នាពិធីបើកកិច្ចប្រជុំកំពូល«សេដ្ឋកិច្ច និងបច្ចេកវិទ្យាចិនពិភពលោក»នាថ្ងៃទី២៦ ខែវិច្ឆិកា ឆ្នាំ២០២៤ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជាបានគូសបញ្ជាក់ថា តួអង្គសំខាន់ក្នុងការជំរុញកំណើនសេដ្ឋកិច្ច ដែលរាជរដ្ឋាភិបាលបានប្រកាន់យ៉ាងខ្ជាប់ខ្ជួននោះ គឺអ្នកធុរកិច្ច និងវិនិយោគិន ពោលគឺមិនមែនជារាជរដ្ឋាភិបាលនោះទេ ខណៈតួនាទីរបស់រដ្ឋាភិបាល ត្រឹមជាអ្នកបង្កើតបរិយាកាសអំណោយផលសម្រាប់ធុរកិច្ចអាចរីកចម្រើន នវានុវត្តន៍អាចមានភាពជឿនលឿន និងកំណើនសេដ្ឋកិច្ចទទួលបានការថែទាំប៉ុណ្ណោះ។ ទន្ទឹមនេះ សម្តេចធិបតី បានប្តេជ្ញា និងសន្យាថា រាជរដ្ឋាភិបាលកម្ពុជា នឹងបន្តគាំទ្រដល់ភាពជោគជ័យរបស់វិនិយោគិនទាំងអស់ តាមគ្រប់មធ្យោបាយដែលអាចធ្វើទៅបាន ពោលគឺ រាជរដ្ឋាភិបាលកម្ពុជានឹងឈរនៅខាងអ្នកធុរកិច្ចជានិច្ច តាមរយៈការបន្តជួយគាំទ្រគ្រប់ជំហានចំពោះធុរកិច្ចដែលវិនិយោគនៅកម្ពុជា។
នៅចំពោះមុនវិនិយោគិនបរទេសជាពិសេសវិនិយោគិនចិន សម្តេចធិបតី បានអះអាងថា ការវិនិយោគនៅកម្ពុជា គឺរាជរដ្ឋាភិបាលបានផ្តល់ភាពជាម្ចាស់អាជីវកម្មបរទេស១០០% ដោយមិនមានការរឹតបន្តឹងលើប្រាក់ចំណេញ និងការផ្ញើដើមទុនត្រឡប់ទៅវិញនោះទេ ដែលនេះ គឺជាចំណុចខុសគ្នាជាមួយប្រទេសមួយចំនួននៅក្នុងតំបន់។ ម្យ៉ាងទៀត តាមរយៈការអនុញ្ញាតឱ្យអ្នកវិនិយោគរក្សាប្រាក់ចំណេញរបស់ពួកគេកាន់តែច្រើន ក៏បានធ្វើឱ្យកម្ពុជាក្លាយជាគោលដៅដែលមានភាពប្រកួតប្រជែងសម្រាប់ការវិនិយោគផងដែរ ដូច្នេះហើយ សម្តេចធិបតី ជឿជាក់ថា ជោគជ័យរបស់អ្នកវិនិយោគ គឺជាជោគជ័យរបស់រាជរដ្ឋាភិបាលផងដែរ។ សម្តេចធិបតី បន្ថែមទៀតថា កម្ពុជាមានកម្មវិធីលើកទឹកចិត្តកម្រិតខ្ពស់ ដែលមានភាពទន់ភ្លន់ខ្លាំងនៅក្នុងតំបន់ ដែលត្រូវបានរចនាឡើងដើម្បីជួយអាជីវកម្ម និងការវិនិយោគឱ្យមានការរីកចម្រើន។
សម្រាប់សម្តេចធិបតី ការការពារបរិស្ថានរបស់កម្ពុជា ក៏ជាការការពារផលប្រយោជន៍របស់វិនិយោគិន ដោយសារតែទីផ្សារពិភពលោកមានការទាមទារកាន់តែច្រើនឡើងទាក់ទងនឹងខ្សែច្រវាក់ផ្គត់ផ្គង់បៃតង ដូច្នេះនៅពេលដែលវិនិយោគិនជ្រើសរើសប្រទេសកម្ពុជា គឺមិនត្រឹមតែជ្រើសរើសកន្លែងវិនិយោគប៉ុណ្ណោះទេ តែក៏កំពុងក្លាយជាតួអង្គក្នុងការកសាងអនាគតប្រកបដោយចីរភាពផងដែរ។ បើតាមការអះអាងរបស់សម្តេចធិបតី ៦២% នៃល្បាយថាមពលរបស់កម្ពុជាបានមកពីប្រភពកកើតឡើងវិញរួចហើយ ហើយកម្ពុជាប្តេជ្ញាចិត្តក្នុងការសម្រេចឱ្យបាននូវថាមពលកកើតឡើងវិញ ៧០% នៅឆ្នាំ២០៣០ និងឈានដល់អព្យាក្រឹតភាពកាបូននៅឆ្នាំ២០៥០ផងដែរ។
ជាមួយគ្នានេះ សម្តេចធិបតី បានឆ្លៀតយកកិច្ចប្រជុំស្តីពី«សេដ្ឋកិច្ច និងបច្ចេកវិទ្យាចិនពិភពលោក»ប្រាប់ធុរជនថា ចិនគឺជាអ្នកដឹកនាំកំណើនសេដ្ឋកិច្ចដ៏សំខាន់មួយរបស់ពិភពលោក ដូច្នេះនៅពេលដែលចិនផ្តោតលើការអភិវឌ្ឍប្រកបដោយគុណភាពខ្ពស់ នោះតំបន់ទាំងមូលនឹងទទួលបានផលប្រយោជន៍ពីការតម្រង់ទិសគោលនយោបាយរបស់ចិន។ សម្តេចធិបតី បានបន្តថា ទំនាក់ទំនងវប្បធម៌ចាក់ឫសយ៉ាងជ្រៅរវាងកម្ពុជានិងចិន រួមផ្សំជាមួយនឹងទំនាក់ទំនងអន្តររដ្ឋាភិបាលដ៏រឹងមាំ បានបង្កើតបរិយាកាសអំណោយផលពិសេសមួយសម្រាប់ការរីកចម្រើនរបស់វិនិយោគចិនផងដែរ។
គួរបញ្ជាក់ថា ទំហំពាណិជ្ជកម្មទ្វេភាគីកម្ពុជាចិនបានឈានដល់ជាង១២ពាន់លានដុល្លារអាម៉េរិកនៅក្នុងរយៈពេល១០ខែកន្លងមកនេះមានការកើនឡើង២៣% បើធៀបនឹងរយៈពេលដូចគ្នាកាលពីឆ្នាំមុន ក្នុងនោះកម្ពុជានាំចេញទៅចិនមានទំហំជាង១ពាន់៤រយលានដុល្លារមានការកើនឡើងជាង២១% ខណៈកម្ពុជានាំចូលពីចិនមកវិញមានទំហំរហូតដល់ជិត១១ពាន់លានដុល្លារមានការកើនឡើង២៣%៕
អត្ថបទ សោម ស្រីពេជ្រ និងរូបភាពឯកសារ
