ចរន្តវិនិយោគលើវិស័យអចលនទ្រព្យបានចាប់ផ្តើមកំរើកឡើងវិញបណ្តើរៗហើយ ក្រោយរាជរដ្ឋាភិបាលកម្ពុជា សម្រេចបើកសកម្មភាពសង្គម និងសេដ្ឋកិច្ចលើគ្រប់វិស័យឡើងវិញ កាលពីថ្ងៃទី១ ខែវិច្ឆិកា ឆ្នាំ២០២១។ ទោះបីក្នុងអំឡុងនៃវិបត្តិកូវីដ-១៩ ចំនួនអ្នកទិញអចលនទ្រព្យមានការថយចុះ តែតម្លៃអចលនទ្រព្យមិនមានការប្រែប្រួល គួរឲ្យកត់សម្គាល់នោះទេ។ អ្នកជំនាញជឿជាក់ថា ក្រោយការបើកប្រទេសឡើងវិញ វានឹងធ្វើឲ្យចរន្តទិញលក់ក្នុងវិស័យអចលនទ្រព្យមានកំណើនបន្តិចម្តងៗ ជាពិសេសក្រោយពិធីបុណ្យចូលឆ្នាំចិន នាពេលខាងមុខ។
នៅក្នុងសន្និសីទសារព័ត៌មានស្តីពី ការរៀបចំសមាជលើកទី២៣ នៃសមាគមអ្នកវាយតម្លៃអចលនវត្ថុអាស៊ាន(AVA) នៅព្រឹកថ្ងៃទី៣ វិច្ឆិកា លោក ច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានព្យាករណ៍ថា ការវិនិយោគលើវិស័យអចលនទ្រព្យនៅកម្ពុជានឹងមានកំណើនចន្លោះពី ៣០%ទៅ៤០%នៅដើមឆ្នាំ២០២២ ខាងមុខ។ ការព្យាករណ៍បែបនេះ ធ្វើឡើងក្រោយលោករំពឹងថា ក្រោយការបើកប្រទេសលើគ្រប់វិស័យឡើងវិញ នឹងមានលំហូរវិនិយោគិនជាតិ និងអន្តរជាតិយ៉ាងច្រើន សំឡឹងឱកាសវិនិយោគលើវិស័យនេះនៅតាមបណ្តាខេត្តនានា ជាពិសេសនៅតំបន់ជាយក្រុងតែម្តង។ វិនិយោគិនបរទេស ដែលលោករំពឹងមកបោះទុនវិនិយោគលើវិស័យអចលនទ្រព្យច្រើនជាងគេរួមមានចិន ជប៉ុន និងសហរដ្ឋអាមរិកជាដើម។
អត្ថបទគួរអាន
ប្រធានសមាគមរូបនេះបានគូសបញ្ជាក់បន្ថែមថា ទោះបីការឆ្លងរាតត្បាតនៃជំងឺកូវីដ-១៩ បានធ្វើឲ្យចរន្តទិញលក់ក្នុងវិស័យអចលនទ្រព្យមានការធ្លាក់ចុះក៏ពិតមែន តែតម្លៃអចលនទ្រព្យវិញពុំមានការប្រែប្រួលគួរឲ្យកត់សម្គាល់នោះទេ។ អ្នកជំនាញរូបនេះ អះអាងថា តម្លៃអចលនទ្រព្យកម្ពុជានៅមានកម្រិតទាបនៅឡើយបើធៀបនឹងតម្លៃអចលនទ្រព្យជាមួយប្រទេសក្នុងតំបនអាស៊ាន ដែលកត្តានេះ ធ្វើឲ្យកម្ពុជាមានឱកាសខ្ពស់ក្នុងការទាក់ទាញវិនិយោគិនបរទេស។ អ្នកជំនាញរូបនេះ វាយតម្លៃថា វិស័យអចលនទ្រព្យនៅកម្ពុជានៅតែអាចផ្តល់អត្ថប្រយោជន៍ និងប្រាក់ចំណេញខ្ពស់នៅក្នុងរយៈពេល១ទៅ២ឆ្នាំខាងមុខ ហើយលោកជឿជាក់ថា នៅរយៈពេល៣ទៅ៥ឆ្នាំខាងមុខ វិនិយោគិនកម្ពុជនឹងអាចឈានជើងទៅវិនិយោគលើវិស័យអចលនទ្រព្យនៅតាមប្រទេសនានានៅអាស៊ាន និងក្នុងតំបន់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
