ុណ្ណោះទេ ប៉ុន្តែថែមទាំងចូលរួមចំណែកយ៉ាងធំធេងក្នុងការការពារបរិស្ថានទៀតផង។
ជាមួយគ្នានេះ លោក ងន សាំង អគ្គនាយកក្រុមហ៊ុន អ អិម អេ ខេមបូឌាន បានកត់សម្គាល់ថា ទោះបីជាចំនួនអ្នកប្រើប្រាស់យានយន្តអគ្គិសនៅកម្ពុជា នៅប៉ុន្មានឆ្នាំចុងក្រោយមានការកើនឡើងក៏ដោយ ប៉ុន្តែបើធៀបនឹងទីផ្សាររថយន្តប្រើសាំងធម្មតា គឺនៅមានកម្រិតតិចតួចនៅឡើយ។ លោកយល់ឃើញថា បញ្ហាប្រឈមចម្បងសម្រាប់ការប្រើប្រាស់រថយន្តអគ្គិសនី គឺការខ្វះខាតនៃស្ថានីយសាកថ្មី។ ជាការកត់សម្គាល់របស់អ្នកជំនាញរូបនេះ អ្នកដែលជ្រើសរើសប្រើរថយន្តអគ្គិសនីនាពេលបច្ចុប្បន្ន ភាគច្រើនជាអ្នកដែលមានរថយន្តប្រើសាំងរួចទៅហើយសម្រាប់ធ្វើដំណើរឆ្ងាយៗ ហើយប្រើឡានអគ្គិសនីជាជម្រើសបន្ថែមប៉ុណ្ណោះ។
យោងតាមទិន្នន័យពីក្រសួងសាធារណការ និងដឹកជញ្ជូន នៅឆ្នាំ២០២៥ កន្លងទៅ មានយានយន្តអគ្គសនីជិត៨ពាន់គ្រឿងបានចុះបញ្ជីនៅក្រសួងសាធារណការ និងដឹកជញ្ជូន។ បើតាមគោលនយោបាយជាតិ ស្តីពីការអភិវឌ្ឍវិស័យយានយន្តអគ្គិសនី ២០២៤-២០៣០ រដ្ឋាភិបាលដាក់គោលដៅជំរុញការប្រើប្រាស់ម៉ូតូអគ្គិសនីឱ្យបាន៧០% និងរថយន្តអគ្គិសនីឱ្យបាន៤០% នៅត្រឹមឆ្នាំ២០៥០ ដើម្បីឈានទៅសម្រេចបាននូវអព្យាក្រឹតកាបូន និងធ្វើឱ្យកម្ពុជាក្លាយជាប្រទេសដែលមានការអភិវឌ្ឍប្រកបដោយចីរភាព៕
អត្ថបទ៖ បូ ដូឡា
